დღეს ლანჩხუთის "გურიამ" წინასასეზონო სამზადისის ფარგლებში ბოლო, მეათე შეხვედრა გამართა ქვედალიგელ ხონის "იმერეთთან" და მარცხს ბოლო წუთებში მოსიაშვილის გოლით გადაურჩა. საკონტროლო ტესტ – მატჩების შედეგებიდან გამომდინარე, კახა გოგიჩაიშვილის გუნდს აქამდე შთამბეჭდავი სერია ქონდა. ამას რამდენიმე დღის წინ ქობულეთში გამართული თამაშიც შეემატა, სადაც გურულებმა ქვეყნის ვიცე – ჩემპიონი ბათუმის "დინამო" 3: 1 დაამარცხეს. ამ სამი გოლიდან ორი ვანო წილოსანმა გაიტანა, ერთიც კი – ჩაფიძემ.
ლანჩხუთელებმა დღევანდელი მატჩის გათვალისწინებით 10 ამხანაგური თამაში გამართეს და აქედან 6 მოიგეს, ოთხი ფრედ ითამაშეს, მარცხი კი ერთხელაც არ უწვნევიათ. ბურთების შეფარდება 24-8 – ზეა. ყველაზე მეტი გოლი ვანო წილოსანმა გაიტანა. ეს ბიჭი ერთ დროს საქართველოს 17 წლიანთა ნაკრებში თამაშით გამოირჩეოდა და მას შემდგომ ერთგვარად ჩრდილში მოექცა. "გურიის" ძირითადში მოხვედრის მერე გაიხსნა და 6 გოლით კლუბის წამყვან მეგოლედაც იქცა.
3 – 3 გოლი გაიტანეს ს. ბახიამ, ჯიქიამ და ციცხვაიამ, თუმცა, ეს უკანასკნელი უკვე წასულია გუნდიდან. ორ – ორჯერ იხეირეს კილაძემ, მოსიაშვილმა და ჩაფიძემ, ხოლო თითოჯერ – ზაქრაძემ, ნინიკაშვილმა და ნ. ნარიაშვილმა.
გუნდიდან ექვსი გამოცდილი ფეხბურთელის სკანდალურად დათხოვნის შემდგომ კლუბში ორ ლეგიონერს ელიან. როგორც მოსალოდნელი იყო ისევ დაბრუნდა უკრაინელი დმიტრი ზაზულია, ხოლო კოტდიუარელი ბოტი გუა დემელი მალე შეემატება გურულ სამწყსოს. 26 წლის დემელი ფორვარდია და 2012 – 13 წლების სეზონში "ზესტაფონის" ღირსებას იცავდა. მაშინ სათასო ორრაუნდიან ბრძოლაში მან ორჯერ მოახერხა გურულების კარის დალაშქვრა. აფრიკელ ლეგიონერს საქართველოს გარდა უთამაშია საფრანგეთის, ესპანეთის, პორტუგალიისა და სომხეთის სხვადასხვა ლიგებში.
ლანჩხუთის "გურია" საქართველოს ჩემპიონატის პირველ კალენდარულ მატჩს 14 აგვისტოს გამართავს და ლანჩხუთში ბოლნისის "სიონს" უმასპინძლებს.
