რამდენიმე დღის წინ ქალაქ ოზურგეთში შპს "სავაჭრო ცენტრში", ძველ ტერიტორიაზე ინციდენტი მოხდა.
ბაზრის მოვაჭრეებს, ქალაქ ოზურგეთის მერს ბეგლარ სიორიძესა და ბაზრის დირექტორს რეზო შალამბერიძეს შორის ხმამაღალი საუბარი ურთიერთდაპირისპირებაში გადაიზარდა.
მოვაჭრეების განცხადებით, ქალაქ ოზურგეთის მერმა ბეგლარ სიორიძემ ბაზარში მიმდინარე მშენებლობები მოინახულა, ადგილზე იმყოფებოდა ბაზრის დირექტორიც.
ბაზრის იმ ტერიტორიაზე, სადაც წვრილფეხა პირუტყვითა და ფრინველით ვაჭრობენ, მოვაჭრეებისთვის თანამედროვე ტიპის ღია ფარდულის მოწყობაა დაგეგმილი.
დაპირისპირება მერს, დირექტორსა და მოვაჭრეებს შორის მას შემდეგ დაიწყო, როცა მათ ბეგლარ სიორიძეს დაპირებები შეახსენეს, ისინი უკმაყოფილებას გამოთქვამენ მიმდინარე მშენებლობების გამო. მათი თქმით, ის პროექტი ითვალისწინებდა ბაზრის ცენტრალური შემოსასვლელიდან ჭიშკარის გაკეთებას, რასაც დაპირდა მათ არაერთი შეხვედრის დროს ოზურგეთის მერი, მაგრამ დაპირება არ შეასრულა. მოვაჭრეებმა მერს დაპირება კიდევ ერთხელ შეახსენეს და განუცხადეს, რომ ისინი აპროტესტებდნენ დაპირების შეუსრულებლობას.
მოვაჭრეების თქმით, მერი ამ მოთხოვნაზე განაწყენდა და შეურაცხყოფა მიაყენა მათ. აღნიშნულ ფაქტს ბაზრის დირექტორიც ესწრებოდა, მათ შორის დაპირისპირების გამო ერთ–ერთი მოვაჭრე, ნატო ასანიძე ცუდად გახდა, გონება დაკარგა, წაიქცა და ქვაზე თავი დაარტყა.
მისი გადაყვანა "მედალფას" სამედიცინო ცენტრში სასწრაფოდ გახდა აუცილებელი.
როგორც "გურია ნიუსს" თვითმხილველებმა განუცხადეს, ხელისუფლების წარმომადგენლებმა უყურადღებოდ მიატოვეს დაზარალებული. მეტიც განაცხადეს, რომ სასწრაფო დახმარების ბრიგადა გამოძახებული იყო, თუმცა ხელმეორედ გადამოწმების შემთხვევაში, ინფორმაცია სასწრაფოს გამოძახების შესახებ, არ დადასტურდა.
"გურია ნიუსი" ნატო ასანიძეს სამედიცინო ცენტრში ესაუბრა. როგორც თავად ამბობს, არის ონკოლოგიური ავადმყოფი, აქვს დიაბეტი, ბაზარში წამლების გამო ვაჭრობს. ის ამბობს, რომ მას ქალაქ ოზურგეთის მერმა შეურაცხყოფა მიაყენა:
ნატო ასანიძე: "რაც დაგვპირდა ის არ შეგვისრულა, კონკრეტულად ვითხოვდით ბაზრის შესასვლელთან ჭიშკრის გაკეთებას, რაზეც უარი მივიღეთ მერისგან. პირდაპირ გვეუბნებოდა, “თქვენ ვინ ჩემი ფეხები ხართო“. მე ვარ დიაბეტიანი და ამაზე ცუდად გავხვდი. ჩემთვის ნერვიულობა არ შეიძლებოდა, მაგრამ მერმა ყურად არ იღო ჩემი მდგომარეობა, იძახდა “ფეხებზე მკიდიაო.“ ძალიან ვინერვიულე, გონება დავკარგე, წავიქეცი და თავი დავარტყი ქვას. არც აქ არ მოსულა, ამბავი არავის არ უკითხავს, როგორ ვიყავი. ასე ძაღლივით ექცევიან ადამიანებს, ამ ამბავს ესწრებოდა ბაზრის დირექტორიც რეზო შალამბერიძე. ის ჩემსკენ ხელებით წამოვიდა, მაგრამ ბეგიმ უთხრა რას აკეთებ, თუ იციო. ამის შემდეგ დავკარგე გონება. სასწრაფოს დააგვიანდა თურმე, მოუტყუებიათ გამოძახებულია. მერე თავად მოვაჭრეებს დაურეკიათ 112 – ში" _ ამბობს დაზარალებული ასანიძე.
აღნიშნულ ფაქტს ბაზრის სხვა მოვაჭრეებიც ადასტურებენ:
რუსიკო ახვლედიანი: "აგვიშენეს ეს საქათმე ცემენტით, გააკეთეს ისე, რომ ციხე გეგონება. არ გაგვიკეთეს ჭიშკარი, ფაქტიურად გასასვლელი არ აქვს, საშინელ მდგომარეობაში ვიქნებით. ვითხოვდით მეორე მხრიდან მაინც გაეკეთებინათ ჭიშკარი. ამაზე წარმოიშვა დავა, შელაპარაკება მოხდა მერს, სიორიძესა და ჩვენს შორის. მწვავედ შელაპარაკდნენ სიორიძე და ნატო ასანიძე. მერი ეუბნებოდა თქვენს ჭკუაზე ვერ ვივლი მეო. შემდეგ ეს ქალი გახდა ცუდად, ინერვიულა, წაიქცა და დაარტყა თავი".
მაყვალა მორჩილაძე: "იყო ხამამაღალი საუბარი. ვეუბნებოდით მერს, რომ გაგვიკეთეთ შესასვლელი ჭიშკარი იმ ახალაშენებულ საქათმეშიო, დახუთულია ყველაფერი. მერმა გვითხრა ვერ გავაღებო. ამაზე მოხდა შელაპარაკება. ეს ქალი არის ონკოლოგიური ავადმყოფი, დიაბეტიანი, ანერვიულდა და გონება დაკარგა."
შპს "სავაჭრო ცენტრის" დირექტორი რეზო შალამბერიძე მომხდარ ინციდენტთან დაკავშირებით საუბრობს და განმარტავს მიზეზს, რატომ არ გაკეთდა ჭიშკარი.
"გეტყვით ზუსტად, რა და როგორ მოხდა. რაც შენდება საქათმის ვარიანტი, კარგად კეთდება და საბოლოოდ იქნება ყველა კმაყოფილი.
რატომ წარმოიშვა დაპირისპირება, გეტყვით ახლავე. საუბარი იყო ჭიშკარის გაღებაზე. ეს პროექტშიც დევს, რომ გაკეთებულიყო, თუმცა უარი განაცხადა მოსახლეობამ, რომელსაც ესაზღვრება ეს საქათმე. არ დაგვრთეს ნება. ის, რომ ბატონ ბეგის მოეტყუებინა მოვაჭრეები, ასეთ ფაქტს არ ქონია ადგილი. პროექტში ჭიშკრის გაკეთება ჩადებული იყო, მაგრამ კიდევ ერთხელ ვიმეორებ, წინააღმდეგი წავიდა მოსახლეობა"_ ამბობს შალამბერიძე. ის მოვაჭრეების მიმართ შეურაცხყოფის მიყენებაის ფაქტს არ ადასტურებს:
"მე არც ზედმეტი მითქვამს რამე და არც გამიკეთიბია. მერე ბეგიმ მომცა შენიშვნა და დავტოვე იქაურობა. შელაპარაკება მომივიდა მოვაჭრეებთან, თუმცა ხელჩართული ბრძოლა არ ყოფილა. სხვა არაფერი მიკადრებია, ღმერთმა დამიცვას, რომ ქალს შეურაცხყოფა მივაყენო." ჩვენს კითხვას, გამოიჩინა თუ არა ბაზრის ადმინისტრაციამ გულგრილობა დაზარალებულის მიმართ, შალამბერიძე პასუხობს:
" ბეგისაც არ დაუტოვებია, მან გამოიძახა სასწრაფო. მე წამლები მქონდა ჩემს ოთახში, ასე რომ არავის გულგრილად არავის არ დაუტოვებია".
აღნიშნულ ფაქტს უარყოფს ქალაქ ოზურგეთის მერი ბეგლარ სიორიძე.
"ჩემსა და ბაზრის მოვაჭრეებს შორის არაფერი არ მომხდარა, შელაპარაკებასაც ადგილი არ ჰქონია. შელაპარაკება მოხდა ბაზრის დირექტორსა და ერთ–ერთ მოვაჭრეს შორის, მაგრამ ამ ქალბატონმა ატეხა ერთი ამბავი. მინდა გითხრათ, რომ რამდენი ქალბატონი იკივლებს ბაზარში, მაგათ ჭკუაზე ჩვენ ვერ გავივლით. ჩვენ ვაკეთებთ ბაზარს ისე, როგორც შეეფერება ჩვენს ქალაქს და ამას წინ ვერ დაუდგება ვერცერთი ქალბატონის წივილ – კივილი.
–ბატონო ბეგლარ! უთხარით თუ არა თქვენ ნატო ასანიძეს "მე ყველაფერი ფეხებზე მკიდია, თქვენც მათ შორის ფეხებზე მკიდიხართო?"
" არა, იმიტომ , რომ მე ფეხებზე არაფერი არ მკიდია და არც ამ ქალბატონისთვის მითქვია მსგავსი რამ" _ ამბობს ბეგლარ სიორიძე.
