ქალაქ ოზურგეთის მუნიციპალიტეტის შსს სავაჭრო ცენტრის 100 პროცენტის წილის მესაკუთრე სსიპ თვითმმართველი ქალაქის საკუთრებაში არსებული ქონების _ 5 982 კვ.მ. მიწის ფართობიდან 4 400 კვ.მ. ფართობის მიწის ნაკვეთი და მასზე განთავსებული შენობა-ნაგებობები მალე აუქციონზე გავა.
აუქციონი პირობებიანი იქნება და ბაზრის 4 400 კვ.მ. ფართობის მიწის ნაკვეთი აუქციონში გამარჯვებულს 25 წლის ვადით გადაეცემა. აღნიშნულის შესახებ თანხმობა ქალაქ ოზურგეთის მერს ბეგლარ სიორიძეს 17 ივნისს უკვე მისცა საკრებულომ.
საკრებულოს დეპუტატმა თამარ ნადირიძემ ბაზრის ტერიტორიის გასხვისებასთან დაკავშირებით პროტესტი საკრებულოს სხდომაზე გამოთქვა. მისი თქმით, 4400 კვ.მ. მიწის ფართობზე მერია ითხოვს პირდაპირი განკარგვის წესით პირობითი აუქციონის ჩატარების წესზე თანხმობას.
"გაურკვეველია ჩემთვის ეს ფაქტი, ასევე დარწმუნებული ვარ, რომ მოვაჭრეებმა არ იციან ეს ამბავი. ფაქტიურად მერიას ევალება ამ პირობების განსაზღვრა, ჩვენ ვაძლევთ ხმას ისეთ რამეს, რომ არ ვიცით, რა ელოდებათ ხვალ ადამიანებს", – აღნიშნა ნადირიძემ.
მისივე განცხადებით, დღევანდელმა ხელისუფლებამ მოსვლისთანავე ბაზრის ტერიტორიის გასხვისება დაიწყო.
"პირველი იყო ის, რომ თავის მეგობრებზე გაასხვისეს. ახლა შენობა -ნაგებობების სასწრაფო წესით გაყიდვაზე ფიქრობენ. ამას აკეთებენ არა 10, არამედ 25-35 წლიანი იჯარით. ჩემი აზრით, ძალიან ცუდ მდგომარეობაშია ჩავარდნილი ქალაქის მოსახლეობა. რა პირობებში აყენებენ შემდეგ მოვაჭრეებს, არც ამის შესახებ გვაქვს ინფორმაცია", _აღნიშნა ნადირიძემ.
ბაზრის მოვაჭრეებმა აუქციონის შესახებ არაფერი იციან. მათი თქმით, ბაზარში ხანძრის გაჩენის შემთხვევაში სახანძრო მანქანა ვერ გაივლის.
"ხანძარი რომ გაჩნდეს, სად შევა მანქანა? თუნდაც ცუდად გახდა ადამიანი, სასწრაფო ვერ მივა. საშინელი სიტუაციაა. ვინ იცის აუქციონის შესახებ, ყველაფერი დამალულად კეთდება, ხალხისთვის ინფორმაცია არაა. რაღაცას თქვენგან თუ გავიგებთ, თორემ თითქმის ყველა მეორე კერძოა, სიხარულით ვეგებებოდით ამ მთავრობას, რა დაგვრჩა? მხოლოდ ოცნება , არც ღირს საუბარი, რა აზრი აქვს? " _ გვითხრეს მოვაჭრეებმა.
მათივე თქმით, ყველას ამ ბაზარში უნდა და ყველა აქ მორბის.
"რა სცხია ამ ბაზარს ასეთი? რა უნდა ვთქვათ, არ ვიცით! როგორ ყველაფერს ყიდულობს ეს კაცი, ეს რა არის? სალუქვაძე 35 წელში ხელში ჩაიგდებს ყველაფერს!" _ ამბობენ მოვაჭრეები "გურია ნიუსთან".
ქალაქ ოზურგეთის მუნიციპალიტეტის საკრებულოს თავმჯდომარე გელა კობალაძე განმარტავს, რომ ბაზარის აუქციონზე გასვლის შემდეგ, მოვაჭრეებს არანაირი საფრთხე არ ემუქრებათ.
"არანაირი საფრთხე ბაზრის მოვაჭრეებს არ ემუქრებათ, თავად ბაზრის მოვაჭრეებსაც შეუძლიათ მიიღონ აუქციონში მონაწილეობა", _აღნიშნავს კობალაძე.
მისი თქმით, აუქციონი პირობიანი იქნება.
"აუქციონს ექნება თავისი პირობები, აუქციონში გამარჯვებული პირი მერიის თანხმობის გარეშე ვერ გაზრდის გადასახადს, დაწესებული იქნება სტანდარტები, უნდა მოაწესრიგოს ტერიტორია, დაასუფთავოს, ელექტროენერგიის გადასახადი უნდა გადაიხადოს და ნათელი უნდა გახდეს ბაზრიდან შემოსული გადასახადების შესახებ ინფორმაცია.
მოწესრიგდება ბაზრის სეგმენტი, იცით, როგორ გამოიყურება ცელოფანგამოკრული ბაზარი? ეს არის მერიის ტერიტორია, რომელიც ერთხელ და სამუდამოდ უნდა მოწესრიგდეს. ეს იქნება სწორი ნაბიჯი, ერთხელ და სამუდამოდ უნდა დამთავრდეს ბაზრის ყბადაღებული თემა" _აღნიშნავს კობალაძე.
