კომუნალური ვაუჩერი, რომელსაც თბილისში მცხოვრები მოსახლეობა იღებდა, შესაძლოა გაუქმდეს.
ამის შესახებ ინფორმაციას საკრებულოს ფრაქცია "ნაციონალური მოძრაობა" ავრცელებს, თუმცა, მერიაში აცხადებენ, რომ საკითხზე მსჯელობა ჯერ არ დასრულებულა და მოსახლეობის საწინააღმდეგო გადაწყვეტილებას არ მიიღებენ.
საკრებულოს ფრაქცია "ნაციონალური მოძრაობის" წარმომადგენელი ირაკლი აბესაძე კი აცხადებს, რომ "თბილისის მერის სოციალური მავნებლობა უფრო მეტ ძალას იძენს".
"დღეს მისი გადაწყვეტილებით, თბილისის მთავრობის სხდომაზე მიიღება გადაწყვეტილება, რომ კომუნალური ვაუჩერი, რომლითაც თბილისში 385 ათასზე მეტი ოჯახი სარგებლობდა, მხოლოდ იმ ოჯახებს შეუნარჩუნდებათ, რომლებსაც გააჩნიათ სარეიტინგო ქულა და მათ 70 000 ქულამდე აქვთ მინიჭებული.
გვინდა თბილისის მერს შევახსენოთ, რომ კომუნალური ვაუჩერი ფაქტიურად საარსებო წყარო იყო იმ ღატაკი და ღარიბი ოჯახებისთვის, რომლებიც ასეთად აღიარა სახელმწიფომ, უბრალოდ მათ 70 000 ზე მეტი ქულა აქვთ და ასეთი თბილისში 56 000 ზე მეტი ოჯახია, 180 000-ზე მეტი ადამიანი, რომ არაფერი ვთქვათ იმ ადამიანებზე, რომლებიც ბაზაში არ არიან რეგისტრირებულნი, თუმცა ეს მათთვის მნიშვნელოვანი სოციალური შემწეობა იყო. თბილისის მთავრობის სხდომაზე თბილისის მერი იღებს გადაწყვეტილებას მისი ქვემდებარე ორგანიზაციებისთვის ახალ–ახალი სახელფასო დანამატების დაწესების შესახებ, ასე რომ თბილისის მერი და ქართული ოცნება ვერ ახერხებს საკუთარ კეთილდღეობაზე, ჩინოვნიკების კეთილდღეობაზე ზრუნვის შეწყვეტას და თანხების დაზოგვას აგრძელებს ყველაზე მეტად სოციალურად გაჭირვებულ ოჯახებზე. ეს იმ ფონზე, როცა სექტემბრიდან კომუნალური გადასახადების გაზრდაა მოსალოდნელი, ყოველივე ეს ადამიანებს ნოემბერსა და დეკემბერში ძალიან მძიმე მდგომარეობაში ჩააგდებს. როგორც ჩანს, თბილისის მერს მისივე ამომრჩეველი გამოაგდებს კაბინეტიდან ამ სოციალურად მავნებლური გადაწყვეტილების გამო", _ აცხადებს აბესაძე.
აბესაძის ამ განცხადებას დღესვე გამოეხმაურა თბილისის მერიის ჯანდაცვისა და სოციალური მომსახურების სამსახურის უფროსი გელა ჩივიაშვილი, რომელმაც განაცხადა, რომ მისთვის გაუგებარია თუ რატომ გახდა ეს თემა სპეკულირების საგანი, როდესაც რეალურად, ამ წლების განმავლობაში მხოლოდ და მხოლოდ 70 ათას ქულამდე მყოფი მოქალაქეები იღებდნენ დახმარებას.
" 2015 წლის იანვრიდან, 70 ათას ქულამდე მყოფი მოსახლეობის სოციალური დახმარება გაორმაგდა 250 ლარიდან 500 ლარამდე. ხოლო ყველა დანარჩენ მოქალაქეებზე ხორციელდებოდა ადმინისტრირების წესით თანხის გაცემა. რაც შეეხება ახალ წესს, როგორც ბიუჯეტში იყო გაცხადებული, მიმდინარეობს ამაზე მუშაობა.
რეალურად, ამ წლების განმავლობაში მხოლოდ და მხოლოდ 70 ათას ქულამდე მყოფი მოქალაქეები იღებდნენ დახმარებას და რატომღაც ასე აქტიურად არ ხდებოდა ამის გამოთქმა ამ პრეტენზიის. ახლა გაახსენდათ, რომ თურმე არსებობს გარდა 70 ათას ქულამდე მყოფი სხვა ადამიანებიც თბილისში. აქედან გამომდინარე, ჯერჯერობით ამ თემაზე მანიპულირება ნამდვილად არ ღირს. თუმცა, ჩვენი ხელისუფლების პირობებში ნამდვილადა გავაკეთებთ იმას, რომ ბიზნესმენები და მინისტრები ამ კონმუნალური ვაუჩერის დახმარებას აღარ მიიღებენ", _ ამბობს ჩივიაშვილი.
მისივე თქმით, მიმდინარეობს მუშაობა და ეს პროგრამა მაქსიმალურად მიზნობრივი და მოწყვლად ჯგუფებზე ორიენტირებული გახდეს, რათა დახმარება არ მიიღონ მათ, ვისაც ეს არ ეკუთვნით.
"ეს ცვლილება იმის გამო გახდა საჭირო, რომ არსებობენ ადამიანები, რომლებსაც ერიცხებოდათ ეს დახმარება თუმცა, მათ არსც კი იცოდნენ ამის შესახებ. ისინი ათასობით კილოვატს ხარჯავდნენ თვის განმავლობაში და ერიცხებოდათ 8 ლარი და 45 თეთრი დავალიანება. უბრალოდ, არალოგიკური იქნება, ახლა მე გვარ-სახელები ვთქვა.
მოწყვლადი ჯგუფები რომ არ დაზარალდნენ ამიტომ მიმდინარეობს ცვლილება რისი გადაწყვეტილებაც უახლოეს მომავალში გახდება ცნობილი", _ აღნიშნა ჩივიაშვილმა და დასძინა, რომ თბილისის მთავრობის სხდომებზე ამ საკითხზე მსჯელობა მუდმივად მიმდინარეობს.
