მხარისა და ადგილობრივი ხელისუფლების წარმომადგენლებმა გურიაში, 2008 წლის რუსეთ-საქართველოს ომში დაღუპულთა ხსოვნას პატივი მიაგეს და მათ ოჯახებს მიუსამძიმრეს.
"დღეს 7 წელი გავიდა რუსეთ-საქართველოს ომიდან. ჩვენ პატივი მივაგეთ გურიის რეგიონიდან დაღუპული გმირების ხსოვნას. მათი გმირობა შეუფასებელია, მათი საქციელი კი – სამაგალითო. მსხვერპლი, რომელიც ჩვენმა ჯარისკაცებმა გაიღეს აუცილებლად იქნება საწინდარი ჩვენი ტერიტორიული მთლიანობის აღდგენისა. ჩვენ ყოველთვის მზად ვართ, გარდაცვლილ გმირთა ოჯახებს გვერდში დავუდგეთ და დავეხმაროთ",- აღნიშნა გურიის გუბერნატორმა გია სალუქვაძემ.
აგვისტოს ომში დაღუპული გმირების მემორიალი და საფლავები დღეს, სახელმწიფო რწმუნებულმა-გუბერნატორმა გურიის მხარეში გია სალუქვაძემ, ქალაქ ოზურგეთის მერმა ბეგლარ სიორიძემ და ოზურგეთის მუნიციპალიტეტის გამგებელმა მერაბ ჭანუყვაძემ, საქართველოს თავდაცვის სამინისტროს წარმომადგენლებსა და ადგილობრივი ხელისუფლების სხვა წევრებთან ერთად გვირგვინებით შეამკეს. ომში დაღუპულ გმირის საფლავთან ოზურგეთის საკათედრო ტაძრის მოძღვარმა გარდაცვლილთა სულის მოსახსენიებელი პანაშვიდიც აღავლინა.
2008 წლის 8 აგვისტოს საომარი მოქმედებების დროს გურიიდან 9 სამხედრო დაიღუპა: ოზურგეთიდან – თეიმურაზ ჭიტაძე, თამაზ ნიკიტინი, ზაურ თენიეშვილი. ჩოხატაურიდან – მერაბ ახობაძე, ფილიპე მგალობლიშვილი, მურთაზ ირემაძე. ლანჩხუთიდან – ემზარ წილოსანი, რუსლან წულაძე, ვასილ სმირნოვი.
აგვისტოს ომის 7 წლისთავთან დაკავშირებით რეგიონის ოთხივე მუნიციპალიტეტის ხელმძღვანელობამ, ომში დაღუპულთა ოჯახებს ანგარიშზე ფულადი თანხა ჩაურიცხა. ადგილობრივი ხელისუფლებისგან მათ ფასიანი საჩუქრებიც გადაეცათ.
(R)
