“ბოლოს სადილი ათი დღის წინ მოვამზადე”

49 წლის რუსუდან შევარდნაძე, ერთი წელია, ოზურგეთის უფასო სასადილოში იკვებება. როგორც თავად ამბობს, უსახლკაროა, ახლა სხვის ჭერს არის შეფარებული და იმის გამო, რომ საცხოვრებელ მისამართს ძალიან ხშირად იცვლის, ამ ეტაპზე არც სოციალურ დახმარებას იღებს: _ ონკოლოგიური ავადმყოფი ვარ, ოპერაცია მჭირდება. ასევე ვარ მეორე ჯგუფის ინვალიდი, თუმცა, ახლა არც სამედიცინო პოლისი მაქვს და არც ფულად შემწეობას ვიღებ. რამდენიმე წელია, ვითხოვ ოზურგეთის გამგეობიდან დახმარებას, რომ ერთი ოთახის შეძენა მაინც მოვახერხო. მპირდებიან, მაგრამ დღემდე არ დამხმარებიან, _ გვითხრა მან.

როგორც შევარდნაძე ამბობს, მისი შემოსავალი თვეში მხოლოდ ინვალიდობის პენსია _ 70 ლარია, რომელიც სესხის სახით წინასწარ აქვს გამოტანილი: _ უმწეოთა სასადილოში თითქმის ერთი წელია, ვსადილობ. ახლა სახლში მიმაქვს ჩემი ულუფა. დღეში მხოლოდ ერთხელ ვჭამ და მეორე დღის სადილობამდე მშიერი ვარ. ბოლოს, ათი დღის წინ მოვამზადე წვნიანი. აღარც გაზი მაქვს და არც _ პროდუქტი, არც სითბო მაქვს ასეთ ყინვებში. გამგეობაში დამპირდნენ, რომ შეშის ფულს მომცემენ. საახალწლოდ პროდუქტები მომიტანეს. ახლა კი იმის მოლოდინში ვარ, იქნებ, წელს მაინც გამიწიონ დახმარება უსახლკარო ადამიანს, _ დასძინა შეზღუდული შესაძლებლობების სტატუსის მქონე, უსახლკაროდ დარჩენილმა 49 წლის ქალბატონმა.