"არ გავჩერდებით, მოვითხოთ ადგილობრივი ხელისუფლების მხარდაჭერას და შუამდგომლობას, მთავრობას ვთხოვთ ჩადგნენ ამ საქმეში, ამდენი წლის განმავლობაში მათ სოფლისთვის სიკეთის მეტი არ გაუკეთებიათ. ვთხოვთ მთავრობას, დაგვიდგნენ მხარში, დაინახონ სიმართლე და ჩვენც სამაგიეროდ არჩევნებზე დავუდგებით მხარში. წინააღმდეგ შემთხვევაში გპირდებით, რომ დაბა ნასაკირალში და მთელ იმ სოფლებში, სადაც აჭარლები ცხოვრობენ, დღევანდელი ხელისუფლება არჩევნებზე ერთ ხმასაც ვერ მიიღებს! იმედი გავქვს, რომ გონვრულად მოიქცევიან"– ასე ეხმაურებიან ოზურგეთის მუნიციპალიტეტის დაბა ნასაკირალის მცხოვრებლები მათი სოფლის დეპუტატისა და რწმუნებულის დაკავების ფაქტს.
ოზურგეთში ცხელი ზაფხული საჯარო მოხელეები ხმაურიანი დაკავებებით დაიწყო.
შსს-ს ანტიკორუფციული სააგენტოს თანამშრომლებმა, 17 ივლისს ქრთამის აღების ბრალდებით ოზურგეთის მუნიციპალიტეტის დაბა ნასაკირალის საკრებულოს დეპუტატი, აგრარულ საკითხთა, ქონების მართვისა და ბუნებრივი რესურსების საკითხების კომისიის თავმჯდომარე შოთა ართმელაძე და ოზურგეთის მუნიციპალიტეტის გამგებლის წარმომადგენელი დაბა ნასაკირალის ადმინისტრაციულ ერთეულში ტარიელ ანთაძე 17 ივლისს ქობულეთში დააკავეს.
შსს ოფიციალური ინფორმაციის მიხედვით, აღნიშნულმა პირებმა დაბა ნასაკირალის ტერიტორიაზე მდებარე უმოქმედო სკოლის შენობის სათანადო ნებართვისა და პროცედურების გავლის გარეშე ერთწლიან სარგებლობაში გადაცემის სანაცვლოდ, თურქეთის და საქართველოს მოქალაქეებს ქრთამის სახით 2000 აშშ დოლარი და 1000 ლარი გამოართვეს. გამოძიება ქრთამის აღების ფაქტზე მიმდინარეობს, რაც 7-დან 11 წლამდე თავისუფლების აღკვეთას ითვალისწინებს.
აღნიშნულმა ფაქტმა საზოგადოების აღშფოთება და აზრთა სხვადასხვაობა გამოიწვია.
საზოგადოების ერთი ნაწილი მიიჩნევს, რომ აღნიშნული საქმე არის "შეკერილი, რომლითაც გამოძიებას სხვა მაღალჩინოსნებზე სურდა გასვლა, თუმცა როგორც აღმოჩნდა, საქმე ისე "ვერ შეიკერა", როგორც სუს-დან იყო დაგეგმილი.
"გურია ნიუსმა" გაარკვია, რომ შენობა, რომელიც თურქებს უნდა აეღოთ ერთწლიანი სარგებლობის უფლებით, არის ძველი ბავშვთა ბაღისა და სკოლის ყოფილი შენობა, ამჟამად უფუნქციო და თითქმის დანგრევის პირზე მყოფი. შენობა არ არის ოზურგეთის მუნიციპალიტეტის გამგეობის საკუთრება, არც ეკონომიკის ბალანსზე ირიცხება, ის ეკუთვნის სააქციო საზოგადოება ნასაკირალს, რომლის დირექტორიც იყო დაბა ნასაკირალის დეპუტატი შოთა ართმელაძე.სააქციო საზოგადოება ნასაკირალი არის კერძო სამართლის იურიდიული პირი, ხოლო აქციონერი შესაძლოა იყოს მთელი სოფელი, ან თუნდაც 50 კაცი.
შოთა ართმელაძეს ჰქონდა უფლება, სააქციო საზოგადოების კრების გადაწყვეტილებით, დირექტორთა საბჭოს მოწვევით და თანხმობით, მიეღო ერთპიროვნული გადაწყვეტილება, გამგეობისა და საკრებულოს ჩარევის გარეშე და გაესხვისებინა აღნიშნული ფართი დროებით.
ოზურგეთის მუნიციპალიტეტის გამგებლის მერაბ ჭანუყვაძის განცხადებით, აღნიშნულ ფაქტს ოზურგეთის მუნიციპალიტეტის გამგეობასთან არანაირი კავშირი არ აქვს. "შენობა არ წარმოადგენს ოზურგეთის მუნიციპალიტეტის გამგეობის საკუთრებას. ამ ფაქტთან დაკავშირებით სხვა კომენტარს ვერ გავაკეთებ"–ამბობს ჭანუყვაძე.
შოთა ართმელაძეს ჰქონდა უფლება, სააქციო საზოგადოების კრების გადაწყვეტილებით, დირექტორთა საბჭოს მოწვევით და თანხმობით, მიეღო ერთპიროვნული გადაწყვეტილება, გამგეობისა და საკრებულოს ჩარევის გარეშე და გაესხვისებინა აღნიშნული ფართი დროებით.
ოზურგეთის მუნიციპალიტეტის საკრებულოს თავმჯდომარემ "აგრარულ საკითხთა, ქონების მართვისა და ბუნებრივი რესურსების საკითხების კომისიის" თავმჯდომარის შოთა ართმელაძის დაკავების ფაქტთან დაკავშირებით კომენტარი საკრებულოს სხდომაზე გააკეთა:
"საკრებულო არის პოლიტიკური ორგანო, რომელმაც უნდა შეაფასოს და მოსახლეობის ინტერესებიდან გამომდინარე გააკეთოს სწორი პოლიტიკური არჩევანი, სწორედ ამიტომ, როგორც საკრებულოს თავმჯდომარე, ოზურგეთის მუნიციპალიტეტის საკრებულოს "აგრარულ საკითხთა, ქონების მართვისა და ბუნებრივი რესურსების საკითხების" კომისიის თავმჯდომარის დაპატიმრებასთან დაკავშირებით ვაცხადებ:
მიმაჩნია, რომ ნებისმიერი ქმედება, რომელიც არ შეეფერება საკრებულოს თანამდებობის პირის სტატუსს, საჭიროებს შეფასებას, რეაგირებას და შესაბამის გადაწყვეტილების მიღებას.
საკრებულოს წინაშე ვსვამ საკითხს „"საკითხთა, ქონების მართვისა და ბუნებრუივი რესურსების საკითხების" კომისიის თავმჯდომარის შოთა ართმელაძის თანამდებობიდან გადაყენების თაობაზე."
ფარული კენჭისყრის შედეგების მიხედვით, ოზურგეთის მუნიციპალიტეტის საკრებულოს აგრარულ საკითხთა, ქონების მართვისა და ბუნებრივი რესურსების საკითხების კომისიის თავმჯდომარის თანამდებობიდან გადაყენება, სიითი შემადგენლობის ნახევრაზე მეტის მხარდაჭერით ვერ მოხერხდა.
"გურია ნიუსი" შეეცადა საჯარო მოხელეების დაკავებასთან დაკავშირებით დაბა ნასაკირალის მოსახლეობის აზრი გაეგო. ცენტრში შეკრებილებმა ის შენობა გვანახა, რომლის გასხვისებაც უნდა მომხდარიყო. სოფლის მცხოვრებლების განცხადებით მათი დეპუტატისა და სოფლის რწმუნებულის დაკავება "შეკერილი" საქმე იყო და ის მიზანმიმართულად მოხდა სამართალდამცავების მიერ.
მუხრან ქათამაძე : "გამორიცხულია შოთას ეს გაეკეთებინა, ამდენი წელია ვიცნობთ, ასეთი რამ თავში აზრად არ მოუვიდოდა. ეს არის ჩაწყობილი საქმე, მოგზავნილია ეს პიროვნება. ერთი ადამიანიც თუ დაგიდასტურებთ სოფელში, რომ შოთა ამ ამბის მოქმედი იყო, იყო მე მოვიხდი ბოდიშს, მე წავალ მაგის მაგივრად ციხეში. ეს არის ჩაწყობილი საქმე, აქ სხვა ამბავია, აბა სად ჩანს მესამე პირი, ვინც ფული გადასცა? სად არის გვაჩვენონ, ვინც ქრთამი მისცა? ის არ უნდა დაისაჯოს? ეს კარგად ორგანიზებული საქმეა"_ ამბობს ქათამაძე და დაკავებამდე, აღნიშნულ საქმესთან დაკავშირებით სოფელში არსებულ სიტუაციაზე საუბრობს:
"სოფელში არის რამდენიმე შენობა, კანონიერად დარეგისტრირებული, რომელზეც არსებობს უამრავი საბუთი, მაგრამ არცერთში შესვლა არ მოინდომეს თურქებმა, გინდა თუ არა ეს შენობა მოგვეცითო, სხვა შენობები შესთავაზეს შოთამაც და ტარიელმაც, მაგრამ არ ქნეს, რატომ? თქვენ გონიათ ან ვინმეს ჰგონია, რომ ეს ჩუმად ხდებოდა და სოფელმა არ ვიცოდით ამის შესახებ? ეს შენობა ჩვენია, ნასაკირალის საკუთრებაა, ჩვენ ვართ აქციონერები და დირექტორი იყო შოთა.
როცა ინვესტორი გამოჩნდა, მოუყარა თავი შოთამ დაბა ნასაკირალის მცხოვრებლებს და განუცხადა, სოფელში თურქები მოდიან, თხილის მიმღები პუნქტი ამუშავდება, ადგილობრივები დასაქმდებიანო. ეს რომ დამალულად ყოფილიყო, შოთა სოფელ შეატყობინებდა ამის შესახებ? გააგებინეთ რა ყველას, ვისაც აინტერესებს, ეს ამბავი ისე არ არის, რასაც გადმოსცემენ.
სოფელი ცოტას სულს მოითქვამსო, ეს შენობაც დანგრევის პირასაა და სოფელს შეუნარჩუნდებაო, გარემონტდება და სოფელს დარჩებაო, ამბობდა. ეს შენობა მთავრობის არაა, ჩვენ დარწმუნებული ვართ, რომ იყო ჩაწყობილი საქმე, ახლა სტადიონი კეთდება, გაზი შემოჰყავთ, წყალი გააკეთა, გზა კეთდება, რომ ცოდნოდა, ისეთი ფრთხილი კაცი იყო, ამ საქმეს ხელს არ მოჰკიდებდა, ყველას გვერდში ედგა, მთელ სოფელს უყვარდა, ფაქტიურად მთელი სოფლის პატრონი და გზის გამკვლევი იყო"_ ამბობს ქათამაძე.
ალიოშა ტაკიძე: "გურიაში თითქმის მასეთი ადამიანი მეორე არ იქნებოდა, სოფლის პატრონი და თავკაცი ეგ იყო."
ოთარ ართმელაძე: "არ აიღებდა დარწმუნებულები ვართ, კაცს სამსახური ჰქონდა, ამხელა ხელფასი, რის გამო გააკეთებდა? მაგ ფულისთვის არცერთი გლეხი არ გაიფუჭებდა თავს, არა თუ ამხელა თანამდებობის პირი, არ გვჯერა. სოფელში რამე რომ კეთდებოდა, ყველას თავზე ედგა, ყველაფერს ამოწმებდა, სათითაოდ ითვლიდა, გაზის და წყლის მილებს, გამორიცხულია, ისეთი ავტორიტეტი ჰქონდა სად არ უნდა მიმდგარიყო საქმე რომ არ გაეკეთებინა, მთელ სოფელს უყვარს."
დაბა ნასაკირალის მცხოვრებლები სასამართლოზე მომხდარ ამბავსაც ჰყვებიან:
"სასამართლოში უთქვამს შოთას, რომ ეს ფული არის რემონტისთვის, ამას ქრთამის სახით იცოდეთ არ ვიღებთო, როცა ჩამოხვალთ რემონტი გაკეთებული დაგხვდებათო. ეს შენობა არის ჩემი და წილში არის რამდენიმე პირი, რომელთანაც უკვე შეთანხმებული მაქვს ეს ამბავიო.
მოსამართლეს უთქვამს, თუ შენ მაგ საბუთებს წარმოადგენ, რომ ეს არ არის გამგეობის საკუთრება, სამსახურიდან არ გათავისუფლდები და შენი პოსტი შეგინარჩუნდებაო. მოსამართლე მიხვდა, რომ ეს სასჯელი არ ეკუთვნის. ახლა რომ სახლში გაგიშვა, ამ საქმეში ისეთი პიროვნებაა ჩარეული, სოფელში მკვლელობა მოხდება. დაუსახელებიათ კიდეც ვიღაც გ. ირემაძე, რომელიც წელიწადში ერთხელ არ ამოდის ოფელში და ამის შესახებ მართლა არაფერი იცოდა.
ინტერესი არის შსს -დან, ადგილობრივი უშიშროებიდან, რომლებმაც გადასცენ ეს ინფორამცია, არ უნდოდათ თავად გამოჩენა, რატომ არ გადმოსცენ ფული აქ და რატომ დაუძახეს აჭარაში? რა თურქებს რატომ არ აწყობდა კანონირი შენობების აღება? ეს არის სულ რაღაც 20 დღის ამბავი, რომელიც სოფელში არ იყო დამალული"–ამბობენ დაბა ნასაკირალის მცხოვრებლები.
ოზურგეთის მუნიციპალიტეტის საკრებულოს დეპუტატი პაატა მანჯგალაძე ამბობს, რომ აღნიშნული პირები დამოუკიდებლად არ მოქმედებენ და სახეზეა ორგანიზებული დანაშაულის ნიშნები, რომლის უკანაც ადგილობრივი თვითმართველობის და სამხარეო ადმინისტრაციის მაღალჩინოსნები დგანან.
"სისხლის სამართლის კოდექსის მიხედვით ქრთამის აღება არის მოხელის ან მასთან გათანაბრებული პირის მიერ ფულის, ფასიანი ქაღალდის, სხვა ქონების ან ქონებრივი სარგებლის სახით, ქრთამის მიმცემის სასარგებლოდ ამა თუ იმ მოქმედების შესრულებისათვის ან შეუსრულებლობისათვის, რომელიც მოხელეს ან მასთან გათანაბრებულ პირს უნდა შეესრულებინა ან შეეძლო შეესრულებინა თავისი სამსახურებრივი მდგომარეობის გამოყენებით, ან თუ მის თანამდებობრივ ავტორიტეტს შეეძლო ხელი შეეწყო ამგვარი მოქმედებისათვის, აგრეთვე, მის მიერ სამართლებრივი მფარველობის განხორციელება.
შესაბამისად ვსვამ კითხვას, საკრებულოს წევრს დამუკიდებლად რამდენად შეეძლო აღნიშნული ქმედების განხორციელება. ჩვენს ვარაუდს ადასტურებს საკრებულოს დღევანდელი სხდომა როცა "ქართული ოცნების" უმრავლესობამ მხარი არ დაუჭირა მისთვის თანამდებობრივი უფლომასილების შეწყვეტას, რაც კიდევ უფრო ამძიმებს "ქართული ოცნების" პოლიტიკურ პასუხისმგებლობას"–აცხადებს მანჯგალაძე.
