ქალაქ ოზურგეთში, თხილის მიმღები უამრავი პუნქტია გახსნილი. პუნქტებში დასაქმებულები თხილის ფასის ყოველდღიურ ცვლილებაზე ნაკლებად საუბრობენ.
_ რაღა მე მომადექი ამ საკითხზე სასაუბროდ. ასობით პუნქტია გახსნილი და შეგიძლიათ, იქ იკითხოთ, _ გვითხრა ერთ-ერთ ასეთ პუნქტში დასაქმებულმა მამაკაცმა.
"გურია ნიუსმა" 20-მდე პუნქტი მოიარა. ვინაობის დასახელებისგან ყველა რესპონდენტი თავს იკავებს.
_ რა ღირს ერთი კილოგრამი თხილი?
_ "გულშიშველა" 4 ლარი ღირს, კარგი თხილი კი _ 6 ლარი.
_ ყოველდღიურად დღეში სამჯერ მაინც იცვლება თხილის მიღების ფასი. ამასთან დაკავშირებით რას გვეტყვით?
_ რა ვიცი, აბა. ხანდახან არ მოდიან, ვისაც თხილი მიაქვთ და ვინც უნდა გაიტანონ ოზურგეთიდან. ამ წუთებში, მაგალითად, "გულშიშველას" კლიენტი არ არის და ამიტომ მოხდა ფასის ცვლილება. ფულთან არის დაკავშირებული ეს ყველაფერი. თუ კლიენტს, რომელიც ჩვენგან თხილს ყიდულობს, არ აქვს ფული, არც ჩვენ გვაქვს.
_ გვაქვს ინფორმაცია, რომ ზუგდიდში გურიიდან წაღებული თხილის ხარისხი დაიწუნეს, ეს სიმართლეა?
_ ძალიან ცუდი ხარისხის თხილი არის. მეტი არაფრის თქმა შემიძლია.
რას უკავშირდება ყოველდღე თხილის ფასის ცვლილება ამ კითხვით ოზურგეთელებს მივმართეთ.
ეთერ ერისთავი: ეს ნამდვილად არ ვიცი. ვიცი ის, რომ წელს კარგი ფასი აქვს თხილს, წინა წელსაც თხილის ფასი კარგი იყო.
თემურ სანიკიძე: ჩემთვის მთავარია, თხილის ფასი იყოს მაღალი, რომ ოჯახი გამოვკვებო. გლეხმა რა იცის, რას უკავშირდება თხილზე ფასის ცვლილება.
აკაკი სალუქვაძე: ხშირად დავდივარ ქალაქში, თუ მომეწონება თხილის ფასი, ჩავაბარებ, თუ არა _ წავიღებ სახლში. არავინ ამ პრობლემის მომგვარებელი არ არის, ყველა საკუთარ გამდიდრებაზე ფიქრობს.
ნუნუ ჩხაიძე: ყველაფერი ერთდროულად არ იქნება. მთავარია, რომ სეზონის დასაწყისში თხილი კაპიკები არ ღირს.
"როგორც წინა წლებში იყო, ახლაც ასე არის. ერთხელ და სამუდამოდ, ხომ უნდა მოგვარდეს ეს პრობლემა. ყოველდღე როგორ შეიძლება თხილის ფასი ხან მაღალი იყოს და ხან კიდევ დაბალი. გუშინ (კომენტარი ჩაწერილია 11 აგვისტოს) "გულშიშველა" 5 ლარზე მეტი ღირდა და დღეს კიდევ 4 ლარზე დაეცა მისი ფასი. ვფიქრობ, რომ "თხილის მაფიოზები" აკეთებენ ამ ყველაფერს. ჩვენ, ხალხს კი დაგვაწყდა ნერვები. ეს არის ერთადერთი შემოსავალი და ხომ შეიძლება, სამი ან ოთხი დღე არ მერყეოდეს თხილზე ფასები. მახსოვს, წინა წლებში კაპიკებში ვაბარებდით, ახლა ეს პრობლემა აღარ არის", _ თქვა "გურია ნიუსთან" საუბრის დროს სოფელ ძიმითში მცხოვრებმა 58 წლის ქალბატონმა, რომელმაც ვინაობის დასახელებისგან თავი შეიკავა.
გურიის გუბერნატორის, გია სალუქვაძის თქმით, ქართული თხილის გატანა ევროპის ბაზარზე უკვე დაიწყო და ამ დარგის განვითარებას საკმაოდ დიდი პერსპექტივა აქვს. შარშანდელთან შედარებით, თხილის მოსავალი რეგიონში წელს საკმაოდ მაღალია. თხილის ფასს სახელმწიფო არ აწესებს და ყველაფერი ბაზარზეა დამოკიდებული: _ მოგეხსენებათ, რომ თხილის კრეფა ახლახან დაიწყო. გურიიდან თხილის გარკვეული რაოდენობა გაედინება. სამეგრელოში თხილის მიღებისთვის ინფრასტრუქტურა გაცილებით ადრე შეიქმნა. რაც შეეხება გუბერნატორის რაიმე სახით ბიზნესში ჩარევას, ეს გამორიცხულია. თუმცა, გარკვეულწილად, მოვლენებს ვაკვირდებით, ამ მიმართულებით ვაგრძელებთ მონიტორინგს, რათა არ შეიზღუდოს და შეილახოს ფერმერთა უფლებები. საბედნიეროდ, მსგავსს მომართვიანობას ადგილი არ ჰქონია, _ თქვა გია სალუქვაძემ.
ზუგდიდში, 11 აგვისტოს მდგომარეობით, თხილის მიმღებ პუნქტებში ერთი კილოგრამი თხილი 6 ლარი და 30 თეთრი ღირს. ზუგდიდის თხილის ქარხნის ერთ-ერთი მფლობელი, ელდარ მაფორია ამბობს, რომ თხილის ფასზე ცვლილებას ბაზარი განაპირობებს.
_ ზუსტად არ ვიცი, რა ხდება ოზურგეთში, მაგრამ შემიძლია გითხრათ, რომ ბაზარზე ფასები ყოველთვის მერყევია. თუ ბევრმა ქარხანამ დაიწყო მუშაობა, რა თქმა უნდა, მოთხოვნა იზრდება და შესაბამისად, ფასიც იზრდება. ახლა, ალბათ, ფასები უკან წამოვა. როგორც გავიგეთ, ევროპაში თხილის ფასი დაბლა ეცემა. სავარაუდოდ, საქართველოში თხილის ფასი ხუთ ლარამდე დაიწევს, _ გვითხრა ელდარ მაფორიამ.
"გურია ნიუსი" ზუგდიდში, ასევე, დაუკავშირდა თხილის ქარხნის კიდევ ერთ მფლობელს, ნონა ხარებავას:
_ ოზურგეთიდან რომ არ დამირეკოს კორესპონდენტმა ზუგდიდში, არ შეიძლება? არ შეწუხდე მაგაზე, დროც არ მაქვს. კარგად ბრძანდებოდეთ, _ გვიპასუხა ხარებავამ.
