ვენეციის კომისიაში პროკურატურის რეფორმის საკანონმდებლო ცვლილებათა პროექტზე საკონსულტაციო შეხვედრა გაიმართა.
იუსტიციის სამინისტროს ინფორმაციით, ქართულმა დელეგაციამ იუსტიციის მინისტრის პირველი მოადგილე ალექსანდრე ბარამიძის ხელმძღვანელობით კონსტიტუციურ საკითხებში ევროპის საბჭოს დამოუკიდებელ საკონსულტაციო ორგანოს საკანონმდებლო პაკეტი წარუდგინა, რომელიც მთავარი პროკურორის დანიშვნის ახალ მექანიზმებს ითვალისწინებს. ვენეციის კომისიის ექსპერტებთან ერთად, განხილვაში მონაწილეობდნენ ევროპის საბჭოს ადამიანის უფლებათა და კანონის უზენაესობის გენერალური დირექტორატის (DGI), ეუთო-სდემოკრატიული ინსტიტუტებისადა ადამიანისუფლებათა ოფისის (ODIHR), ევროპის პროკურორთა საკონსულტაციო საბჭოს (CCPE) წარმომადგენლები. ქართული დელეგაციის შემადგენლობაში იყვნენ პარლამენტის ადამიანის უფლებათა კომიტეტის თავმჯდომარის პირველი მოადგილე გედევან ფოფხაძე, მთავარი პროკურორის პირველი მოადგილე ირაკლი შოთაძე და მოადგილე გიორგი გოგაძე. საკანონმდებლო ცვლილებების პაკეტის განხილვა სამ საათს გაგრძელდა.
"ვენეციის კომისიის პირველი გამოხმაურებები პროკურატურის რეფორმის ამ პაკეტისადმი დადებითია, ახლა ველოდებით მათ კონკრეტულ წინადადებებს და, პარალელურად, ვაგრძელებთ მუშაობას პარლამენტში, რათა საკანონმდებლო ორგანომ ამ ინიციატივას მხარი დაუჭიროს და ის იქცეს კანონად", − განაცხადა იუსტიციის მინისტრის პირველმა მოადგილემ.
"პროკურატურის შესახებ" კანონპროექტის პირველად შეფასებას ვენეციის კომისია რამდენიმე დღეში დასკვნის სახით გამოაქვეყნებს.
საკანონმდებლო ცვლილებების პროექტი მოიცავს ცვლილებებს "საქართველოს სისხლის სამართლის კოდექსში", აგრეთვე, "პროკურატურის შესახებ" და "საქართველოს მთავრობის სტრუქტურის, უფლებამოსილებისა და საქმიანობის წესის შესახებ" საქართველოს კანონებში. ამ მოდელის თანახმად, პროკურატურის საერთო ხელმძღვანელობას იუსტიციის მინისტრი საპროკურორო საბჭოს მეშვეობით განახორციელებს, მთავარი პროკურორის დანიშვნის უფლებამოსილება კი გადანაწილდება საპროკურორო საბჭოზე, მთავრობასა და პარლამენტზე.
საპროკურორო საბჭოს შემადგენლობაში შევლენ: იუსტიციის მინისტრი − საპროკურორო საბჭოს თავმჯდომარე; პარლამენტის 2 წევრი, რომლებსაც პარლამენტი სიითი შემადგენლობის უმრავლესობით აირჩევს; უმაღლესი საგანმანათლებლო დაწესებულებებისა და სამოქალაქო საზოგადოების ორგანიზაციების მიერ წარდგენილ კანდიდატთაგან პარლამენტის მიერ სიითი შემადგენლობის უმრავლესობით არჩეული 2 წევრი, რომლებიც იმავდროულად არ ეწევიან საადვოკატო საქმიანობას; და პროკურორთა კონფერენციის მიერ არჩეული 4 წევრი. საბჭოს ექნება უფლება, დაამტკიცოს საქართველოს მთავარი პროკურორის კანდიდატურა, წარადგინოს მთავრობისათვის მთავარი პროკურორის თანამდებობიდან გათავისუფლების წინადადება, განახორციელოს მთავარი პროკურორისა და მისი მოადგილეების წინააღმდეგ დისციპლინური სამართალწარმოება. საპროკურორო უფლებამოსილების განხორციელების პროცესში საპროკურორო საბჭო არ ჩაერევა.
მთავარი პროკურორის კანდიდატურას ასახელებს და საბჭოს დასამტკიცებლად წარუდგენს იუსტიციის მინისტრი; საბჭო ხმათა 2/3-ით დაამტკიცებს და წარედგინება მთავრობას, შემდეგ კი − პარლამენტს. მთავარი პროკურორის უფლებამოსილების ვადა 6 წელია.
მთავარი პროკურორის ვადამდე გათავისუფლება მოხდება მის ქმედებაში სისხლის სამართლის დანაშაულის გამოვლენის ან სერიოზული დისციპლინური გადაცდომის ჩადენის შემთხვევაში. თუ იარსებებს საკმარისი საფუძველი დასაბუთებული ვარაუდისათვის, რომ მთავარმა პროკურორმა დანაშაული ჩაიდინა, დაინიშნება საგანგებო პროკურორი, რომელიც ორი თვის ვადაში მოამზადებს და საბჭოს წარუდგენს შესაბამის დასკვნას. თუკი დასკვნა დანაშაულის ჩადენის შესახებ დასაბუთებულ ვარაუდს არ დაადასტურებს, საკითხი დღის წესრიგიდან მოხსნილად ჩაითვლება. თუკი საბჭო წევრთა 2/3-ის უმრავლესობით დაადასტურებს მთავარი პროკურორის მიერ დანაშაულის სავარაუდო ჩადენას, ის მიმართავს საქართველოს მთავრობას მთავარი პროკურორის თანამდებობიდან გადაყენების თაობაზე თანხმობის მიღების წინადადებით. თუ მთავრობა თანხმობას განაცხადებს საპროკურორო საბჭოს წინადადებაზე, ის მიმართავს პარლამენტს, რომელიც წევრთა სრული შემადგენლობის უმრავლესობით გადაწყვეტს მთავარი პროკურორის თანამდებობიდან გადაყენების საკითხს.
თუკი მთავრობა ან პარლამენტი უარს განაცხადებს პროკურორის თანამდებობიდან გადაყენებაზე, საკითხი დღის წესრიგიდან მოხსნილად ჩაითვლება.
