საბერძნეთის პრემიერ-მინისტრმა ალექსის ციპრასმა თანამდებობა დატოვა. მან სატელევიზიო მიმართვით პრეზიდენტს არჩევნების უმოკლეს ვადაში ჩატარება სთხოვა. ამის შესახებ ინფორმაციას EURONEWS ავრცელებს.
მაუწყებლის ინფორმაციით, ციპრასი იმედოვნებს, რომ კრედიტორებისგან მესამე სესხის მიღების შემდეგ პარტიისა და ქვეყნის შიგნით კრიზისისგან გამოწვეული არეულობა და აზრის გაყოფა დამთავრდება.
"ჩემი მთავრობითა და ჩემი ბრძოლით ვამაყობ. ჩვენ ვიბრძოდით,რომ ხალხისთვის მიცემული დაპირებები შეგვესრულებინა. მოლაპარაკებებს ინტენსიურად და დაჟინებით ვაწარმოებდით, თუმცა ჩვენ წინააღმდეგ ზეწოლას და შანტაჟს ჰქონდა ადგილი. მართალია, ჩვენ ლიმიტს მივაღწიეთ, მაგრამ ბერძნების საკითხი საერთაშორისო საკითხად ვაქციეთ."_განაცხადა სატელევიზიო მიმართვაში ალექსის ციპრასმა.
მაუწყებლის ცნობით, ციპრასი საბერძნეთის კრედიტორებთან გარიგების უკეთესი პირობების მისაღწევად იბრძოდა, თუმცა იძულებული გახდა ეკონომიკურ რეფორმებს და მათ მკაცრ პირობებს დათანხმებოდა.
EURONEWS-ის კორესპონდენტის თქმით, მოსალოდნელია ალექსის ციპრასი თავისი პარტიის პოპულარულობით სარგებლობას აპირებდეს, ამიტომ მას რამდენიმე დღის შემდეგ აუცილებლად მოუწევს ბერძენ ამომრჩევლებს აუხსნას, თუ რამ გახადა იძულებული, წინასაარჩევნო პერიოდში უკან დაეხია.
როგორც სამთავრობო წყაროები იუწყებიან, საბერძნეთში არჩევნები 20 სექტემბერს ჩატარდება.
