სახელმწიფო რწმუნებულის გუბერნატორის გურიის მხარეში, გია სალუქვაძის ინიციატივით, გურიის სამხარეო ადმინისტრაციასთან არსებული სათათბირო ორგანო – საზოგადოებრივი საბჭო შეიქმნა.
სამხარეო ადმინისტრაციაში პირველი შეხვედრა გუბერნატორმა მოადგილესთან ერთად გამართა, რომელიც გაცნობითი ხასიათის იყო.
შეხვედრას საზოგადო მოღვაწეები, ინჟინრები, მედიის, კულტურისა და აგროსექტორის წარმომადგენლები დაესწრნენ, რომლებიც აღნიშნული საბჭოს შემადგენლობაში იქნებიან. საზოგადოებრივი საბჭო ყველა იმ პროფესიონალი, გამოცდილი და გამორჩეული წევრით დაკომპლექტდება, რომლებიც განსაკუთრებულად მოწადინებული არიან მშობლიური კუთხისათვის, ოზურგეთის მუნიციპალიტეტისათვის სხვადასხვა მიმართულებით.
მხარის პირველ პირთან ერთად სასიკეთო საქმეები აკეთონ. სათათბირო ორგანოს უპირველესი ფუნქცია იქნება გურიის გუბერნატორისთვის რეკომენდაციების შემუშავება შესაბამისი ტერიტორიის განვითარების, დაგეგმვისა და განხილვის პროცესში.
საზოგადოებრივ საბჭოს გია სალუქვაძე უხელმძღვანელებს. სათათბირო ორგანო ორ თვეში ერთხელ შეიკრიბება. გუბერნატორის გადაწყვეტილებით ანალოგიური საბჭოები ლანჩხუთსა და ჩოხატაურშიც შეიქმნება. აღნიშნული სათათბირო ორგანო საქართველოს მთავრობის 2013 წლის 29 ნოემბრის სახელმწიფო რწმუნებულის – გუბერნატორის დებულების დამტკიცების შესახებ # 308 დადგენილების მე-12 მუხლის შესაბამისად დაფუძნდა.
