შინაგან საქმეთა სამინისტროს საინფორმაციო-ანალიტიკური დეპარტამენტი წარმოგიდგენთ საქართველოს სახელმწიფო საზღვარზე გადაადგილებულ ვიზიტორთა სტატისტიკურ მონაცემებს გასული თვის მდგომარეობით, კერძოდ:
2015 წლის ივნისის თვე 496 758 ვიზიტით განისაზღვრა, რაც 2014 წლის იგივე პერიოდის მაჩვენებელზე 9,3 %-ით მეტია.
ამასთან, შემოღებული პირობითი დაყოფის მიხედვით, ხვედრითი წილის ურთიერთმიმართება შემდეგია:
ა) ტურისტი – 197 537 ვიზიტი
ბ) ტრანზიტი – 131 710 ვიზიტი
გ) სხვა – 167 511 ვიზიტი
რაც შეეხება იანვარ-ივნისის ინტერვალს, ქვეყანაში უკვე 2 332 303 ვიზიტი განხორციელდა, რაც 3,5%-ით მეტია 2014 წლის ანალოგიური საანგარიშო პერიოდის მაჩვენებელზე.
2015 წლის ივნისშიც ყველაზე მეტი ვიზიტი კვლავ თურქეთიდან, აზერბაიჯანიდან, სომხეთიდან, რუსეთიდან და უკრაინიდან განხორციელდა.
ასევე პოზიტიური ტენდენცია ნარჩუნდება ევროკავშირის ქვეყნების მიმართულებიდან, საიდანაც საქართველოში ჩამოსვლების რაოდენობის ზრდის კუთხით, იანვარ-ივნისშიც გამოირჩნენ ლიტვა, ჩეხეთი, დიდი ბრიტანეთი, გერმანია, ლატვია და ნიდერლანდები.
შუა აზიის ქვეყნებიდან, უზბეკეთიდან და ყაზახეთიდან მომატებულია ვიზიტორთა მიერ საქართველოს საზღვრის გადაკვეთის შემთხვევები. ასევე ფიქსირდება შემომსვლელთა პროცენტული მატება აღმოსავლეთ ევროპის ქვეყნებიდან – ბელორუსიიდან და მოლდოვადან. ხოლო ცენტრალური აზიის ქვეყნებიდან – არაბათა გაერთიანებული საემიროებიდან 67 პროცენტითაა მომატებული ვიზიტორების შემოსვლა შარშანდელ მონაცემებთან შედარებით. აქვე აღსანიშნავია ამერიკის შეერთებული შტატების მოქალაქეების 12%-იანი ზრდა.
