ლანჩხუთის გოგონათა საფეხბურთო კლუბის აღსაზრდელი ხუთი გოგონა ზუგდიდში 19 წლიანთა ნაკრების ათდღიან შეკრებაზეა გამოძახებული, ვინაიდან ნაკრები საბერძნეთში გასამგზავრებლად ემზადება.
გოგონათა საფეხბურთო სკოლის დირექტორის დურმიშხან ჩხაიძის ინფორმაციით, კლუბი შესვენებაზე იმყოფებოდა, თუმცა ნაკრებში გამოძახების გამო სპორტსმენების სასწრაფოდ შეკრება მოხდა. ამიტომაც გოგონები ინტენსიურად გადიან მზადებას და ყოველდღიურად ვარჯიშობენ სპორტულ ცენტრთან არსებულ სტადიონზე.
"ნამდვილად საამაყოა რომ ისეთი პატარა მუნიციპალიტეტიდან, როგორიც ლანჩხუთია, ნაკრების ხუთი კანდიდატი გვყავდეს: თამარ თავდიშვილის, ანა რომანჩუკის, ნინო ჩხარტიშვილის (ნინო გამოძახებული იყო 16 წლიანებში, 18 წლიანებსა და ეროვნულში), ქეთი ურუშაძისა და თიკო ჯიჯიეშვილის (ორთავე მეკარეა) სახით. როგორც კი შემატყობინეს, იმ წუთასვე შევკრიბე გოგონები და მზადება დავიწყეთ. მიუხედავად იმისა, რომ დაფინანსება მწირი გვაქვს, ბიუჯეტიდან მხოლოდ 10 ათასი ლარი დაგვიმატეს, ძალისხმევას არ დავიშურებ, ამ გოგონების შესაძლებლობები ყველას დავანახო. ჩემი მანქანით ჩავიყვან ბავშვებს ზუგდიდში, როგორც არაერთხელ გამიკეთებია. შეუძლებელია, მათი ნიჭისა და შესაძლებლობების პატრონს უარი უთხრა.
უბრალოდ გულდასაწყვეტია, ისინი მეტ ყურადღებას იმსახურებენ ადგილობრივი ხელისუფლების მხრიდან, ამის ღირსნი ნამდვილად არიან. ჩვენი სკოლის არსებობა ყველამ გაიგო, ლანჩხუთის გარდა. ძალიან კარგი თაობა მოდის. გულიანში, აკეთში უკვე მოქმედებს ჩვენი საფეხბურთო გუნდები, ასევე ვაპირებთ: ლესაში, ხაჯალიასა და შრომისუბანშიც შევქმნათ ჯგუფები. თუმცა, თუ ბიუჯეტი არ გაგვიზარდეს, არაფერი გამოვა, სულ მცირე 150 ლარი მაინც ხომ უნდა ქონდეს მწვრთნელს ხელფასი?!
პრობლემები ძალიან ბევრი გვაქვს. ელემენტარულად სტადიონი, გასახდელი და საშხაპე არ გაგვაჩნია, არადა როგორ შეიძლება ასე?! სპორტული ცენტრის საშხაპეთი ვსარგებლობთ, რისთვისაც ცენტრის ხელმძღვანელობას დიდ მადლობას მოვახსენებ. აგარაკის სტადიონზე ბატონი ვაჟა ცინცაძე დაგვეხმარა და საკუთარი ხელით მოგვიწყო სახელდახელო ოთახი. აქ სტადიონიც მოსაწესრიგებელია, ბალახია გასაკრეჭი. მოკლედ, ელემენტარულ ყურადღებას ვითხოვთ მუნიციპალიტეტის ხელმძღვანელობისგან და გპირდებით, ჩვენი გოგონებით მთელი გურია იამაყებს. ხუმრობა საქმე ნამდვილად არაა, სულ 12 ნაკრების წევრი გვყავს სხვადასხვა ასაკობრივ ჯგუფში. მიუხედავად ყველაფრისა ჩვენ მაინც შემართებით ვართ განწყობილნი. იმედია, ეს გოგონები ამ საქმეს თავს მაინც არ დაანებებენ, არც ჩვენ ვაპირებთ დანებებას." -აცხადებს დურმიშხან ჩხაიძე.
