საგადასახადო კოდექსში შესული ცვლილების მიხედვით, დღეიდან, თამბაქოს ნაწარმზე (ფილტრიან და უფილტრო სიგარეტზე) დამატებით აქციზი დაწესდება, რაც საცალო სარეალიზაციო ფასის 5 პროცენტის ოდენობაა; ეს კი, ავტომატურად გამოიწვევს სიგარეტის ფასის მომატებას.
როგორც ცნობილია, თამბაქოს ნაწარმთან მიმართებაში საქართველოში აქამდე მოქმედი დაბეგვრის სისტემა და საგადასახადო ტვირთის გადანაწილება დისპროპორციულია და ე.წ. შერეული სისტემის დანერგვა ბაზარზე სამართლიანი კონკურენციის პრინციპების დანერგვას, ევროკავშირის კანონმდებლობასთან დაახლოებას, საბიუჯეტო შემოსავლების ზრდას უზრუნველყოფს და ევროკავშირში არსებულ პრაქტიკას შეესაბამება.
"გურია ნიუსმა" თბილისში შემთხვევითი შერჩევის პრინციპით, მოქალაქეები გამოკითხა – აქვთ თუ არა მათ ინფორმაცია სიგარეტის ფასის მატებასთან დაკავშირებით.
როგორც გამოკითხვიდან გაირკვა, მოქალაქეების ნაწილი ინფორმირებულია, ნაწილმა კი ეს პირველად ჩვენგან შეიტყო.
თუმცა აღსანიშნავია, რომ მწეველების გარკვეულმა რაოდენობამ "გურია ნიუსთან" საუბრისას აღნიშნა, რომ სასურველია მოზარდმა თაობამ სიგარეტის მოწევა არ დაიწყონ, მაგრამ დასძინეს, რომ თვითონ იმდენად არიან უკვე სიგარეტზე დამოკიდებულნი, მიუხედავად ფასის გაზრდისა, პურის ნაცვლად მზად არიან სიგარეტი იყიდონ.
"სიგარეტის კიდევ გაძვირებაზე ინფორმაცია არ მაქვს, მაგრამ როგორც მწეველს რამდენითაც არ უნდა გაძვირდეს ხელს ვერ შემიშლის, რომ ვიყიდო. უფილტრო სიგარეტს ვეწევი, მართალია, მაგრამ 2 ლარიც რომ გახდეს, პურს არ ვიყიდი და სიგარეტს მაინც მოვწევ", _ ამბობს 56 წლის ვასილი.
როგორც ერთ-ერთმა რესპონდენტმა, 21 წლის მარიმ "გურია ნიუსს" უთხრა, მის ოჯახში 3 ადამიანი ეწევა, ამიტომ სიგარეტის კიდევ გაძვირება მისი ოჯახის ხარჯებზე იმოქმედებს.
"სიგარეტის გაძვირებასთან დაკავშირებით დღეს შევიტყვე. როგორც ვიცი, ისედაც ძალიან გაძვირდა. პირადად მე არა, მაგრამ ჩემი ოჯახის წევრები ეწევიან და როცა სახლში 3 ადამიანი ეწევა, 5 თეთრითაც გაძვირება ოჯახის ყოველდღიურ ბიუჯეტზე საგრძნობლად აისახება. ამიტომ სასურველია, რომ არ გაძვირდეს", _ ამბობს მარი.
სიგარეტის ფასის ზრდასთან დაკავშირებით ინფორმაცია აქ აქვს 32 წლის ირაკლის. როგორც მან ჩვენტან საუბრისას აღნიშნა, დღეში 2 კოლოფზე მეტი სიგარეტი სჭირდება, თუმცა ის მოზარდ თაობას ურჩევს მოწევა არ დაიწყონ.
"სიგარეტის ფასის გაზრდის შესახებ არაფერი ვიცი, ძალიან ცუდია თუ ისევ უნდა გაძვირდეს. პირადად მე დღეში 2 კოლოფი სიგარეტი არ მყოფნის, მითუმეტეს თუ ძმაკაცებიც ჩემს სიგარეტს ეწევიან, მაშინ უფრო მეტის ყიდვაც მიწევს. მაგრამ ფასის კიდევ მომატებამ არ მგონია, მე ან რომელიმე მწეველს სიგარეტის ყიდვაში ხელი შეგვიშალოს. ალბათ უფრო მოზარდ თაობას თუ შეუწყობს ხელს, რომ სიგარეტის მოწევა არ დაიწყონ", _ ამბობს ირაკლი.
რაც შეეხება კიდევ ერთ გამოკითხულ ქალბატონს, მან განაცხადა, რომ სასურველია მედიამ სიგარეტის მავნე თვისებებზე ბევრი ისაუბრონ.
"ჩემს ოჯახში, საბედნიეროდ, არავინ ეწევა. ამიტომ სიგარეტი გაძვირდება თუ არა ჩემი ოჯახის ბიუჯეტზე ნაკლებად აისახება. თუმცა იმედი მაქვს მოზარდი თაობისთვის მიუწვდომელი გახდება. მაგრამ კარგი იქნება თუ ტელევიზიები და სხვადასხვა საინფორმაციო საშუალებები დროს დაუთმობენ სიგარეტისგან გამოწვეულ დაავადებებს. თუ საზოგადოება შესაბამისად იქნება ინფორმირებული, ამ მავნე სენს დავამარცხებთ."_ ამბობს 46 წლის მარინა.
"სიგარეტის შესაძლო გაძვირებაზე დღეს მაღაზიის გამყიდველმა მითხრა. ძალიან ცუდია. თუმცა ვინც ეწევა ის მაინც მოწევს, რამდენიც არ უნდა ღირდეს. ამიტომ ჯობია არ გაძვირდეს."_ გვითხრა 28 წლის დიმამ.
სიგარეტის გაძვირების მომხრეა 35 წლის მზიაც. მისი თქმით, სიგარეტის გაძვირება ხელს შეუწყობს იმას, რომ არასრულწლოვნებმა მისი ყიდვა ვერ შეძლონ.
"უნდა გაძვირდეს, რომ ბავშვებმა ვერ იყიდონ. მაგრამ თუ ჩვენი ქვეყნის ეკონომიკურ დონის გავითვალისწინებთ არ უნდა გაძვირდეს, ისედაც იაფფასიან სიგარეტს ყიდულობენ."_ მზია, 35 წლის, დასაქმებული.
ერთ-ერთი გამოკითხულის თქმით კი, მოწევა მავნე ჩვევაა და ვერასოდეს გადაეჩვევა, მაგრამ მთავარია სიგარეტი ახალგაზრდებმა არ მოსწიონ.
"ძალიან ცუდია როცა ქვეყანაში რამე ძვირდება. მოწევა მავნებელია ჯანმრთელობისთვის, მაგრამ მთავრობის მიერ სიგარეტის გაძვირებამ მეეჭვება ხელი შეუწყოს მწეველთა რიცხვის შემცირებას, თუმცა ვნახოთ რა შედეგები მოჰყვება. მართალია უკვე ძალიან გააძვირეს, მაგრამ ეფექტი არ ჰქონია. მთავარია სკოლის მოსწავლეებს არ მიეცეთ შეძენის საშუალება. მე კი ვარ მწეველი, მაგრამ გააძვირეს? მაინც ვყიდულობ. ეს მავნე ჩვევაა, რომელსაც ადამიანი ვერ გადაეჩვევი, თავის დანებება ბევრჯერ ვცადე, მაგრამ უშედეგოდ. ამიტომ რაც არ უნდა გაძვირდეს მაინც ვიყიდი, შეიძლება პური ვერ ვიყიდო, მაგრამ სიგარეტის გარეშე ვერ გავძლებ", _ ამბობს 42 წლის თემური.
38 წლის ნინა კი ამბობს, რომ სჯობს სიგარეტის ყიდვის ნაცვლად გაჭირვებულ ადამიანებს დაეხმარონ.
"პირადად არამწეველი ვარ. რამდენადაც ვიცი, სიგარეტი ადამიანს სიცოცხლეს უსწრაფებს, ჯანმრთელობას უზიანებს. კარგი იქნება თუ თავს დაანებებენ მოწევას და სიგარეტს ფასს გაუზრდიან. იქნებ როგორმე ამან მაინც იმოქმედოს, არავინ ფიქრობს იმ ლარით თუ ორი ლარით რამდენ გაჭირვებულ ოჯახს შეიძლება პური მაინც უყიდონ და დაეხმარონ, თუ ასე საკუთარი თავის საზიანოდ შეუძლიათ დახარჯვა", – გვითხრა ნინამ.
