“კარმიდამო ჩემმა” უკვე აუწყა მკითხველს, რომ გურიაში, ოზურგეთში აღდგა მსხვილფეხა რქოსანი პირუტყვის ხელოვნურად დათესვის სამსახური. ამ სამსახურის მიერ, დღეის მდგომარეობით, დათესილია 130 მსხვილფეხა პირუტყვი, როგორც ოზურგეთის ტერიტორიაზე, ისე ჩოხატაურში, ლანჩხუთში და ქობულეთის სოფლებში. წლის ბოლომდე განსაზღვრულია 130 ნამატის მიღება.
იმის გასაგებად, რამდენი ნამატია დღეისთვის დაბადებული ხელოვნური განაყოფიერებით, რათა გახორციელდეს ადგილობრივი ჯიშის საქონლის ჯიშთა ცვლა მაღალპროდუქტიული საქონლით და წარმატებით დასრულდა თუ არა რამდენიმე ხელოვნური განაყოფიერება სხვადასხვა ადგილას, კვლავ ვეწვიეთ ძველ რესპონდენტებს.
დღეისთვის, ოზურგეთის მუნიციპალიტეტში, ერთი წლის მანძილზე, დაბადებულია 20-მდე “ჯერსისა” და “შვიცის” ჯიშის ხბოები, რომელთა ჩასახვა ხელოვნური განაყოფიერებით მოხდა. როგორც ოზურგეთის მუნიციპალიტეტის გამგეობის ბუნებრივი რესურსებით სარგებლობის სამსახურის მთავარი სპეციალისტი გურამ ბერძენიშვილი ამბობს, ჯიშთა ცვლის ხელოვნური მეთოდი საბჭოთა სივრცეშიც არსებობდა და ახლაც წარმატებით ვითარდება.
გამოცდილი ვეტექიმი თამაზ კილაძე ენთუზიაზმითა და დიდი ინტერესით შეუდგა ინგლისური “ჯერსისა” და ამერიკული “შვიცის” ჯიშის დანერგვას გურიაში. გასული წლის თებერვალში დანერგვა მოხდა ქალაქ ოზურგეთში გორგასლიძის ოჯახში, ასევე სოფლებში _ მაკვანეთსა და დვაბზუში.
როგორც ბატონი თამაზი ამბობს, გასული წლის თებერვალში გახორციელებული ხელოვნური დათესვა წარმატებით განვითარდა და დეკემბერში შედეგიც შესანიშნავი დადგა. სოფელ მაკვანეთში თემურ საჯაიას ოჯახში “ჯერსის” ჯიშის ხბო დაიბადა. ასევე წარმატებული აღმოჩნდა სოფელ დვაბზუში მცხოვრებ კახა წიტაიშვილის “ჯერსი” და ვახტანგ სკამკოჩაიშვილის “შვიცი” _ ამ ორ ოჯახში ორი უნაკლო ბოჩოლა დაიბადა. ქალაქ ოზურგეთის მკვიდრს, ბაქრაძის ქუჩაზე მცხოვრებ მერაბ გორგასლიძის ოჯახსაც “ჯერსის” ნაშიერი შეეძინა. დღეისთვის, ერთი თვის ასაკში, ყველა ხბო თავს კარგად გრძნობს.
“კარმიდამო ჩემი” ქიმიის მეცნიერებათა კანდიდატს გურამ ბერძენიშვილს ესაუბრა.
_ ბატონო გურამ, რაში გამოიხატება სანაშენე საქმიანობის მთავარი პრინციპი?
_ მთავარი პრინციპია განსაზღვრული გარკვეული პერიოდის, დაახლოებით, 20-22 თვის შემდეგ, მიღებული ნამატის ხელოვნური განაყოფიერება მოხდეს, რათა გახორციელდეს ადგილობრივი ჯიშის საქონლის ჯიშთა ცვლა, მაღალპროდუქტიული საქონლით. პარალელურად, განსაზღვრულია, დათესვის სამსახურთან ერთად, შეიქმნას კლინიკური მომსახურების ცენტრი, რომელშიც მოხდება საქონლის წინასწარი გამოკვლევა დაავადებებზე, სხვადასხვა დაავადებების მკურნალობის წარმართვა და ხელოვნური განაყოფიერება. ეს, ძირითადად, ბრუცელოზს შეეხება. ასევე ვეტერინარული კონსულტაციის გაწევა ცხოველთა მკურნალობის და კვებითი რეჟიმის საკითხებში.
_ მას შემდეგ, რაც ხელოვნური განაყოფიერებით ჩასახული ხბო დაიბადება, კონტროლს თუ უწევს შესაბამისი სამსახური და ფასიანია თუ არა ეს მომსახურება?
_ ახალდაბადებული ნაყოფის კონტროლი-გადამოწმება, მხოლოდ მეპატრონის თხოვნის საფუძველზე ხორციელდება. პირველ თვეს კონსულტაციები უფასოდ წარმოებს. აღვნიშნავ, რომ დღეისთვის ყველა ასეთი გზით დაბადებული ხბო ჯანმრთელია, რადგან მეპატრონეთა მხრიდან სადგურში საჩივარი ან პრეტენზია არ შემოსულა. პირიქით, ყველა კმაყოფილია.
_ ბატონო გურამ, სქესის განსაზღვრა თუ შეიძლება თავიდანვე? ბუნებრივია, შესანიშნავი ჯიშის ძროხებისგან, გამრავლების მიზნით, ყველას მდედრობითი სქესის ხბო აინტერესებს.
_ ეს, როგორც ვიცი, შესაძლებელია, მაგრამ ჩვენ არ გვიცდია და ექსპერიმენტის ჩატარებას აწი ვაპირებთ.
“კარმიდამო ჩემი” ოზურგეთში, ჯორჯიაშვილის ქუჩაზე მცხოვრებ გერასიმე გოლიაძის ოჯახს ესტუმრა, სადაც ახლახან ხელოვნური განაყოფიერების გზით ჩასახული ხბო დაიბადა, რომელიც მამრობითი სქესისა აღმოჩნდა. როგორც ოჯახის უფროსმა გვითხრა, ის ძალიან გახარებულია: _ მართალია, მინდოდა, დეკეული გამეზარდა, მაგრამ მოზვერს გავზრდი, ოჯახისთვის ზედმეტი არაფერია. “ჯერსის” მოჯიშებაზე ფიქრს კი ვერ შეველევი და უახლოეს მომავალში იმდენჯერ მოვიწვევ სპეციალური სადგურიდან სპეციალისტს, სანამ მდედრობითი სქესის პატარა “ჯერსი” არ შემეძინება, _ ღიმილით “დაიქადნა” ბატონმა გერასიმემ.
