დღეს ლანჩხუთის მუნიციპალიტეტის საკრებულოს "სამანდატო, საპროცედურო, იურიდიულ საკითხთა და ეთიკის" კომისიაში შევიდა საკრებულოს წევრის, ელგუჯა ჩხაიძის განცხადება ახალი ფრაქციის შექმნის თაობაზე. ელგუჯა ჩხაიძემ (ის საკრებულოში "თავისუფალი დემოკრატების" სახელით შევიდა) ფრაქცია "ლანჩხუთი – ევროატლანტიკური მომავლისათვის" შექმნა "ნაცმოძრაობის" წევრებთან გიორგი გოგუაძესთან და კახა ასკურავასთან ერთად გადაწყვიტა. ამავე დღეს, პარტია "თავისუფალმა დემოკრატებმა" მიიღო გადაწყვეტილება, ელგუჯა ჩხაიძე პარტიიდან გაერიცხათ.
ელგუჯა ჩხაიძე: _ გადავწყვიტეთ შეგვექმნა ფრაქცია, სადაც გაწევრიანდებოდნენ "ნაცმოძრაობის" დეპუტატები, კახაბერ ასკურავა და გიორგი გოგუაძე. პარტიისთვის ეს გადაწყვეტილება მიუღებელი, რომ იქნებოდა, ვიცოდი, მაგრამ ლანჩხუთის მუნიციპალიტეტში შექმნილმა მდგომარეობამ მიმაღებინა ეს გადაწყვეტილება. საკრებულოში თითქმის აღარ არის ოპოზიცია და ასევე ბიუროში რაც უნდოდათ, იმას აკეთებდნენ.
_ ეს განმარტება იცოდნენ "თავისუფალ დემოკრატებში"?
_ იცოდნენ, რომ ფრაქციის შექმნას ვაპირებდი "ნაცმოძრაობის" წევრებთან. ისინი კი არ ეთანხმდებოდნენ ჩემს გადაწყვეტილებას. საკრებულო აღმოჩნდა მარტო კოალიციის ხელში. ისინი ღებულობენ რაიონის მოსახლეობისთვის მიუღებელ გადაწყვეტილებებს. მუნიციპალიტეტმა 12 თვის ბიუჟეტი გახარჯა 6 თვეში. დასამტკიცებლად შემოაქვთ დამატებით მიმდინარე წლისათვის 800 ათასი ლარი. შემოსავლების ნაწილი კი აბსურდულია.
გადავწყვიტე არჩევანი რაიონის სასარგებლოდ გამეკეთებინა და ფრაქცია შემექმნა, რომ ბიუროში ყოფილიყო განსხვავებული აზრი. ფრაქციის შექმნას ნაციონალებთან ერთად ვიცოდი, რაც მოყვებოდა პარტიის ხელმძვანელებიდან, გავირიცხე პარტიიდან. ბოდიში ყველა "თავისუფალ დემოკრატს", ვისაც გული ვატკინე. გამიგეთ ჩემს რაიონს ასე სჭირდებოდა .შინაგანად "თავისუფალ დემოკრატად" ვრჩები._ გვითხრა ელგუჯა ჩხაიძემ.
"ერთიანი ნაციონალური მოძრაობის" ლანჩხუთის რაიონული ორგანიზაციის თავმჯდომარე და საკრებულოს დეპუტატი, კახაბერ ასკურავა "თავისუფალი დემოკრატების" გადაწყვეტილებას ელგუჯა ჩხაიძის პარტიიდან გარიცხვის შესახებ სოციალურ ქსელში ეხმაურება.
“უბრალოდ არ მესმის "თავისუფალი დემოკრატების ეს გადაწყვეტილება. .საკრებულო არის ადგილობრივი თვითმმართველობა, ადგილობრივი პრობლემებით და ადგილობრივი ინტერესებით. თუ ალასანიას პარტია ოპოზიციაა, მაშინ მეორე ოპოზიციურ პარტიასთან რატომ არ უნდა შექმნას ფრაქცია ადგილობრივ-მუნიციპალურ დონეზე, მითუმეტეს, რომ ამას თვითმმართველობის კოდექსიც არ ზღუდავს. ძალიან დამწყვიტა გული ამ გადაწყვეტილებამ!" – წერს კახა ასკურავა.
"გურია ნიუსი" ვრცელ მასალას ამ საკითხთან დაკავშირებით ხვალ შემოგთავაზებთ.
