ქალაქ ოზურგეთში გურიის ქუჩაზე, ე.წ. "ძველი ბაზრის" მიმდებარე ტერიტორიაზე, ოზურგეთის მუნიციპალიტეტის მერიამ ასწლოვანი ჭადრების მოჭრა გადაწყვიტა.
აღნიშნულ ფაქტს ზედამხედველობას დილის 7 საათიდან ქალაქ ოზურგეთის ა(ა)ი.პ. "ოზურგეთის სერვისცენტრის" ხელმძღვანელი ვლადიმერ სალუქვაძე და მერიის ზედამხედველობის განყოფილების უფროსი შუქრი გაბრიჩიძე უწევდნენ.
აღნიშნულმა ფაქტმა მოქალეებისა და ბაზრის მოვაჭრეებს შორის შეშფოთება გამოიწვია. მათ მიაჩნიათ, რომ აღნიშნული საკითხით კომპეტენტური ორგანოები უნდა დაინტერესდნენ.
"განადგურებაზე არიან გადასული, ცოტა ხანში ჰაერიც აღარ გვექნება. აქ დგომაც და სუნთქვაც აგვეკრძალება. ისე გვეცოდება ეს ხეები რომ ჭრიან, გული ძალიან გვტკივა, ძალიან შეწუხებულები ვართ. ბაზრიდან სახლში წასულები, დაღლილები, დასიცხულები იმ ჭადრების ქვეშ ვისვენებდით, რატომ, რისთვის? იმის გამო ფასადები შეღებენონ? ამის ხარჯზე ასწლოვან ხეებს ჭირიან, ეს სად გაგონილა? ვინ დარგავს აწი რამეს? ჩვენს შვილებს, შვილიშვილებს ისტორიას ართმევენ"_ ამბობდნენ ბაზრის ტერიტორიაზე დილიდან შეკრებილი მოვაჭრეები.
ქეთინო თალაკვაძე: "სხვა ყველაფერი 100 % გაკეთებული, ახლა ფასადები დარჩათ. ან რა მნიშვნელობა აქვს ჩვენს თქმას, ვინმე ითვალსიწინებს მოსახლეობის აზრს?"
სულიკო ტრაპაიძე: "დაგვეხმარეთ, თუ შეგიძლიათ. "
ოზურგეთის მუნიციპალიტეტის საკრებულოს დეპუტატი გოჩა ძიმისტარაშვილი, "გურია ნიუსთან" ამბობს, რომ ქალაქ ოზურგეთის მერია ბიუჯეტის ფულს კერძო საკუთრების ფასადების შეღებვაში ხარჯავს.
"მერმა გადაწყვიტა ძველი ბაზრის ტერიტორიაზე მაღაზიების ვითომდა ფასადების მოწესრიგება, რაშიც ბიუჯეტის, ხალხის ფულს ხარჯავს. ისმის კითხვა, მაშინ როცა ხალხი მშიერია, რა ფასადის გალამაზებაზეა საუბარი, მაშინ, როცა გასაკეთებელია აუცილებელი ინფრასტრუქტურული პროექტები- გზა, წყალი და ასე შემდეგ. უფრო მეტიც, ეს შენობები, რომლებსაც ბატონი ბეგლარ სიორიძე ალამაზებს არის კერძო საკუთრება, ე.ი. გამოდის, რომ სახელმწიფო ფული ხმარდება კერძო პირებს" _ამბობს საკრებულოს დეპუტატი და ბაზრის ტრეტორიაზე მიმდინარე ინფრასტრუქტურული სამუშაოების განხორცილების შესახებ განმარტავს: “ერთი თვის წინ საკრებულოს სხდომაზე გამოიტანეს საკითხი, სადაც აღნიშნული იყო, რომ ბაზრის ტერიტორიაზე 200 – 200 კვადრატული მიწის ნაკვეთები იყო ცალ-ცალკე რეგისტრირებული, მაშინ ქალაქის მერიამ საკითხი დააყენა ასე: _ გაეერთიანებინათ ეს მიწის ნაკვეთები, ვითომდა უფრო ადვილია სამართავადო. 4000 კვადრატული გააერთიანეს და მერე გასცეს 35 და 20 წლიანი იჯარებით, ეს იყო მიზანი, სხვა არაფერი “ _ ამბობს ძიმისტრაშვილი
ქალაქ ოზურგეთის მუნიციპალიტეტის საკრებულოს დეპუტატი თამარ ნადირიძე მიიჩნევს, რომ ასწლოვანი ჭადრების მოჭრამ ოზურგეთში უკვე მასიური სახე მიიღო და ეს ხდება მოსახლეობის აზრის გათვალისწინების გარეშე.
"პირველ რიგში ეს მოსახლეობასთან უნდა შეთანხმებულიყო , რა თქმა უნდა, მერი ერთპიროვნულად იღებს გადაწყვეტილებებს საკრებულოსთან ერთად, რადგან საკრებულოს ისედაც მისი გავლენის ქვეშ არის მოქცეული. ასწლიანი ჭადრები მარტო ჭადრები არ არის, მას გარკვეული ისტორიული დატვირთვაც აქვს ოზურგეთელებისთვის.
ჭადრების ხეივანი ოზურგეთის ისტორიაა, შეიძლება ინფრასტრუქტურული პროექტების განხორციელებისთვის მოჭრა ხეები, მაგარმ ამას აქვს მასიური სახე და ეს არის დაუდევრობა. დარწმუნებული ვარ ქალაქ ოზურგეთს ხელისუფლებაში ჰყავს ბარბაროსები, რომლებიც საკუთარ ქვეყანას აოხრებენ"– ამბობს ნადირიძე.
ტექნიკის მეცნიერებათა დოქტორი თემურ რევიშვილი "გურია ნიუსთან" ამბობს, რომ აღნიშნული ფაქტი შესაბამისი სამსახურების მიერ უნდა შეფასდეს.
"არსებობს სატყეო დეპარტამენტი და გარემოს დაცვის სამსახური. ისე ხეების მოჭრა ვერ მოხდება თუ ამ სამსახურებთან არ იქნება შეთანხმებული. თუ რეგლამენტი და შესაბამისი კანონმდებლობა დაცულია, მაშინ ჩვენ რას გავაკეთებთ? ასეთი ქმედება უნდა იყოს შეთანხმებული შესაბამის უფლებამოსილ სამსახურებთან, მათ მიზანშეწონილობაზე დასკვნა უნდა ჰქონდეთ გაცემული"_ამბობს რევიშვილი.
ასოციაცია "ლკანას" გურიის კოორდინატორს ჯაბა ჭეიშვილს მიაჩნია, რომ ქალაქში ხეები, პირიქით, უნდა დაირგოს.
"ქალაქში ხეების მოჭრა ძალიან დიდი პრობლემაა. თუ ხეებს ძირი გამოპალი აქვს და დაზიანებულია, მაშინ უნდა მოიჭრას. მე ვერ გეტყვით რამდენად კანონიერად ხდება ჭადრების მოჭრა, მაგრამ მიმაჩნია, კი არ უნდა მოჭრან, პირიქით უნდა დარგონ"_ ამბობს ჭეიშვილი.
გარემოს დაცვითი ზედამხედველობის დეპარტამენტის დასავლეთ ცენტრალური სამმართველოს გურიის სწრაფი რეაგირების განყოფილების უფროსი ემზარ ვაშალომიძე აცხადებს, რომ აღნიშნულ ფაქტთან დაკავშირებით საქმის კურსში არავის ჩაუყენებია.
"დღეს განხორციელდა ჭრები? არ ვიცი, ვერ გეტყვით, არ ვარ საქმის კურსში, რადგან დილიდან ლანჩუთში ვართ სასამართლო პროცესებზე, თუმცა ამასთან დაკავშირებით საქმის კურში არავის ჩაუყენებივარ. ჩვენთვის არავის მოუმართავს. ალბათ იქნება შესაბამისი სამსახურიდან ნებართვა გაცემული, როცა ჩამოვალ ოზურგეთში გადავამოწმებ ყველა ინფორმაციას და გადმოგცემთ" _გვითხრა ვაშალომიძემ.
ქალაქ ოზურგეთის მერიის პოზია აღნიშნულთან დაკავშირებით ასეთია:
“გურიის ქუჩის იერ-სახის რეაბილიტაციის ერთ-ერთი შემადგენელი ნაწილია გარე-ფასადის მოწესრიგება. ქუჩაზე მდებარე სავაჭრო ობიექტებს უკეთდება ვიტრაჟიანი კედლები, რომელშიც კერძო მესაკუთრეების თანადაფინანსება 30% იქნება.
"რაც შეეხება ხეების მოჭრის საკითხს, ჭადრები, რომელიც ამ ქუჩაზე დგას, სრულიად ამორტიზებულია. დაზიანებულია როგორც ხეების ტანი, ისე ფესვები. აღნიშნული ხეების ჭრა არ უკავშირდება მხოლოდ რეაბილიტაციის მიმდინარე პროცესს. ჭადრები, ყველა შემთხვევაში, მოსაჭრელი გახლდათ, რადგან ის საფრთხეს უქმნის, როგორც იქვე მდებარე ინფრასტრუქტურას, ასევე, ადამიანების სიცოცხლეს. ქალაქის მერიას შემოდგომაზე დაგეგმილი აქვს მწვანე საფარის განახლება და ყველა იმ ქუჩაზე, სადაც ჭრა განხორციელდა, სხვადასხვა ჯიშის ხე-მცენარე დაირგვება."
რაც შეეხება იმას, განახორციელა თუ არა ქალაქ ოზურგეთის მერიამ, ჭადრების ჭრა კანონიერად და არსებობს თუ არა შესაბამისი სამსახურებიდან გაცემული ნებართვა, მერიის ზედამხედველობის განყოფილების უფროსი შუქრი გაბრიჩიძე გვპასუხობს:
"მაგ კანონმდებლობას კარგად ვიცნობ. ჭადრები, რომელიც არის სკვერებში, ქალაქის ტერიტორიაზე, არის თვითმმართველობის ქონება და სატყეოს ამასთან არანაირი კავშირი არ აქვს."
