ერთი წლის ანგარიშით ოზურგეთის მუნიციპალიტეტის გამგებელი მერაბ ჭანუყვაძე ამომრჩევლის, ადგილობრივი ხელისუფლების, საჯარო მოხეელების, არასამთავრობო ორგანიზაციის და მედიის წარმომადგენლების წინაშე წარსდგა.
ადგილობრივი თვითმმართველობის კოდექსის თანახმად, მუნიციპალიტეტის გამგებელი წელიწადში ერთხელ მაინც, მუნიციპალიტეტის საკრებულოს რეგლამენტით დადგენილი წესით, წარუდგენს ანგარიშს გაწეული საქმიანობის შესახებ.
ღონისძიება ალექსანდრე წუწუნავას სახელობის დრამატულ თეატრში შედგა. ერთი საათისა და ოცი წუთის განმავლობაში მერაბ ჭანუყვაძემ იმ საქმეების და პროექტების შესახებ ისაუბრა, რომელიც 2014 წლის 2 აგვისტოდან დღემდე მის გუნდთან ერთად გააკეთა.
"მზად ვარ თქვენს წინაშე ვისაუბრო ყველა იმ თემაზე და ყველა იმ დაპირებაზე, რომელსაც წინასაარჩევნოდ დაგპირდით. მოგეხსენებათ, რომ საქართველოში განხორციელდა ადგილობრივი თვითმმართველობის რეფორმა, რის საფუძველზე თვითმმართველი ერთეულები გაიყო, მათ შორის ოზურგეთის მუნიციპალიტეტი და შეიქმნა ქალაქ ოზურგეთის მუნიციპალიტეტი და თვითმმართველი თემი – ოზურგეთის მუნიციპალიტეტი. ადგილობრივი თვითმმართველობის რეფორმამ, ქვეყნის ისტორიაში პირველად მისცა ამომრჩეველს უფლება გამგებელი აერჩია არჩევნების გზით." – თქვა სიტყვით გამოსვლის დროს მერაბ ჭანუყვაძემ.
მან ისაუბრა ტურიზმის განვითარებაზეც. მერაბ ჭანუყვაძის თქმით, ურეკში, შეკვეთილში და გომისმთაზე სამი წლის განმავლობაში ყველა ის პრობლემა მოგვარდება, რაც ამ დრომდე მოუგვარებელი იყო.
" ყველაფერს ვაკეთებთ და გავაკეთებთ იმისთვის, რომ რაც შეიძლება მეტი ტურისტი მოვიზიდოთ და შევუქმნათ დასასვენებლად კარგი პირობები". – განაცხადა გამგებელმა.
მერაბ ჭანუყვაძეს ამომრჩევლებმა კითხვითაც მიმართეს. რამდენიმე სოფლის მკვიდრი გზის პრობლემის მოგვარებას ითხოვდა. ასევე დაისვა შეკითხვა, საჯარო მოხელეთა კონკურსის არაობიექტურად ჩატარებაზე.
– კარგია, რომ ჭანიეთში სკოლა და ბაღის მშენებლობა იწყება, მაგრამ იქ მისასვლელი გზა გასაკეთებელი, – თქვა შეხვედრაზე სოფელ ჭანიეთში მცხოვრებმა.
– მინდა განვაცხადო, რომ კონკურსი ჩატარდა ობიექტურად და სამართლიანად. კონკურსის დასრულდების შემდეგ რამდენიმე კონკურსანტმა სასამართლოსაც მიმართა, მაგრამ ჩვენ ყველა პროცესი მოვიგეთ. თავიდან 137 ადამიანზე იყო გამოცხადებული კონკურსი და 400-სზე მეტმა ადამიანმა მიიღო მონაწილეობა.
რაც შეეხება გზების საკითხს, ყველა სოფელში ეტაპობრივად მოგვარდება ეს საკითხი. – განაცხადა გამგებელმა.
შეხვედრის დასასრულს სიტყვით გამოვიდნენ გურიის გუბერნატორი გია სალუქვაძე, ოზურგეთის მუნიციპალიტეტის საკრებულოს თავმჯდომარე დავით დარჩია და ოზურგეთის დეპუტატი საქართველოს პარლამენტში ზვიად კვაჭანტირაძე.
