ბინებში სულ 8 ოჯახი ცხოვრობს და თითქმის ყველა სოციალურად დაუცველების სიაში არიან. მათ, სოციალურ პრობლემებთან ერთად, ბინის ავარიული მდგომარეობაც აწუხებთ.
ჩვენი გაზეთი გასულ წელსაც წერდა მათი პრობლემის შესახებ და ახლა დავინტერესდით, შეიცვალა თუ არა უკეთესობისკენ მათი მდგომარეობა ამ ერთი წლის განმავლობაში. ადგილზე მისულებს ისევ რთული მდგომარეობა დაგვხვდა. _ ჩამოშლილი კედლები და ჯერ კიდევ ჩამოვარდნას გადარჩენილი ჭერი.
ქალბატონი ნათელა, 82 წლის: _ უკიდურესად აუტანელი მდგომარეობა მაქვს. ბინაში მარტო ვცხოვრობ, გვერდით ცხოვრობდნენ, მაგრამ წავიდნენ, რადგან აქ ცხოვრება საშიშია _ სახლი, სადაცაა, დაინგრევა. ჭერი არ აქვს და წვიმა ჩამომდის. წვიმამ კედელიც გააფუჭა. დახმარებისთვის გამგებელს მივმართე და დამპირდა, შემოწმებაზე გამოვაგზავნი ხალხსო, მაგრამ არავინ მოსულა _ მას შემდეგ კი უკვე ორი კვირა გავიდა. შეშაც არ მიმიღია. აქ სახერხი ქარხანა მუშაობდა და იმის მეპატრონე მაძლევდა შეშის ნაჭრებს, ახლაც იმით გამაქვს თავი. პენსიაც მაქვს და სოციალური დახმარებაც, მაგრამ სულ წამლებში მეხარჯება. 44 წელი ვმუშაობდი და 110 ლარი მაქვს პენსია. წყლის გადასახადი 14 ლარი მომივიდა, ვერ გადავიხადე და 28 ლარი გამიხდა. მერე დაბის გამგებელმა გოჩა ჯინჭარაძემ გაარკვია საქმე და კიდევ კარგი, ჩამომაჭრეს. უსაშველოს არაფერს ვითხოვ _ მთავარია, სახურავი გაამაგრონ და გადახურონ, წყალი რომ არ ჩამოვიდეს და კედელი და იატაკი არ დაალპოს.
მერი საფარიძე: _ დიდი ხანია, აქ ვცხოვრობ. ოჯახში ხუთნი ვართ. მეც და ჩემს მეუღლესაც ჯანმრთელობის პრობლემა გვაქვს, დედამთილიც მძიმე ავადმყოფი მყავს. ჭერიდან ჩამოსულმა წვიმის წყალმა სულ გააფუჭა კედელიც და იატაკიც. ყველა ბინაში ასეთი რთული მდგომარეობაა _ ან წვიმა ჩამოდის, ან ქარს ვერ ვამაგრებთ, ჭერს საყრდენიც არ აქვს. გამგებელს ვუთხარი ჩვენი გასაჭირის შესახებ, დაგეხმარებითო, _ გვითხრა, შეშის მოტანასაც დაგვპირდა და ვნახოთ. აქამდე მანანა ჯინჭარაძე გვეხმარებოდა, როგორც შეეძლო, ბავშვებისთვის წიგნებს გვაძლევდა, შეშაც კი მოგვიტანა. რვა ოჯახი ვცხოვრობთ აქ და ქარი რომ ამოვარდეს, ან დიდი თოვლი მოვიდეს, რამდენი კუბო ექნება გასატანი ამ მთავრობას? სანამ ცოცხლები ვართ, ვთხოვთ, ცოტა წამოგვეხმარონ!
მადონა მგალობლიშვილი: _ მიწისძვრის დროს, ბინაში ერთ მხარეს კედელი ჩამოინგრა, დანარჩენი დაიბზარა. სუსხი და წვიმა შემოდის სახლში. ადრე გვითხრეს, სადღაც ბინებში გადაგიყვანთო, მაგრამ ერთ ოთახში კი არა, რამდენიმე ოთახში ძლივს ვეტევით. ოჯახში შვიდი წევრი ვცხოვრობთ. პატარა შვილიშვილი მყავს, რომელსაც ჯანმრთელობის პრობლემა აქვს _ სულ ექიმთან ვართ. კიდევ კარგი, პოლისი გვაქვს, მაგრამ იმასაც აპრილამდე აქვს ვადა. უმცროსი შვილები სკოლაში სწავლობენ, მაგრამ წიგნები არ აქვთ ბავშვებს. დამპირდნენ, აგვისტოში მოგცემთ წიგნებსო, მაგრამ არავის არაფერი მოუცია. გამგებელთან რამდენჯერაც მივედი, ვერასოდეს ვერ ვნახე. შეშაც არ გვაქვს. ადრე სახერხი ქარხნიდან გვაძლევდნენ, ახლა არც ესაა. სანამ დახმარებას ვიღებდი, პური და შაქარი მაინც მქონდა, მაგრამ მომიხსნეს. არც ვაუჩერი მიგვიღია. ყველანაირი საარსებო საშუალება მომისპეს. რა ვიცი, ყველგან ყველაფერი შენდებაო და ჩოხატაურს არაფერი არ სჭირდება? წყლის პრობლემაც გვაქვს, შუქისაც, ერთი მრიცხველი გვიდგას მხოლოდ. ერთ-ერთმა ჩვენგანმა გადახდა რომ ვერ შეძლოს და ჩაუჭრან შუქი, დანარჩენებიც უშუქოდ დავრჩებით. ნაგვის ურნებიც არ დგას და ნაგავი ეზოშია გაფანტული. არჩევნები რომ მოდის, დაპირებებს არ იშურებენ, მაგრამ შედეგი რაა? ცოტა ყურადღება მოგვაქციონ!
ბინებში არსებული ავარიული მდგომარეობის გამო, ყველაზე მეტად დახმარება ცხომელიძეების ოჯახს სჭირდება _ მათი ბინისგან მხოლოდ კარკასია დარჩენილი და ერთ ოთხში ოჯახის 5 წევრი ცხოვრობს, ოჯახის უფროსს და მის მეუღლეს ჯანმრთელობის პრობლემა აქვთ, ოთახში მხოლოდ ღუმელი და ერთი საწოლი დგას. როგორც მეზობლები ამბობენ, ოჯახის წევრებს იატაკზეც უწევთ დაწოლა.
ბინის მცხოვრებლებს იმედი აქვთ, რომ მათი გასაჭირი მხოლოდ ჩვენი გაზეთის ფურცლებზე არ დარჩება და აუცილებლად გამოეხმაურებიან ის ადამიანები, რომლებსაც მათი პრობლემის მოგვარება შეუძლიათ.
ზემოთ ხსენებული მოქალაქეებისთვის დაგვიანებასთან შეშის მიწოდების დაგვიანებასთან დაკავშირებით კომენტარი ჩოხატაურის მუნიციპალიტეტის გამგებელს ლელა იმედაშვილს ვთხოვეთ: _ მე მართლა შევპირდი მათ შეშის მიტანა., სამწუხაროდ, დიდთოვლობის გამო შეგვიფერხდა შეშის მიწოდება, თან ტრანსპორტს შეექმნა ცალკე პრობლემები, მაგრამ ყველაფერი მოგვარდა _ გამოყოფილია 20 კუბური მეტრი საშეშე მერქანი, რაც ამ ბინებში მცხოვრებ ყველა ოჯახს ეყოფა, _ გვითხრა იმედაშვილმა, თუმცა, შეშა დიდთოვლობასა და სიცივეში სჭირდება ადამიანს.
