პროკრედიტ ბანკის კლიენტებს 15 ივლისიდან ნაღდი სახით შეტანილი თანხის გატანაზე საკომისიო გაუძვირდებათ. ამის შესახებ დღეს ბანკის კლიენტებმა სმს შეტყობინებები მიიღეს. გარდა ამისა, ინფორმაცია უკვე აღნიშნულია პროკრედიტ ბანკის ვებ-გვერდზეც.
"გაცნობებთ, რომ 15 ივლისიდან იზრდება ფილიალიდან თანხის გადარიცხვის ტარიფები. გადარიცხვა ინტერნეტ ბანკინგით კვლავ შესაძლებელია შეღავათიანი ტარიფით", _ აღნიშნულია ბანკის მიერ კლიენტებისთვის გაგზავნილ შეტყობინებაში.
უფრო კონკრეტულად კი, პროკრედიტ ბანკის მომხმარებლებს – იურიდიულ პირებს, ბიზნეს და აგრო კლიენტებს ნაღდი სახით შეტანილი თანხის გატანაზე ახალი საკომისიო პირობები გაუვრცელდებათ:
ახალი საკომისიო პირობებით, 5000 ლარზე განაღდების საკომისიო პროკრედიტ ბანკის ფილიალიდან 1% მინიმალური 2 ლარი, ხოლო პროკრედიტ ბანკის ბანკომატიდან 0.2% მინიმალური 0.2 ლარი იქნება.
5000 ლარზე ნაკლების გატანის შემთხვევაში საკომისიო პროკრედიტ ბანკის ფილიალიდან 0.3% მინიმალური 0.5 ლარი, ხოლო პროკრედიტ ბანკის ბანკომატიდან 0.2% მინიმალური 0.2 ლარი იქნება.
რაც შეეხება გადარიცხვის საკომისიოს, ლარში გადარიცხვის საკომისიო ფილიალიდან 0.15%, მინიმალური 6 ლარი, ხოლო ბანკომატიდან 0.06%, მინიმალური 0.6 ლარი იქნება.
დოლარსა და ევროში გადარიცხვის საკომისიო კი, ფილიალიდან 0.30%, მინიმალური 25 ერთეული, მაქსიმალური 500 ერთეული; ბანკომატიდან კი, 0.16%, მინიმალური 12 ერთეული, მაქსიმალური 500 ერთეული იქნება.
გარდა ამისა, ბანკში განმარტავენ, რომ სხვა ვალუტის გადარიცხვის დროს მინიმალური საკომისიო განისაზღვრება ევროში, ან მისი ექვივალენტით გადასარიცხ ვალუტაში.
რაც შეეხება პლასტიკური ბარათით თანხის განაღდებაზე და ინტერნეტ ბანკინგით შესრულებულ უნაღდო ოპერაციებზე, ბანკში განმარტავენ, რომ ფილიალთან შედარებით დაბალი საკომისიოები მოქმედებს.
ბანკი მოუწოდებს კლიენტებს, დისტანციური არხების უპირატესობებით, შეღავათიანი ტარიფებით, სწრაფი და კომფორტული სერვისით ისარგებლონ.
"გურია ნიუსის" კითხვაზე, რატომ გახდა საჭირო გადარიცხვების საკომისიოს გაზრდა, ბანკის მარკეტინგის მენეჯერმა ნატა ბოჭორიშვილმა განაცხადა, რომ
ბანკი თვითმომსახურების ზონას ნერგავს, რაც 24 საათის განმავლობაში იქნება ხელმისაწვდომი.
"ეს არის ტერიტორია, რომელიც გამოყოფილია ბანკის შენობნაში და 24 საათის განმავლობაში ხელმისაწვდომი იქნება. რაც საშუალებას მისცემს ჩვენს კლიენტებს მიიღონ საბანკო მომსახურებები 24 საათის განმავლობაში. ის მომსახურებები კი, რაც კლიენტს შეუძლია მიიღოს თვითმომსახურებით, ფილიალში მომსახურების კუთხით გავაძვირეთ, ანუ ძველი შეღავათიანი ტარიფები დარჩება იმ შემთხვევაში თუ გადარიცხვას თქვენვე აწარმოებთ ე.წ. გადარიცხვების ყუთის მეშვეობით, რომელიც ასევე თვითმომსახურების ზონაშიც დგას. ასევე, ჩვენს კლიენტებს ინტერნეტბანკინგით გადარიცხვა 40%-მდე უფრო იაფად შეუძლიათ განახორციელონ", _ უთხრა ბოჭორიშვილმა "გურია ნიუსს".
ბანკის მომხმარებლებს, შეღავათიანი ტარიფებისა და საბანკო მომსახურების შესახებ ინფორმაცია, შეუძლიათ ბანკის ვებ-გვერდზე იხილონ.
