ოზურგეთის მუნიციპალიტეტის ოთხი ტერიტორიული ერთეულის _ ნასაკირალის, ლაითურის, ბოხვაურისა და ლიხაურის რწმუნებულები ორი თვის წინ გაათავისუფლეს. როგორც წყარო ამტკიცებს, გათავისუფლების მიზეზი მათ სოფელში არჩევნებში მოგების ნაკლები შანსი იყო. სამი ტერიტორიული ერთეულის რწმუნებულები მალევე დაინიშნენ, ლიხაურის რწმუნებულის პოსტი კი ჯერ კიდევ ვაკანტურია. როგორც იქაურები ამბობენ, სოფლის რწმუნებული, დავით ცეცხლაძე იმიტომ გაათავისუფლეს, რომ პირდაპირ მოთხოვეს არჩევნებზე 75 პროცენტი ხმის მიტანა: “ეს ალალი ბიჭია _ პირდაპირ უთქვამს, ვერ შევძლებ, 5 პროცენტის იმედიც კი არ მაქვსო. მაშინ წადიო და გაუშვეს. დაასაქმეს სადღაც სპორტის განვითარების ცენტრში, თუმცა, ისიც დროებითიაო, _ ამბობენ. ორი თვე გავიდა და სოფელში რწმუნებული რომ დანიშნონ, კადრი ვერ ნახეს, არავის არ უნდა ეს თანამდებობა, მით უფრო, რომ რწმუნებულებს გაეზარდათ ხელფასები. აქ მთელი სოფელი ოპოზიციაშია”, _ გვითხრეს ლიხაურელებმა.
ოზურგეთის მუნიციპალიტეტის სოფელი ლიხაური უდიდესი ტრადიციის მქონე სოფელია, რომელიც პოლიტიკური მრავალფეროვნებითაც გამოირჩევა. ლიხაურელები უმთავრეს პრობლემად უგზოობა ასახელებენ და “გურია ნიუსთან” სოფელში არსებულ სიტუაციაზე ღიად და თამამად საუბრობენ: “გურია ნიუსი” სიმართლის მთქმელი გაზეთია გურიაში და როგორც ვიცით, ამის გამო პრობლემებიც გექმნებათ”, _ ამბობენ ლიხაურელები.
ერთ-ერთი ლიხაურელი პენსიონერი ამბობს, რომ ძალიან უჭირს, მაგრამ ამაში თავის თავს და ხალხს ადანაშაულებს: _ როგორც მეკადრება, ისე ვცხოვრობ; როგორი ხალხიც ვართ, ისეთი მთავრობა გვყავს _ უკეთესი არ გვეკუთვნის! ადრე ჩაის კულტურით ვცხოვრობდით, ერთი ცალი ტყემალი არ გვეკარგებოდა. ერთი წვენების ქარხანა ამხელა რეგიონში არ უნდა არსებობდეს? დღეს ერთადერთი საფიქრალია, ხვალ რა ვჭამოთ. საიდან დავიწყო პრობლემებზე საუბარი? პრობლემაა ყველაფერი. პირველ რიგში, გზა არაა და კვალი. პატრონი არ ჰყავს ამ სოფელს, არაფერი არ აქვს. თქვენ ოზურგეთელი ხომ ბრძანდებით? ჰგავს რაიმე გაკეთებულს? რწმუნებულიც კი არ ჰყავს სოფელს, წამდაუწუმ ხსნიან და ვის ნიშნავენ, ვერაფერს გაიგებ.
_ რწმუნებული რატომ მოხსნეს?
_ ვერ გავიმარჯვებ არჩევნებშიო, უთქვამს და ამიტომ მოხსნეს, თურმე. ისეთი სიტუაციაა შექმნილი, რომ ჩემი სიტყვით სხვას გავუფუჭებ საქმეს, ვინმე თუ დასაქმებული არის შენიანი, დამთავრებულია იმისი საქმე. ოჯახის წევრი მუშაობს და ამიტომ არ მინდა სახელის და გვარის დაფიქსირება.
_ ლიხაურის რწმუნებულს დაუძახეს გამგეობაში და უთხრეს, 75 პროცენტი ხმების უნდა მოიტანოო. ამას უთქვამს, 5 პროცენტის გარანტიასაც ვერ მოგცემთო. მეორე დღესვე დააწერინეს განცხადება. ლიხაურს უდიდესი ტრადიციები აქვს _ აქ ცხოვრობდნენ განათლებული და გამოჩენილი ადამიანები. აქაურთა მოტყუება ძალიან ძნელია _ შეიძლება არ ჰქონდეთ კლასიკური განათლება, მაგრამ შავს თეთრისგან ადვილად არჩევენ და ქვეყანა რომ დაღუპვის პირასაა მისული, ხედავენ. მილიონნახევარი ადამიანი წასულია ქვეყნის გარეთ და სამშობლო ენატრებათ. სამშობლოში ვერ ჩამოდიან შიმშილის შიშით.
ლიხაურში ვერც ერთ არჩევნებს ვერ მოიგებს ხელისუფლება. ჯიბრში უდგანან ხალხს. 1936 წელს საქართველოში პირველად ლიხაური განათდა. ამ სოფელში ცივილიზებული ხალხი ცხოვრობს, აზროვნებს. არჩევნები რომ ჩატარდება, მერე ვინ რას აყალბებს და რას შვრებიან, ხალხმა რა იცის? გზაზე რომ ყუთებს ცვლიან, ეგ კი ყველამ იცის. რა ქნან ლიხაურელებმა? იმის გამო, რომ სოფელში უმეტესობა ოპოზიციურად არის განწყობილი, აქ არაფერი არ უნდა გაკეთდეს?! _ ამბობს ერთ-ერთი ლიხაურელი, რომელიც გვთხოვს, რომ ოჯახის უსაფრთხოების მიზნით, მისი სახელი და გვარი არ გავამჟღავნოთ.
_ რამდენი ხანია, უკვე ეხვეწებიან ხან ერთს, ხან მეორეს, ხან მესამეს, რწმუნებულად დაგნიშნავთო და თანხმობა ვერ მიიღეს. რაც არ უნდა დიდი ხელფასი მისცენ რწმუნებულს, მაინც ვერ იმუშავებს აქ. უწესიერესი კაცი იყო დავით ცეცხლაძე, ერთ-ერთი მართალი და უპატიოსნესი, სოფელი გადაირია, მაგი რომ გაუშვეს, მაგრამ ასეთები ალბათ არ სჭირდებათ, _ გვეუბნება ჩვენი რესპონდენტი და მოგვმართავს: _ რატომ არ ინტერესდებით იმით, რომ უდანაშაულო ადამიანებს იჭერენ და ტყუილად ასამართლებენ? 2010 წლის ოქტომბრის ბოლოს, შეამოწმეს სატყეო მეურნეობა და ნახეს, ტყე გაჩეხილი იყო. დაიჭირეს, ალბათ, 8 კაცი. მაგრამ მოუსწროთ ზამთარმა და ვეღარ გაგრძელდა ტყის შემოწმება. იანვრის დასაწყისში ეს ხალხი დაიჭირეს, პატიმრობაში იყვნენ იანვარი, თებერვალი, მარტი, აპრილი. მაისში განაგრძეს შემოწმება და აღმოჩნდა კიდევ წინა დროს გაჩეხილი ხეები, იმ დროს კი ისინი უკვე პატიმრობაში იმყოფებოდნენ. როგორ გაჩეხდნენ? გამოდის რომ პატიმრებმა გაჩეხეს ტყე. მიმართეთ ოზურგეთის რაიონული სასამართლოს თავმჯდომარეს _ მისი აქ ყოფნის დროს, ამ შვიდი წლის განმავლობაში, რამდენი გამამართლებელი განაჩენი დადგა? არც ერთი გამამართლებელი განაჩენი არ გამოუტანიათ და არც ერთი კვალიფიკაცია არ არის შეცვლილი _ პროკურორს ყველა შუამდგომლობა დაუკმაყოფილეს (ოზურგეთის რაიონული სასამართლოდან, ასევე იუსტიციის სამინისტროდან, ჩვენ უკვე გვაქვს გამოთხოვილი ეს ინფორმაცია. თუმცა, სასამართლომ მოითხოვა დაზუსტება, რას სახის ინფორმაცია გვაინტერესებდა _ ნაწილობრივ გამამართლებელ განაჩენთა თუ მთლიანად გამამართლებელ განაჩენთა რაოდენობა. ჩვენ უკვე გავუგზავნეთ შესაბამისი პასუხი და სასამართლოდან ამ დღეებში ველოდებით ოფიციალურ დოკუმენტს, რის შესახებაც ვრცელ მასალას ჩვენი გაზეთის უახლოეს ნომერში შემოგთავაზებთ. რედ.). არ მითხრათ, ახლა ისე მუშაობს პროკურატურა და პოლიცია, რომ ერთი კვალიფიკაციაც არ შეეშალა შვიდი წლის განმავლობაში! კაცისმკვლელებსა და ყაჩაღებს უფარდებენ საპროცესოს, უპატრონოს, ნაკლებ დანაშაულის ჩამდენს კი ციხეში ალპობენ. ასეთი სამართალია ოზურგეთში და ამ უსამართლობამ შეაზიზღა ეს ხელისუფლება ხალხს, _ გვითხრა ერთმა ლიხაურელმა.
_ როგორ ვცხოვრობ და ვითქვამ სულს, მეტი არაფერი. თავს პენსიით ვირჩენ. ახლა შეშას ვეძებ, იმიტომ ვარ ვარ გამოსული გარეთ, _ გვითხრა პენსიონერმა დ. გობრონიძემ.
ც. თოიძე: _ სოფელში რაღაც კი კეთდება, მოსაცდელები გააკეთეს. თუმცა, სოფელს არაფერი აქვს შემოსავალი. ადრე ჩაი იყო ჩვენი მარჩენალი, ციტრუსი წელს ნახევარს არ გაუყიდია.
მ. გრიგოლია: _ ლიხაურს ასეთი გზა ნამდვილად არ ეკუთვნის. ყველაზე დიდი პრობლემა უგზოობაა. ხალხს ძალიან უჭირს _ გასულ წელს ყანა ვერ დათესა მოსახლეობის უმრავლესობამ.
_ ლიხაურში წინა არჩევნები რამდენიმე ხმით ძლივს მოიგო ხელისუფლებამ _ იძულება დააყენეს მოხუცებულებს, რომ ხმა მიეცა. ოპოზიციონერები უფრო მეტი იყვნენ, ვიდრე “ნაციონალები”, თუმცა, რა მოხდა, სიმართლე მაგათ გარდა, არავინ იცის, _ ამბობს ერთ-ერთი ლიხაურელი.
ლიხაურის ყოფილი რწმუნებული, “გურია ნიუსთან” საუბარში გათავისუფლების შესახებ გავრცელებულ ინფორმაციას უარყოფს და ამბობს, რომ განცხადება თანამდებობიდან წასვლის შესახებ ჯანმრთელობის მდგომარეობის გამო დაწერა: _ განცხადება ჩემი სურვილით დავწერე 7 დეკემბერს. არ ვარ ჯანმრთელად, ოპერაცია მაქვს გასაკეთებელი.
_ ამ ინფორმაციასაც უარყოფთ, რომ დაგიბარეს ოზურგეთში გამგებელთან, სადაც გითხრეს, რომ არჩევნებზე უნდა მიგეტანათ თქვენი სოფლის ხმების 75 პროცენტი მაინც, თქვენ თამამად განაცხადეთ, რომ 5 პროცენტის იმედიც კი არ გქონდათ და ამის გამო გაგათავისუფლეს.
_ არ არის სიმართლე. თვალის ოპერაცია მქონდა გასაკეთებელი, ეს იყო და ეს.
ოზურგეთის მუნიციპალიტეტის სოფელ ლიხაურის მაჟორიტარი დეპუტატი თამაზ სალუქვაძე “გურია ნიუსთან” საუბარში ადასტურებს, რომ სოფელი ლიხაური პოლიტიკური მრავალფეროვნებით გამოირჩევა და სოფელში ბევრი ოპოზიციონერი ცხოვრობს.
_ ბატონო თამაზ, როგორც ლიხაურელები ამბობენ, ლიხაურში ვერ დანიშნეს რწმუნებული იმის გამო, რომ არჩევნებში მოგების შანსი არ აქვს “ნაციონალურ მოძრაობას”. თქვენ, როგორც მაჟორიტარ დეპუტატს, გარკვეული პასუხისმგებლობა გაკისრიათ.
_ შეგიძლიათ, შარშანდელი ინფორმაცია ცსკო-ში გადაამოწმოთ. შეიძლება, იმ პროცენტზე ვერ გავედით, რაც საჭირო იყო, თუმცა, მაინც მოვიგეთ. დარღვევას, ან ძალადობას ადგილი ნამდვილად არ ჰქონია, არც არავინ შეგვიზღუდავს არჩევნის გაკეთების დროს. მთავარი პასუხისმგებლობა მე მეკისრებოდა და ჩემი მეთვალყურეობის ქვეშ მიდიოდა საარჩევნო პროცესი. მთელი პასუხისმგებლობით ვაცხადებ, რომ ერთი ხმაც კი არ გაყალბებულა. მომავალშიც შეიძლება, მაღალ პროცენტზე ვერ გავიდეთ, თუმცა, მოგების იმედი ნამდვილად მაქვს. გამორიცხულია, რომ წავაგოთ.
_ ლიხაურელების თქმით, რადგან ისინი მეტი ოპოზიციურობით გამოირჩევიან, ამიტომ ხელისუფლება ლიხაურში არაფერს აკეთებს. მათ უდიდესი პრობლემა უგზოობაა.
_ ხელისუფლება ნამდვილად არ უდგას ჯიბრში ლიხაურელებს. ლიხაურში ძალიან ბევრი რამ გაკეთდა და გაკეთდება კიდევ. თუმცა, ვაღიარებ, რომ გზის პრობლემა ნამდვილად არის. ყოველ წელიწადს მიმდინარეობს გზის შეკეთება, წელსაც შევაკეთეთ. ძალიან ძვირი ჯდება ასე გრძელი გზის კაპიტალურად შეკეთება. პარალელურად უნდა შეიცვალოს წყლის მილები და ეს თანხები რომ დაჯამდა, ძალიან დიდი ციფრი გამოვიდა, ამის საშუალება კი ნამდვილად არ გვაქვს. მაგ საკითხის გადასაწყვეტად სერიოზული მსჯელობა მიდის და მიმდინარე წელს ეს პრობლემაც გადაიჭრება, _ გვითხრა სალუქვაძემ.
ოზურგეთის მუნიციპალიტეტის გამგებელი, ილია ვაშაყმაძე, რომელიც სოფელ ლიხაურის მკვიდრია, “გურია ნიუსთან” საუბარში აცხადებს, რომ ინფორმაცია დავით ცეცხლაძის გამგეობაში დაბარებისა და მისთვის ხმების 75 პროცენტის მიტანის შესახებ, სიმართლეს არ შეესაბამება.
_ ბატონო ილია, სოფელ ლიხაურში რწმუნებული დანიშნეთ?
_ ჯერ არა.
_ შეგიძლიათ, მიზეზებზე გვესაუბროთ?
_ არაფერი… მე მქონდა რაღაც პრობლემა.
_ გავრცელებული ინფორმაციით, დავით ცეცხლაძე დაიბარეთ და ხმების 75 პროცენტი მოსთხოვეთ.
_ სისულელეა. ვინ გითხრათ ეს? არ გვინდა, რა. არ ვადასტურებ ამ ინფორმაციას. მაინტერესებს, ვის ეკითხებით ასეთ რაღაცებს? ან ვინც თქვენ მაგას გეუბნებათ, მოვიდეს და მითხრას პირდაპირ მე.
_ ადასტურებთ იმ ინფორმაციას, რომ თქვენს სოფელში ძალიან ბევრი ოპოზიციურად განწყობილი ადამიანი ცხოვრობს და არჩევნებში მოგების ნაკლები შანსი აქვს მმართველ პარტიას?
_ რა შუაშია ეგ კითხვა, არ მესმის.
