13 ივნისს, თბილისში მომხდარი სტიქიით გამოწვეული ზარალი, ზოოპარკის სხვა ადგილზე გადატანის ჩათვლით, 200 მილიონ ლარს შეადგენს, _ ამის შესახებ დღეს თბილისის ვიცე-მერმა სპეციალურად გამართულ ბრიფინგზე განაცხადა. თუმცა ამ დრომდე უცნობია, რა პრინციპით დაითვალა დედაქალაქის მერიამ ზარალი, როცა ობიექტების ნაწილი, რომელიც სტიქიისას დაზარალდნენ აღწერილი არ არის.
როგორც "გურია ნიუსმა" გაარკვია, გმირთა მოედანზე მდებარე რესტორანი "მატრიოშკა" რომელიც სტიქიისას დაზიანდა, მერიის წარმომადგენლებს ჯერ არ აღუწერიათ.
ჩვენთან საუბრისას რესტორნის დირექტორი მანანა ლომიშვილი ამბობს, რომ წინასწარი მონაცემებით და მათი დათვლით, სტიქიისგან მიყენებული ზარალი 290 ათასი ლარია, თუმცა, ზუსტი ოდენობა აღწერის ჩატარებამდე არ იცის.
"ჯერჯერობით დათვლილი და აღრიცხულიც არ არის ზარალის ზუსტი ოდენობა. შეტანილი გვაქვს განცხადება მერიაში, თუმცა, გვითხრეს, რომ ეტაპების დაყოფის შემდეგ, მესამე ეტაპზე მოხდება ჩვენი დაკმაყოფილება. ვერ ვიტყვით, რომ ყურადღებას არ გვაქცევენ, მაგრამ მოლოდინის რეჟიმში ვართ.
მხოლოდ ჩემი ზარალი 90 ათას ლარამდეა, რაც შეეხება მფლობელების ზარალს, როგორც ვიცი, პირველადი დათვლით, 200 ათასს აჭარბებს. ტექნიკა, ყველა კომუნიკაცია გაზისა და წყლის გაყვანილობით დაწყებული, გამწოვებით დამთავრებული, ყველაფერი დაზიანებულია. კანალიზაცია უკვე გაწმენდილია. რესტორნის მფლობელმა მოიყვანა კერძო კომპანია და საკმაოდ ძვირი დაუჯდა", – ამბობს ლომიშვილი.
მისივე თქმით, თუ სტიქიის შედეგად მიყენებული ზარალის ანაზღაურება ვერ მოხდება, მფლობელი რესტორნის აღდგენას ვერ შეძლებს.
"რესტორანი მთლიანად დასუფთავებულია, მაგრამ აღდგენას ვერ ვახერხებთ. დასუფთავების სამსახური თავიდან ამბობდა, რომ კერძო ტერიტორიაზე ვერ შემოვიდოდნენ და ჩვენ უნდა დაგვესუფთავებინა ტერიტორია, თუმცა მოგვიანებით მოვიდნენ და დაგვეხმარნენ. ერთობლივი ძალებით, ჩვენს მიერ დაქირავებული კერძო მუშებით, მოხალისეებით და დასუფთავების სამსახურის დახმარებით შევძელით მთელი ტერიტორია გაგვესუფთავებინა. ამ ეტაპზე ყველაფერი გასუფთავებულია და ეპიდემიის საშიშროება არ არის. სურსათის ეროვნულმა სააგენტომ ძალიან კარგად გააკეთა დეზინფექცია, რისთვისაც მინდა მათ მადლობა გადავუხადო. ძალიან დიდი მხარდაჭერა გაგვიწიეს. ახლა დარჩენილია აღდგენითი სამუშაოები, რასაც ცხადია თანხა სჭირდება, თუმცა, ამ ეტაპზე მხოლოდ ჩვენი ძალებით ამის გაკეთებას ვერ შევძლებთ. 30 -მდე თანამშრომელი გვყავდა, ყველა უმუშევარი დაგვრჩა. მთელი ჩვენი თანხები უკვე გახარჯული გვაქვს. რესტორნის მოწესრიგება და გახსნა კი იმ თანხაზეა დამოკიდებული, რასაც დახმარების სახით მოგვცემენ", _ აცხადებს ლომიშვილი.
შეგახსენებთ, რომ "გურია ნიუსი" "მატრიოშკაში" არსებულ მდგომარეობაზე უკვე წერდა. სტიქიიდან 16 დღის შემდეგაც კი რესტორნის პირველი სართული შლამისგან გაწმენდილი არ იყო. რა მდგომარეობა იყო "მატრიოშკაში შეგიძლიათ "გურია ნიუსის" ფოტორეპორტაჟში ნახოთ: ინფექციის კერა "გმირთა მოედანზე" მდებარე რესტორან "მატრიოშკაში"
