13 ივნისის სტიქიით დაზარალებულმა ერთ-ერთმა ოჯახმა თბილისის მერიის მიერ გადარიცხული თანხით ბინა შეიძინა.
გველესიანების ოჯახი თბილისის ვიცე-მერმა, დიმიტრი ქუმსიშვილმა, ვაკის რაიონის გამგებელმა, ლაშა აბაშიძემ და თბილისის მერიის ქონების მართვის სააგენტოს ხელმძღვანელმა კარლო ლაფერაძემ მოინახულეს.
როგორც დიმიტრი ქუმსიშვილმა აღნიშნა, გველესიანების სამსულიანმა ოჯახმა საბაზრო ღირებულების მეთოდოლოგიით ანაზღაურება აირჩია. ბელა გველესიანს თბილისის მერიამ თანხა 28 ივლისს გადაურიცხა, 29 ივლისს კი მას ფული უკვე ანგარიშზე ჰქონდა და აღნიშნული ბინა გადაიფორმა. გველესიანების ოჯახმა ორი ბინის შეძენის გადაწყვეტილება მიიღო. მეორე ბინის შეძენას ოჯახი უახლოეს პერიოდში აპირებს.
„მინდა მივულოცო ბელა გველესიანის ოჯახს შენაძენი, სამწუხაროდ ქალბატონი ბელას ოჯახი მოხვდა პირველი კატეგორიის დაზარალებულებში, შესაბამისად მისი სახლი სრულად იყო განადგურებული. ეს არის სამსულიანი ოჯახი, მათ აირჩიეს საბაზრო ღირებულების მეთოდოლოგია. ფული ქალბატონ ბელას ჩაერიცხა სამშაბათს, ხოლო ოთხშაბათს უკვე ანგარიშზე ჰქონდა თანხა და გაფორმებული ჰქონდა აღნიშნული ბინა. მან და მისმა ოჯახმა მიიღო გადაწყვეტილება, რომ შეეძინათ ორი ბინა. შესაბამისად ერთი არის ეს ბინა, ხოლო მისი და ჩარიცხული თანხით შეიძენს მეორე ბინას. ჩვენ ვიმედოვნებთ, რომ დანარჩენი ოჯახებიც, რომელთაც თანხები ჩაერიცხათ, ასევე მალე მოახერხებენ ბინის შეძენას“, – განაცხადა დიმიტრი ქუმსიშვილმა.
ბელა გველესიანის განცხადებით, თბილისის მერიამ პროცედურების მოკლე ვადებში წარმართვა მოახერხა.
„ძალიან კმაყოფილი ვარ მერიის და გამგეობის მუშაობით. მოკლე ვადებში მოგვარდა ყველაფერი. მიუხედავად სახელმწიფოში არსებული პრობლემებისა, ჩვენი პრობლემა ძალიან სწრაფად მოგვარდა“, – განაცხადა ბელა გველესიანმა.
გველესიანების ოჯახის გარდა, თბილისის მერიამ კომპენსაცია კიდევ ხუთ ოჯახს ჩაურიცხა. გადარიცხული თანხა 1 333 690 ლარს შეადგენს. მოცემულ ეტაპზე 48 ოჯახიდან შეთანხმება მიღწეულია 30 ოჯახთან, ჯამში 147 ადამიანთან. მათგან 13 ოჯახი დაეთანხმა თანხის ანაზღაურებას ოჯახის სულადობის მიხედვით, ხოლო 17 – მათ საკუთრებაში არსებული ქონების საბაზრო ღირებულებით ანაზღაურებას. მიღწეული შეთანხმების შემდეგ თბილისის მერია აღნიშნულ ოჯახებს უახლოეს მომავალში მათთვის შექმნილ ანგარიშზე 8 800 784 ლარს გადაურიცხავს.
