წლევანდელ სეზონზე ურეკში დამსვენებელთა რაოდენობამ შარშანდელთან შედარებით საგრძნობლად დაიკლო. ტურისტთა სიმცირე შესამჩნევია როგორც სანაპიროზე, ასევე, ცენტრსა და სასტუმროებში. სასტუმროების მეპატრონეები ვარაუდობენ, რომ ამ ზაფხულს კურორტს ბევრად ნაკლები დამსვენებელი ეყოლება, ვიდრე შარშან. ამის მიზეზად გასაქირავებელი ფართების მფლობელთა უმრავლესობა წვიმიან ამინდს ასახელებს, თუმცა, მიაჩნიათ, რომ ურეკს, როგორც კურორტს, უფრო მეტი ყურადღება სჭირდება.
სასტუმრო "თბილისის" მენეჯერი ლია ტიელიძე ჩვენთან საუბარში ამბობს, რომ კურორტზე მოსაწესრიგებელია ინფრასტრუქტურა, მიწისქვეშა კომუნიკაციები, წყალგაყვანილობა.
"აქ არ არის გაზი, დენი, წყალი, გზა, კანალიზაცია, რაც ჩვენთვის, სასტუმროს მეპატრონეებისთვის, ყველაზე მნიშვნელოვანია", _ ამბობს ლია ტიელიძე.
კურორტზე მოუწესრიგებელი ინფრასტრუქტურა რკინიგზის სადგურიდანვე შესამჩნევია _ გაფუჭებულია გზის საფარი, არ არსებობს ტროტუარი, სანაპირო ზოლთან კი ასფალტი ქვიშით იმდენად არის დაფარული, რომ მისი დანახვა თითქმის შეუძლებელია.
აღსანიშნავია, რომ კურორტზე არ ფუნქციონირებს არც ერთი ბანკი და მოგიხდებათ მხოლოდ "პროკრედიტბანკის" ერთი ბანკომატით ისარგებლოთ.
ტურისტთა რაოდენობის შემცირების ერთ-ერთ მიზეზად ქვეყანაში არსებული ეკონომიკური ვითარებაც სახელდება. სასტუმროების მეპატრონეების ცნობით, შარშან დამსვენებელთა უმრავლესობა ქართველი იყო, რაც მანამდე არ დაფიქსირებულა, წელს კი მათი რაოდენობა კიდევ უფრო შემცირებულია.
მიუხედავად ამ ყველაფრისა, ურეკში დასვენება მაინც ძვირია _ გასაქირავებელი ოთახების საშუალო ღირებულება (ერთ კაცზე) სეზონის დასაწყისში დღეში 10 ლარია, შუა სეზონში კი ფასი იმატებს.
ქვეყნის უნიკალური კურორტი ბედის ანაბარაა მიტოვებული და გამოდარებას ელოდება.
ჩვენ გარემოს ეროვნულ სააგენტოსაც დავუკავშირდით, სადაც გვითხრეს, რომ მომდევნო ერთი კვირის განმავლობაში კვლავ ცვალებადი ამინდია მოსალოდნელი. სინოპტიკოსები უახლოეს დღეებშიც ხანმოკლე წვიმას და ტემპერატურის დაკლებას პროგნოზირებენ, უახლოეს პერიოდში სრული გამოდარება არ არის ნავარაუდევი.
