სახლი, რომელსაც პირობითად შეიძლება ეწოდოს საცხოვრებელი, მეწყერსაშიშ ზონაშია _ მიწა ცოცავს და კედლები ყოველდღე სცილდება ერთმანეთს, სახლში წვიმა ჩამოდის, იატაკი იმდენად დაზიანებულია, რომ რამდენიმე ადამიანის ერთად გავლა საფრთხეს ქმნის; დაბზარული კედლებიდან წყალი და ქარი ერთნაირად შედის; ოჯახი გაუსაძლის პირობებშია და დიდი ხანია ხელისუფლებისგან დახმარებას ითხოვს.
_ იმის გამო, რომ ფართი არ გვყოფნის, ჩემი მეუღლე ღამეს სახლში ვერ ათევს. 12 წელია, ასეთ მდგომარეობაში ვართ. ჩვენი ერთადერთი შემოსავალი სოციალური დახმარებაა. ბოლო დროს, ჩემი ორწლინახევრის შვილიშვილი ავადმყოფობს და ამიტომ, დახმარება სესხად წინასწარ ავიღეთ, წამლები რომ გვეყიდა. წამლები კი ძალიან ძვირი ღირს, _ აღნიშნა ჩვენთან საუბრისას ახალაძეების ოჯახის დიასახლისმა, ხათუნა ახალაძემ.
მისივე თქმით, ადგილობრივ ხელისუფლებას დახმარებისთვის რამდენჯერმე მიმართეს, თუმცა, უშედეგოდ: _ გამგეობაში ხან მე დავდიოდი, ხან ჩემი მეუღლე, შვილები და ჩემი ფეხმძიმე რძალიც. მხოლოდ დაპირებებით გვისტუმრებდნენ _ ხან საშენ მასალას, ხან ფულად დახმარებას გვპირდებოდნენ, ბოლოს საერთოდ უარი გვითხრეს.
_ კონკრეტულად ვის მიმართეთ დახმარების თხოვნით?
_ ივანე ცინცაძეს (ჩოხატაურის მუნიციპალიტეტის გამგეობის სოციალური სამსახურის უფროსი). თუმცა, უშედეგოდ. ახლა სოფელ კოხნარში არსებული ბინები შემოგვთავაზეს საცხოვრებლად. ვნახე და ჩემს სახლზე უკეთესი არაა _ იქაც ანალოგიური მდგომარეობაა. აქ საყანე ფართობი მაინც გვაქვს. მართალია, მიწა ნაკლებ მოსავლიანია, მაგრამ მაინც ვახერხებთ, რომ რაღაც მოსავალი მივიღოთ და შიმშილით არ მოვკვდეთ, _ ამბობს ხათუნა ახალაძე.
გამგეობის სოციალური სამსახურის უფროსი, ივანე ცინცაძე ამბობს, რომ ახალაძეებისთვის არანაირი დაპირება არ მიუცია. ცინცაძემ კითხვების დასმა წერილობით მოითხოვა და პასუხიც ამავე ფორმით მოგვაწოდა.
_ ბატონო ივანე, იცნობთ თუ არა ჩოხატაურის მუნიციპალიტეტის სოფელ წიფნარში მცხოვრებ გურამ ახალაძის ოჯახის პრობლემებს?
_ აღნიშნული ოჯახის პრობლემები შეისწავლა ჩოხატაურის მუნიციპალიტეტის გამგეობის სოციალურ საკითხთა სამსახურმა.
_ როგორც აღნიშნული ოჯახის წევრები ჩვენთან საუბრისას ამბობენ, მათ კონკრეტულად თქვენ რამდენჯერმე მოგმართეს. ჯერ ფულადი დახმარებას დაჰპირდით, შემდეგ სამშენებლო მასალებს, ბოლოს კი სულ არ დაეხმარეთ. რას გვეტყვით ამასთან დაკავშირებით?
_ სოციალურ სამსახურს მოქალაქე გურამ ახალაძის ოჯახისთვის არ შეუთავაზებია არც ფულადი და არც სამშენებლო მასალებით დახმარება. მხოლოდ და მხოლოდ შეთავაზებული იყო ალტერნატიული საცხოვრებელი ფართი _ კოხნარის ყოფილი სკოლა-ინტერნატის საერთო საცხოვრებელში, რაზედაც თავიდან განაცხადეს უარი, ხოლო მოგვიანებით, გასული წლის დეკემბერში, განაცხადეს თანხმობა.
_ ახალაძეებმა ისიც გვითხრეს, რომ მათ კოხნარში არსებულ ბინებში ცხოვრება შესთავაზეთ, თუმცა, აღნიშნავენ, რომ იქ ცუდი საცხოვრებელი პირობებია და არაფრით ჩამოუვარდება მათ ამჟამინდელ საცხოვრებელს. გარდა ამისა, საინტერესოა, იმ შემთხვევაში თუკი ეს ადამიანები მართლაც გადავლენ ბინებში, მიეცემათ თუ არა ნაკვეთი სამეურნეო საქმიანობისთვის და სად?
_ იმ საცხოვრებელ პირობებზე, სადაც აღნიშნული ოჯახი ცხოვრობს (ნალიის ქვეშ), გაცილებით უკეთესი საცხოვრებელი პირობები არის სკოლა-ინტერნატის საერთო საცხოვრებელში. იქ გადასვლის შემთხვევაში, ოჯახი დაკმაყოფილებული იქნება საბოსტნე მიწის ნაკვეთით, _ ასეთია ცინცაძის წერილობითი კომენტარი ახალაძეების ოჯახის პრობლემასთან დაკავშირებით.
