"საქართველოს გაერთიანებული წყალმომარაგების კომპანიამ, " 2012 წელს, ლანჩხუთში, ქალაქის ცენტრალურ სკვერში, საზოგადოებრივი ტუალეტი ააშენა. მაშინ, ქვეყნის მასშტაბით, 33 ასეთი ტუალეტის მშენებლობისთვის 2 მილიონ 300 ათას ლარამდე გამოიყო, საიდანაც ლანჩხუთზე 48 ათას ლარამდე გაიხარჯა.
თუმცა, სამი წლის განმავლობაში, სკვერში არსებულ საზოგადოებრივ ტუალეტს ერთი დღეც არ უმუშავია.
ამ დროის განმავლობაში არც იმაზე უზრუნია ვინმეს, რომ შენობა დაეცვა. ახლა, ქალაქის ცენტრში არსებული ერთადერთი ტუალეტი უფუნქციო და დაზიანებულია _ შენობის გარეთა კარი დამტვრეულია, საკეტები, ფაქტობრივად, აღარ არსებობს. უკეთესი მდგომარეობა არც შენობის შიგნითაა.
_ როგორ შეიძლება ადამიანს მსგავსი მავნებლობა ამოძრავებდეს?! რა მნიშვნელობა აქვს, რომელმა მთავრობამ გააკეთა?! რაც გაკეთებულია, იმას უნდა გავუფრთხილდეთ და შევინარჩუნოთ, თორემ მოგვიწევს ასე, სულ ერთი ადგილის ტკეპნა. რატომ არავინ აქცევს ყურადღებას, რა ხდება ქალაქის ცენტრში?! _ გვითხრა ერთ-ერთმა ქალბატონმა.
საზოგადოებრივი ტუალეტი, რამდენიმე თვეა, ლანჩხუთის მუნიციპალიტეტის ბალანსზეა.
_ ქალაქის სკვერში მდებარე აღნიშნული ობიექტი "გაერთიანებული წყალმომარაგების კომპანიამ" მიმდინარე წელს გადმოგვცა ბალანსზე. ახლა დაინტერესებულები ვართ, იგი იჯარით გავცეთ. ძალიან მოუვლელი და დაზიანებულია იქაურობა, _ ამბობს ჩვენთან საუბრისას გამგეობის ქონების მართვის, ეკონომიკისა და სოფლის მეურნეობის განვითარების სამსახურის უფროსი გოგი ფაცურია.
ფაცურიასგან განსხვავებულ ინფორმაციას გვაწვდის ლანჩხუთის მუნიციპალიტეტის გამგებელი ზაზა ურუშაძე:
_ ცენტრში არსებული ტუალეტი არ არის ჩვენს ბალანსზე. ვგეგმავთ, რომ გადმოცემა მოვითხოვოთ და ფასიანი გავხადოთ, _ აღნიშნა გამგებელმა.
მისივე ინფორმაციით, გაურკვეველია თუ ვის ბალანსზე იმყოფება ყოფილი უნივერმაღის უკან, ჟორდანიას ჩიხში მდებარე უფუნქციო ტუალეტი, რომელიც 2002 წელს, მაშინდელმა ქალაქის მერიამ ააშენა და მისმა სრულმა ღირებულებამ, პროექტის ჩათვლით, 13 730 ლარი შეადგინა და რომელიც დღეს, ასევე პრობლემატურია ლანჩხუთელებისთვის.
_ ის არაფერი არ არის და სარემონტოა. ცენტრში არსებული ტუალეტი საკმაოდ დიდია, ყველას ეყოფა და ვფიქრობთ, რომ ორი საჭირო არ არის. ამ თემაზე ახლა მიმდინარეობს მუშაობა, _ დასძინა გამგებელმა.
საკრებულოს წევრ რომან ბიწაძეს, რომელიც 2002 წელს ქალაქის მერის მოადგილის პოსტს იკავებდა, უკვირს თუ რატომ არ არის აყვანილი მუნიციპალიტეტის ბალანსზე ჟორდანიას ჩიხში მდებარე საზოგადოებრივი ტუალეტი:
"თავის დროზე, ეს ობიექტი ქალაქის ბალანსზე იყო. როცა 2006 წელს თვითმმართველობის კოდექსში ცვლილებები შევიდა და პირველი დონის მმართველობები გაუქმდა, ყველაფერი სამართავად მუნიციპალიტეტებს გადაეცათ, ეტყობა, მაშინ მოხდა გაუგებრობა, დაავიწყდათ ობიექტის ინვენტარიზაცია.
მაშინ საზოგადოებრივი ტუალეტის მშენებლობაზე სამუშაოები საკმაოდ ხარისხიანად ჩატარდა, მისი კანალიზაცია სრულ წესრიგშია და დღემდე გამართულად მუშაობს. მასზეა მიერთებული ცენტრალური ბიბლიოთეკისა და იქვე მდებარე ე. წ. "კესოს დარბაზის" საკანალიზაციო მილები. ასე რომ, თუკი მოინდომებენ, ძალიან მარტივად შეიძლება ამ ტუალეტის აღდგენა. ისე, ძალიან კარგი იქნება თუ ამ საკითხით ვინმე დაინტერესდება, ზედამხედველობის სამსახური კი მიმდებარე ტერიტორიაზე არსებულ ანტისანიტარიაზე მეტად გაამახვილებს გაამახვილებს ყურადღებას და ვისაც საჭიროა, სიტუაციის გამოსწორებისკენ მიუთითებს. ძალიან ბევრი მოქალაქე მომმართავს ამ საკითხთან დაკავშირებით და დახმარებას მთხოვს. ფაქტია, რომ არ შეიძლება ქალაქში საზოგადოებრივი ტუალეტი არ არსებობდეს", _ გვითხრა ბიწაძემ.
საზოგადოებრივი ტუალეტი რომ მართლაც აუცილებელია, ეს თვალნათლივ გამოჩნდა ქალაქის ცენტრში გამართული ქორეოგრაფიული ფესტივალის მიმდინარეობის დროსაც, რადგან ტუალეტის მოვალეობა მიმდებარე ტერიტორიაზე არსებული მრავალბინიანი საცხოვრებელი სახლების სადარბაზოებმა შეასრულეს. მუნიციპალიტეტის ბიუჯეტიდან ფესტივალის ორგანიზებისთვის კი 13 ათას ლარზე მეტი გაიხარჯა.
აღსანიშნავია, რომ საზოგადოებრივი ტუალეტი გაერთიანებულმა წყალმომარაგების კომპანიამ ჩოხატაურშიც გააკეთა. საფეხბურთო სტადიონის შესასვლელში არსებული შენობა წლებია უფუნქციოა, და ლანჩხუთის ტუალეტის მსგავსად დაზიანებული. უფრო მეტიც, ჩოხატაურში მშენებლებმა გამჭვირვალე კარი ტუალეტს უკაღმა დააბნიეს _ შიგნით მყოფი გარეთ არსებულ სიტუაციას ვერ ხედავს, გარეთ მყოფისთვის კი თუ რა ხდება ტუალეტში, ადვილი დასანახია. ამას ისიც ემატება, რომ უნიტაზები ერთმანეთის გვერდით, გამყოფი კედლების გარეშეა დადგმული, როგორც გურულები ხუმრობენ, "ერთად და ჯიგრულად ყველაფერი კარგია!"
ასე თუ ისე, საზოგადოებრივი ტუალეტის არარსებობა ჩოხატაურის ერთ-ერთ ყველაზე ხალხმრავალ ადგილას პრობლემას წარმოადგენს.
ჩოხატაურის მუნიციპალიტეტის გამგებელი ირაკლი კუჭავა ამბობს, რომ ტუალეტი გამგეობის ბალანსზე არ არის:
_ ცოტა ხნის წინ გვქონდა საუბარი ამ საკითხზე გაერთიანებული წყალმომარაგების კომპანიის წარმომადგენლებთან. კანონის შესაბამისად ტუალეტი გადაეცემა ეკონომიკის სამინისტროს, სამინისტრო კი ჩვენ გადმოგვცემს. ამის შემდეგ საზოგადოებასთან ერთად მოვიფიქრეთ, რა გაკეთდეს იმ ადგილზე, რომელიც შეცვლას აუცილებლად საჭიროებს, _ გვითხრა გამგებელმა.
საზოგადოებრივი ტუალეტი ლანჩხუთში
საზოგადოებრივი ტუალეტი ჩოხატაურში
