საქართველოში ადგილობრივი თვითმმართველობა ხორციელდება „საქართველოს კონსტიტუციის“, „ადგილობრივი თვითმმართველობის შესახებ“ ევროპული ქარტიის, „ადგილობრივი თვითმმართველობის შესახებ საქართველოს ორგანული კანონისა” და სხვა ცალკეული ნორმატიული აქტების შესაბამისად.
ადგილობრივ ხელისუფლებას საკუთარი ფუნქციების შესასრულებლად ორი სახის უფლებამოსილება გააჩნია – საკუთარი (ექსკლუზიური) და დელეგირებული.
ადგილობრივი ორგანოები საკუთარ უფლებამოსილებას ახორციელებენ დამოუკიდებლად, საკუთარი პასუხისმგებლობით. დაუშვებელია ცენტრალური ხელისუფლების პირდაპირი ადმინისტრაციული ჩარევა საკუთარ (ექსკლუზიურ) უფლებამოსილებათა გახორციელებაში.
მარტივი ენით რომ ვთქვათ, ადგილობრივი ხელისუფლების საქმიანობაში ცენტრალურ ხელისუფლებას ჩარევის უფლება არ აქვს, მით უმეტეს, დავალებები მიცემის.
ეს ყველაფერი ორგანული კანონითაა გაწერილი, თუმცა რეალობაში საქმე სხვაგვარადაა და ადგილობრივი თვითმმართველობა მითითებებს „ცენტრიდანაც“ იღებს; უფრო მეტიც, როგორც ირკვევა, აღმასრულებელი ხელისუფლების სურვილებისამებრ, ადგილობრივ ბიუჯეტს ხარჯავს.
მაგალითად, რამდენიმე დღის წინ, ყველა მუნიციპალიტეტმა სოფლის მეურნეობის სამინისტროდან მიიღო დავალება, რომ გამგეობის შენობებში საინფორმაციო ტაბლოები განთავსდეს, რომელზეც სოფლის მეურნეობის სამინისტროს მიერ გახორციელებული პროექტების კლიპები განთავსდება და იტრიალებს.
გავარკვიეთ ისიც, რომ მუნიციპალიტეტების უმრავლესობამ ვიდეომონიტორი უკვე შეიძინა:
ზაზა ურუშაძე, ლანჩხუთის მუნიციპალიტეტის გამგებელი: _ სოფლის მეურნეობისთვის უნდა ვიყიდო იმაზე მეუბნებით? ჯერ არ გვიყიდია, ახლა შევიტანეთ ცვლილება ბიუჯეტში. ხუთასი-ექვსასი ლარი ეღირება ალბათ და შენობაში განვათავსებთ.
მერაბ ჭანუყვაძე, ოზურგეთის მუნიციპალიტეტის გამგებელი: _ სოფლის მეურნეობის სამინისტროს რეკლამისთვის ეკრანის შეძენა 1500 ლარამდე ჯდება. შენობაში უნდა დავაყენოთ.
ირაკლი კუჭავა, ჩოხატაურის მუნიციპალიტეტის გამგებელი: _ ალბათ ჰოლში დავაყენებთ. გავა ყველა ინფორმაცია, სოფლის მეურნეობის სამინისტროს და ჩვენს მიერ გახორციელებულ პროექტებსაც გავუშვებთ.
ნადიმ ვარშანიძე, ხელვაჩაურის მუნიციპილიტეტის გამგებელი: _ სამწუხაროდ, ჯერ ვერ განვათავსეთ _ ტენდერი ჩაგვივარდა, ხელახლა უნდა გამოვაცხადო. 1000 ლარი გამოვყავით და ამ თანხაზე არავინ შემოვიდა. ვფიქრობ, რომ 200 ლარს დავამატებთ.
_ ბატონო ნადიმ, რა ინფორმაცია გავა მონიტორზე?
_ მონიტორი გამგეობის შესასვლელში განთავსდება, რომელზეც ძირითადად გავა სოფლის მეურნეობის სამინისტროს რეკლამა, თუმცა, ისიც იქნება რაც ხელვაჩაურში გაკეთდა.
მამუკა კვიტაშვილი, აბაშის მუნიციპალიტეტის გამგებელი: _ დღეს (საუბარი ჩაწერილია 27 ივლისს) მოვიტანეთ და ახლა ვიწყებთ მონტაჟს. 900 ლარი დაგვიჯდა და გავა როგორც სოფლის მეურნეობის სამინისტროს, ასევე ჩვენი რეკლამაც. მინდა რომ ჩვენს მიერ გაკეთებულ პროექტებზე პატარა ფილმი გავაკეთო და გავუშვა.
ტარიელ თუთარაშვილი, ზესტაფონის მუნიციპალიტეტის გამგებელი: _ რვაას ლარამდე დაგვიჯდა. გამარტივებული შესყიდვით შევიძინეთ და ჩვენს შენობაში განთავსდება. ეკრანზე გავა ის, რაც ჩვენს რეგიონს ეხება სოფლის მეურნეობის კუთხით, თანამშრომლებსაც და მოსახლეობასაც საშუალება ექნებათ ნახონ რა გაკეთდა ამ წლების განმავლობაში.
დავით ჯანიკაშვილი, სიღნაღის გამგეობის გამგებელი: _ 1700- ლარიანი ინვიოსი უკვე ჩამოვიტანეთ თბილისდან, მაგრამ ვერ შევიძინეთ, რადგან აღმოჩნდა, რომ შესაბამის მუხლში ფული არ გვაქვს. ოთხშაბათს უნდა მივიღოთ ცვლილება და შევიძენთ. გავა ყველაფერი ის, რასაც აკეთებს სახელმწიფო, სოფლის მეურნეობაში. ჩვენი გაკეთებული საქმეების რეკლამაც იქნება.
კითხვაზე, მოსახლეობის ფართო მასებისთვის რამდენად საჭირო და აუცილებელია გამგეობის შენობაში დამონტაჟებულ მონიტორზე სარეკლამო რგოლების გაშვება, გამგებლები ამბობენ, რომ ასეთია სამინისტროს მითითება და მიიჩნევენ, რომ ეს კარგი სიახლეა. თუმცა, არავის დაუთვლია, საბოლოო ჯამში რა ჯდება კანონის იგნორირება, მედიის, როგორც კომუნიკაციის, ინფორმაციის მიწოდების ინსტრუმენტის როლის უგულებელყოფა, რა ეფექტი ექნება ამ დანახარჯებს და რაც მთავარია, ვისთვის იქნება ეს კლიპები ხელმისაწვდომი – გამგეობის თანამშრომლებისთვის თუ მოსახლეობისთვის, რომლის 2-3% იშვიათად, უმეტესობა კი სიცოცხლეში ერთხელაც არ სტუმრობს გამგეობის შენობას!
