ზაფხულის ცხელი სეზონის დადგომა ყველასთვის ჩემოდნების ჩალაგებასა და ხარჯთან არის დაკავშირებული. საზოგადოების გარკვეული ნაწილი დასასვენებლად წასვლას მთელი წლის მანძილზე გეგმავს და დასვენებისთვის საჭირო ფულს თვეების განმავლობაში აგროვებს, ზოგს კი, ჯერაც არ გადაუწყვეტია სად წავიდეს დასასვენებლად, ამიტომ საზოგადოების უმეტესი ნაწილი სხვადასხვა ტურისტულ სააგენტოებს რჩევისთვის მიმართავს.
"გურია ნიუსი" დაინტერესდა თუ სად ამჯობინებენ ქართველები, ქვეყანაში თუ მის ფარგლებს გარეთ დასასვენებლად წასვლას.
ამის გასარკვევად სხვადასხვა ტურისტულ სააგენტოებს დავუკავშირდით.
როგორც მათ მიერ მოწოდებული ინფორმაციით ირკვევა, საქართველოს ზღვისპირა კურორტებზე ფასები მაღალია, ამიტომ ქართველები დასასვენებლად საზღვარგარეთ მიდიან.
ხურგადა, ქემერი, ანტალია, შარმ-ელ შეიხი, ალანია – კურორტების ის ძირითადი ჩამონათვალია, სადაც ქართელები დასასვენებლად მიდიან.
"საქართველოდან დასასვენებლად თურქეთში, ეგვიპტესა და დუბაიში მიემგზავრებიან. კურორტებიდან უფრო შარმ-ელ-შეიხს, ქემერს და ანტალიას არჩევენ. ალბათ, იმიტომ, რომ უვიზო რეჟიმია და საქართველოში დასვენებაზე იაფი ჯდება", _ ამბობს "გურია ნიუსთან" საუბრისას GN TRAVEL-ის წარმომადგენელი.
როგორც "გურია ნიუსს" ტურისტულ კომპანია WORLD GATE TRAVEL-იდან აცნობეს, ქართველები ძირითადად ეგვიპტესა და თურქეთში მიემგზავრებიან, ხოლო საქართველოში დასვენების მსურველმა უცხოელებმა გაურკვეველი მიზეზების გამო ჯავშნები გააუქმეს.
"თუ გავითვალისწინებთ უვიზო რეჟიმს და შედარებით დაბალ ფასს, ეგვიპტის და თურქეთის მიმართულებით, კერძოდ, შარმ-ელ-შეიხსა და ანტალიაში, ასევე იტალიაშიც ძალიან ბევრს უნდა მოგზაურობა. რაც შეეხება ფასებს, გასულ წელთან შედარებით მომატებულია. თუმცა, დამატებითი გადასახადები ჩარტერულ რეისებს არ შეეხო. უფრო ევროპის მიმართულებით გაძვირდა დასასვენებლად წასვლა, რაც ავიაბილეთებისა და თვითონ სასტუმროების გაძვირებამ განაპირობა. რაც შეეხება ქვეყანაში ტურისტების შემოსვლას, 2013 წლიდან დღემდე ძალიან ბევრი ჯავშანი გააუქმეს. ტურისტები ძირითადად არაბეთიდან ჩამოდიან, რადგან საქართველოს კულტურა და ბუნება აინტერესებთ, ხოლო ევროპიდან საქართველოს ნაკლებად სტუმრობენ", _ ამბობენ WORLD GATE TRAVEL-ში.
კიდევ ერთი ტურისტული კომპანიის, LETS TRAVEL-ის ცნობით, თურქეთში დასასვენებლად წასვლა საქართველოს კურორტებში დასვენებაზე იაფი ჯდება.
"თურქეთში დასვენება საქართველოსა და სხვა ქვეყნებთან შედარებით იაფი ჯდება, ამიტომ ანტალიასა და ქემერში უფრო მიემგზავრებიან. გასულ წელთან შედარებით ცოტათი გაძვირდა დასვენება. ძირითადად, ყველა ელოდება სპეციალურ შეთავაზებას, რომლითაც დასასვენებლად წასვლა იაფდება", _ ამბობენ LETS TRAVEL-ში.
ტურისტული კომპანია WONDERLAND-ის ინფორმაციით, თურქეთში და ეგვიპტეში დასვენებას დაბალი ფასისა და უვიზო რეჟიმის გამო არჩევენ:
" – დაბალი ფასებისა და უვიზო რეჟიმის გამო, უფრო თურქეთსა და ეგვიპტეში მიემგზავრებიან. გასულ წელთან შედარებით დასასვენებლად წასვლის ღირებულება სხვადასხვა მიმართულებით გამგზავრების მსურველთათვის სხვადასხვა თანხით გაიზარდა."
კიდევ ერთი ტურისტული კომპანიის, FLY TRAVEL-ის ცნობით, წელს დასვენების ხარჯი მომატებულია. ხოლო საქართველოდან დასასვენებლად თურქეთსა და ეგვიპტეში მიემგზავრებიან.
"ქართველები დასასვენებლად თურქეთსა და ეგვიპტეში გამგზავრებას არჩევენ. თურქეთში უფრო ანტალიაში არჩევენ დასვენებას ასევე ქემერისა და ალანიის კურორტებზე, რაც შეეხება ეგვიპტეს შარმ-ელ- შეიხსა და ხურგადას ირჩევენ. სხვადასხვა ტურს შესაბამისად სხვადასხვა ფასი აქვს, რაც წელს მომატებულია, თუმცა ვცდილობთ დავარეგულიროთ", _ FLY TRAVEL.
აღსანიშნავია, რომ მასალის მომზადების პროცესში "გურია ნიუსმა" 22-მდე ტურისტულ სააგენტოსთან დაკავშირაება სცადა, თუმცა, საიტებზე მითითებული საკონტაქტო ნომრების უმრავლესობა გამორთულია ან არავინ პასუხობს.
