ოზურგეთის მუნიციპალიტეტის დაბა ნასაკირალში არსებულ პრობლემებზე “გურია ნიუსი” არაერთხელ წერდა. ნასაკირალი ოზურგეთის მუნიციპალიტეტში მოსახლეობის დიდი რაოდენობით გამოირჩევა _ იქ 712 კომლი ცხოვრობს და 1 900 ამომრჩეველია. ნასაკირალში ყველა არჩევნებზე მმართველი პარტია 80 პროცენტით იმარჯვებს. თუმცა, როგორც დაბის მცხოვრებლები “გურია ნიუსთან” საუბარში აღნიშნავენ, ხელისუფლებას ისინი მხოლოდ წინა საარჩევნოდ ახსენდებათ, დანაპირები კი არ სრულდება. როგორც ნასაკირალის ერთ-ერთი მცხოვრები “გურია ნიუსთან” საუბარში ამბობდა, არჩევნებზე ხალხს “კარტოფილივით” ეზიდებიან მთიდან ბარში.
უგზოობა, უწყლობა და უმუშევრობა _ ეს ის პრობლემებია, რაზეც დაბა ნასაკირალში მცხოვრებლებმა ორშაბათს, 6 თებერვალს “თავისუფალი დემოკრატების” ოზურგეთის ოფისში გამართულ პრესკონფერენციაზე ისაუბრეს.
_ რა გვაწუხებს ნასაკირალში მცხოვრებლებს? პირველ რიგში, ცენტრალური გზის პრობლემა, რომელიც ძალიან ცუდ მდგომარეობაშია. ასევე, მწვავედ დგას წყლის საკითხი. წყლის საკითხის მოგვარებისთვის უამრავი თანხაა დახარჯული და ბოლომდე მოგვარებული არაა. საავადმყოფოსა და ამბულატორიაზე ხომ საუბარი ზედმეტია _ დანგრეულია ყველაფერი. საერთოდ, ექიმს გაუსაძლის პირობებში უწევს მუშაობა. ნასაკირალში მწვავედ დგას უმუშევრობის პრობლემაც. როცა თურქეთში მუშაობის სეზონი იწყება, მთელი ნასაკირალი იცლება. ჩაის პლანტაციები რა მდგომარეობაშია, ყველამ იცის _ ეს კულტურა გადაჯიშების პირასაა. ხალხს შემოსავლის არანაირი წყარო არ გააჩნია. დღესაც ოჯახებში ტონობით გაფუჭებული მანდარინი აწყვია, _ თქვეს პრესკონფერენციაზე ნასაკირალელებმა.
ფირუზ ირემაძით თქმით, 5 დღე ამ თოვლობაზე შუქი არ ჰქონიათ და არც გზა გაუწმენდიათ: _ მე ასეთ ცხოვრებას ცხოვრებას არ ვეძახი _ ყველა გაჭირვება ჩვენს თავზეა. მანდარინი მოკრეფილი გვაქვს და გაყიდვის პროცესი არ დაწყებულა _ ხალხს დაწყობილი ციტრუსი ულპება. თუ ვინმე არ მოგვეშველა, ცუდ დღეში ვართ. მიუხედავად ხელისუფლების წარმომადგენლების არაერთი დაპირებისა, დაბა ნასაკირალის მოსახლეობა ცუდ დღეშია ჩავარდნილი. ჩვენს სკოლაში 450 მოსწავლე სწავლობს და წყალი არ აქვთ. წყალზე გადასახადია დაწესებული _ თვეში სამი ლარი. წყალი იქნება თუ არა, მნიშვნელობა არ აქვს, _ აღნიშნა ირემაძემ.
