დღეს ქალაქ ოზურგეთის მუნიციპალიტეტის საკრებულოს სხდომა გაიმართა, რომელსაც ოზურგეთში, კოსტავას ქუჩის მცხოვრებლები დაესწრნენ და ე.წ. ზვანის უბანში არსებული პრობლემები ხელისუფლებას კიდევ ერთხელ შეახსენეს.
თინა ჯინჭარაძემ, ქეთინო ლომთათიძემ, სკუი ხუგასიანმა , ლამარა სალუქვაძემ საკრებულოს თავმჯდომარეს გელა კობალაძეს და ქალაქ ოზურგეთის მერს ბეგლარ სიორიძეს კოსტავას ქუჩაზე ჯებირების გაკეთება და მდინარე ნატანებზე ნაპირსამაგრი სამუშაოების ჩატარება მოთხოვეს.
"რამდენიმე წელია ვითხოვთ ნაპირსამაგრი სამუშაოების ჩატარებას, ყოველ გაწვიმებაზე მდინარე ნატანები დიდდება და საფრთხეს უქმნის თითოეულ ოჯახს. 2014 წლის 29 სექტემბრის სტიქიამ მთელი საკარმიდამო ნაკვეთები წაგვართვა. ისევ არის საშიშროება, რომ კვლავ ადიდდეს. შემოტანილი გვაქვს 32 კაცის ხელმოწერით განცხადება. რამდენჯერც მოვედით, ხან გვეუბნებიან გაკეთდებაო, ხან გვეუბნებიან ბიუჯეტში თანხა არ არისო.
გაგვეცით კონკრეტული პასუხი, როდის დაკმაყოფილდება ჩვენი მოთხოვნა. არც განათებაა ჩვენთან, ისეთი სიბნელეა, ხშირად ხდება ქურდობა. განათებას როდის გაგვიკეთებთ?"_ კითხულობენ ე.წ. ზვანში, კოსტავას ქუჩაზე მცხოვრებლები.
ლეილა სალუქვაძის თქმით, ადიდებულმა მდინარემ და ღვარცოფმა კარმიდამო წაართვა რამდენიმე ოჯახს.
"სარკინიგზო ხიდი ცუდ მდგომარეობაშია. რა მოხდა თბილიში თქვენ კარგად მოგეხსენებათ. შეიძლება ერთი სანტიმეტრის გამო უბედურება მოხდეს. სანამ უბედურება მოხდება, ძალიან გთხოვთ, მოგვაქციეთ ყურადღება! აქ ერთი წლის წინ თავდასხმა მოხდა, ოთხი ტყვია ესროლეს კაცს. ჩაბნელებულია ყველაფერი." – განაცხადა ლეილა სალუქვაძემ.
ქალაქ ოზურგეთის მერმა ბეგლარ სიორიძემ საკრებულოს თავმჯდომარეს გელა კობალაძეს მიმართა: "თუ ჩვენთან მოვლენ, გავცემთ პასუხს, ახლა თქვენ გეკითხებიან და თქვენ უპასუხეთ!"
"შემოვიდა კოლექტიური განცხადება, რომელიც შემდგომი რეაგირებისათვის ქალაქის მერიის შესაბამის სამსახურს გადაეცა. ვიცი რომ ჩატარდა მოკვლევა, იყო რეაგირება, არის შედგენილი პროექტი და ხარჯთაღრიცხვაც გაკეთებულია"_ აღნიშნა საკრებულოს თავმჯდომარემ.
მან მოსახლეობას კიდევ ერთხელ განუმარტა, რომ კანონით გათვალისწინებული წესის მიხედვით გააკეთებენ ყველაფერს.
"497 000 ლარის ღირებულების პროექტია გაკეთებული. უნდა გამოცხადდეს სამუშაოზე ტენდერი და შემდეგ გაკეთდება შემდეგ წლის ბოლომდე. ხუთშაბათს მერს ხუთშაბათს აქვს მიღება, მიბრძანდით და დეტალურ ინფორმაციას გაგაცნობთ" _განუცხადა საკრებულოს სხდოამზე მოსულ მოსახლეობას საკრებულოს თავმჯდომარემ.
ქალაქ ოზურგეთის მერმა ბეგლარ სიორიძემ კი კოსტავას ქუჩაზე მცხოვრებლებს მიმართა:
"მობრძანდით ქალაქის მერიაში და გაგარკვევთ ყველაფერში. გაეცნობით ყველაფერს საფუძვლიანად. არ არის საკრებულო ის ადგილი, სადაც თქვენ მიიღებთ პასუხს. ან ვინც მოგიყვანათ, იმან გაგცეთ პასუხი."
