ლანჩხუთის მუნიციპალიტეტის საზოგადოებასთან ურთიერთობის სამსახურმა "გურია ნიუსს" განცხადებით მიმართა, რომელსაც უცვლელად გთავაზობთ.
"გურია ნიუსის" ვებგვერდზე გამოქვეყნდა სტატია სათაურით: "ახალი ფრაქციის იდეებისა და ხედვების პრეზენტაცია".
აღნიშნულთან დაკავშირებით გვინდა რამდენიმე განმარტება გავაკეთოთ.
ლანჩხუთის მუნიციპალიტეტის საკრებულოს რეგლამენტის 35-ე მუხლის მე-13 პუნქტის შესაბამისად, მოგვიანებით დაფუძნებული ფრაქციის რეგისტრაციისთვის აუცილებელია განცხადება, ფრაქციის წესდება და პლატფორმა გადაეცეს საკრებულოს სამანდატო, საპროცედურო და ეთიკის კომისიას. ამის შემდეგ აღნიშნული კომისია სამი დღის ვადაში განიხილავს ფრაქციის დაფუძნების შესაბამისობას საქართველოს ორგანული კანონის "ადგილობრივი თვითმმართველობის კოდექსის" 30-ე მუხლის მოთხოვნებთან და საკრებულოს ბიუროს წარუდგენს შესაბამის დასკვნას. ახალი ფრაქციის შექმნის საკითხი შეიტანება საკრებულოს უახლოესი სხდომის დღის წესრიგში და განიხილება რიგგარეშედ. საკრებულოს სამანდატო კომისიის დადებით დასკვნის შემთხვევაში, საკრებულო დასკვნას იღებს ცნობად კენჭისყრის გარეშე და ფრაქცია ითვლება რეგისტრირებულად.
სტატიაში ნახსენებმა ჯგუფმა ჯერჯერობით, კანონის მხოლოდ პირველი პუნქტი შეასრულა, ანუ განცხადებით მიმართა საკრებულოს სამანდატო, საპროცედურო და ეთიკის კომისიას და წარუდგინა ფრაქციის წესდება და პლატფორმა. შესაბამისად, ფრაქცია რეგისტრირებულად არ ითვლება.
რაც შეეხება ფრაქციის კანონიერებას, როგორც საკრებულოსა და გამგეობის იურისტები განგვიმარტავენ, აღნიშნული ფაქტი კანონთან შესაბამისობაში არაა.
შეგახსენებთ, რომ ფრაქციის არსებობისათვის აუცილებელია სამი წევრი. საკრებულოში არსებული ფრაქცია "თავისუფალი დემოკრატები" პირადი განცხადების საფუძველზე დატოვა ქალბატონმა ელისო ჭიჭინაძემ და ფრაქცია ორი წევრის ამარად დარჩა, რაც მისი დაშლის საფუძველიც გახდა.
რაც შეეხება ელგუჯა ჩხაიძეს, მას შემდეგ, რაც მან გააკეთა განცხადება "ნაციონალურ მოძრაობასთან" ერთად ფრაქციის შექმნაზე, გაირიცხა "თავისუფალი დემოკრატების" წევრობიდან და შესაბამისად, დარჩა უპარტიო.
"ადგილობრივი თვითმმართველობის კოდექსის" 30-ე მუხლის თანახმად, "არჩევნებში მონაწილე პარტიის წარდგენით არჩეულ უპარტიო მუნიციპალიტეტის საკრებულოს წევრს უფლება აქვს გაერთიანდეს ფრაქციაში მხოლოდ ამ პარტიის წევრებთან ერთად".
"თუ პარტიის წევრი გარიცხულია პარტიიდან, მაშინ მას არა აქვს უფლება შექმნას ფრაქცია. ასეთი ფრაქცია მხოლოდ მაშინ იქნება ლეგიტიმური, თუ გარიცხული პირი, ამ შემთხვევაში ელგუჯა ჩხაიძე გაერთიანდება "ნაციონალურ მოძრაობაში" – განმარტავენ იურისტები.
აქედან გამომდინარე, მიგვაჩნია, რომ ელგუჯა ჩხაიძის, კახა ასკურავასა და გია გოგუაძის მიერ ფრაქციის სახელით გამართული პრესკონფერენცია არასწორია.
რაც შეეხება საკრებულოს თავმჯდომარის ხელფასს, გვინდა განვმარტოთ, რომ საკრებულოს თავმჯდომარის ანაზღაურება ზუსტად იმდენივეა, რამდენიც მის წინამორბედებს ჰქონდა.
ლანჩხუთის მუნიციპალიტეტის საკრებულოს საზოგადოებასთან ურთიერთობის განყოფილება
