ქუთაისის მე-2 სასჯელაღსრულების დაწესებულებაში მსჯავრდებულები შიმშილობენ.
მარტვილის რაიონის სოფელ ბანძის პოლიციის თანამშრომლების ცემაში მსჯავრდებული 5 პირი პროტესტის უკიდურეს ფორმას უკვე მეორედ მიმართავს.
ამის შესახებ ამავე საქმეში მსჯავრდებულმა მაია კეკელიამ "გურია ნიუსს" აცნობა.
კეკელიას თქმით, მსჯავრდებულები უკანონო სასჯელს აპროტესტებენ და ითხოვენ, საქმე პროკურატურამ გამოიძიოს. მსჯავრდებულები ამ დრომდე თავს უდანაშაულოდ ცნობენ.
ინფორმაციის გადასამოწმებლად "გურია ნიუსი" სასჯელაღსრულების და პრობაციის სამინისტროს პრესსამსახურს დაუკავშირდა, სადაც აცხადებენ, რომ მსჯავრდებულებმა შიმშილობა გუშინ დაიწყეს.
"შიმშილობის მიზეზად ასახელებენ სასამართლოს მიერ გამოტანილ განაჩენს, თავს უდანაშაულოდ მიიჩნევენ. მათი მოთხოვნების დაკმაყოფილება სასჯელაღსრულებისა და პრობაციის სამინისტროს კომპეტენციის ფარგლებს სცილდება", _ აღნიშნავენ სამინისტროში
რაც შეეხება მოშიმშილე პატიმრების ჯანმრთელობის მდგომარეობას, როგორც უწყებაში განმარტავენ, "დაწესებულების სამედიცინო პერსონალი მუდმივ მეთვალყურეობას უწევს მოშიმშილეებს და მათი ჯანმრთელობის მდგომარეობა სტაბილურია".
შეგახსენებთ, პოლიციელების ცემაში მსჯავრდებულების შესახებ "გურია ნიუსი" არაერთხელ წერდა.
საქმე ეხება 2014 წლის 16 ოქტომბერს, მარტვილის რაიონის სოფელ ბანძის პოლიციის შენობიდან დაკავებული მამაკაცის, თემურ გაბუნიას გაქცევას.
ოფიციალური ინფორმაციით, დაკავებულმა შენობიდან გაქცევა ნათესავების დახმარებით შეძლო, რომლებიც განყოფილებაში მივიდნენ, პოლიციის თანამშრომლებს თავს დაესხნენ და მათ როგორც სიტყვიერი, ასევე ფიზიკური შეურაცხყოფა მიაყენეს. თუმცა, პოლიციელებისგან რადიკალურად განსხვავებულ ვერსიაზე საუბრობენ საქმეში ბრალდებული პირები. მათი თქმით, პოლიციელებმა სიტყვიერი შეურაცხყოფა იქეთ მიაყენეს. თუმცა, 2015 წლის 10 ივნისს, ზუგდიდის სასამართლოს მოსამართლე ნატრული აკობიამ საქმეში ბრალდებული პირები დამნაშავედ ცნო.
5 პირს პატიმრობა, ორ ქალბატონს კი ჯარიმა შეუფარდა.
როგორც კეკელია "გურია ნიუსთან" საუბრისას განმარტავს, შინაგან საქმეთა სამინისტროს გენერალურ ინსპექციას და მთავარ პროკურატურას საქმის ხელახალი გამოძიების მოთხოვნით უკვე მიმართა, თუმცა, მისი თქმით, არცერთ უწყებას ამ საკითხზე რეაგირება არ მოუხდენია.
"უკვე რამდენი ხანია ვითხოვთ, რომ ამ სისხლის სამართლის საქმეზე სამართალდამცველების მიერ ჩადენილ უკანონობებზე გამოძიება გენერალური ინსპექციის მიერ უნდა მოხდეს. კერძოს, ვითხოვთ, პოლიციელების მიერ სამსახურეობრივი გადაცდომის და დოკუმენტების გაყალბების ფაქტზე საქმისწარმოების დაწყებას. გამოძიება ადვილად დაადგენს, რომ სასამართლოში მოწმის სახით დაკითხვისას ცრუ ჩვენება მისცეს პოლიციის თანამშრომლებმა. საქმეში მსჯავრდებული პირები კი სასჯელს უკანონოდ იხდიან", _ აცხადებს კეკელია.
ამავე თემაზე:
პოლიციელების ცემაში ბრალდებული ქალის ღია წერილი
როგორ გაიქცა დაკავებული – ნასვამი პოლიციელების წინდაუხედაობით თუ ნათესავების "ამბოხით"
"შვიდ ადამიანს შვიდი წლით თავისუფლების აღკვეთისთვის გვწირავენ"
რა განაჩენი გამოუტანა პოლიციელების ცემაში ბრალდებულებს სასამართლომ
"7 თვეა უსამართლოდ ვზივარ ციხეში, ამიტომ სიმართლის დასამტკიცებლად ბოლომდე ვიბრძოლებ"
პატრულის ცემისთვის ქალბატონებს მოსამართლემ განაჩენი გამოუტანა (ვიდეო)
