“დაქირავებული მუშა ვალდებულია იმუშაოს კანონიერად. ჯარიმა ჩემს სახელზეა და არა ოპერატორის”

 "გურია ნიუსის" ვებგვერდზე გამოქვეყნებულ  სტატიას "სტაინშიკები" მთავრობის კანცელარიასთან  შიმშილობის გამოცხადებას აპირებენ" ავტოსადგომების ხელმძღვანელი, ინდმეწარმე ბიძინა კვაჭანტირაძე გამოეხმაურა და ოპერატორები ტყუილში დაადანაშაულა.

"ძალიან მეწყინა თქვენგან ასეთი ინფორმაციის გამოქვეყნება, რასაც ოპერატორები გეუბნებიან ყველაფერი კი არ უნდა დაიჯეროთ.  ძალიან გთხოვთ, მოახდინოთ რეაგირება, თუ არა და მე გავაკეთებ მკაცრ განცხადებას, ტყუილს ამბობენ ოპერატორები, მე შემიძლია გავასაჩივრო ეს, არაკანონიერია,  რასაც წერთ-" აღნიშნავს ინდმეწარმე კვაჭანტირაძე, რომელიც ოზურგეთის მაჟორიტარი დეპუტატის ზვიად კვაჭანტირაძის ბიძაშვილია.

"ჩვენ საგადასახადო სისტემის წარმომადგენლები გვაფრთხილებს, რომ ვიმუშაოთ მკაცრი აღრიცხვის დოკუმენტებით, რომელიც გადაეცემა ოპერატორებს.  მათ უნდა გამოწერონ ქვითრები ყოველ ავტომობილზე, რომელიც სადგომზე შემოდის.  პირველად გაფრთხილება მივიღე ოფიციალურად მაგის გამო, გაფრთხილების  შემდეგ მომივიდა  200 ლარიანი ჯარიმა"_ განმარტავს კვაჭანტირაძე და მოგვმართავს: 

"ჩვენი  მუშაობა უნდა  იყოს  კანონთან შესაბამისობაში.  ამაზე  ადრე თქვენც გქონდათ სტატიები, მუშაობდით ამ თემაზე,  აღნიშნავდით, რომ არაკანონიერად ხდებოდა ფულის ამოღება,  საუბრობდით, რომ იყო დარღვევები, რადგან  ოპერატორები არ იძლეოდნენ ჩეკებს, ახლა რა ვქნათ, მასე ვიმუშაოთ?“

“დაქირავებული მუშა ვალდებულია იმუშაოს კანონიერად.  ჯარიმა ჩემს სახელზე მოვიდა,  მე უნდა გადავიხადო და არა ოპერატორმა.

_ ბატონო ბიძინა ჯარიმას თქვენ ოპერატორებს არ ახდევინებთ?

_ ეს არის ცრუ  ინფორმაცია, ქვითარი ჩემს სახელზეა და მე  ვიხდი.

_თქვენ არ ახდევინებთ ოპერატორებს ამ თანხას?

_ოპერატორი ვალდებულია მისი დღიური მოსაკრებელი ქვითრების მიხედვით შემოიტანოს, ჩვენ შემდეგ ამას ვუფიქსირებთ.  ოპერატორებს,  ადრე როგორც მუშაობდნენ, ისე თვითნებურად მუშაობა უნდათ, არ მოსწონთ კანონი.  უნდათ იყვნენ უკონტროლოდ,  საგადასახადო კი აჯარიმებს.  ვინაიდან ოპერატორი არის ჩემგან დაქირავებული მუშახელი,  მე ვარ უფლებამოსილი პირი ვაკონტროლო.  ისინი კანონით გათვალისწინებულ ნორმებს არღვევენ.  საგადასახადო კი ამისთვის მკაცრად სჯის და აჯარიმებს.

მკითხველს შევახსენებთ,  რომ  ქალაქ ოზურგეთის ცენტრალურ ნაწილში, უნივერმაღისა და  "საქართველოს ბანკის" მიმდებარე ტერიტორიაზე   ავტომანქანების გაჩერებაზე მომუშავე ოპერატორები,  ე.წ. "სტაიანშიკები“  20 თეთრიანი ქვითრის არ ამოწერის გამო 200 ლარით დააჯარიმეს. მათ დახმარებისთვის  "გურია ნიუსს" მიმართეს:

"იქნებ დაგვეხმაროთ"–  მოითხოვენ   მოლარე ოპერატორები.

 მათი თქმით, თუ  განმეორდება მსგავსი ფაქტები, იძულებულნი გახდებიან,   თბილისში მთავრობის კანცელარიასთან შიმშილობა  გამოაცხადონ.