საქართველოს საფეხბურთო ჩემპიონატის მეორე ტურის დასკვნითი ექვსი შეხვედრა გაიმართა. ქობულეთში იქაურმა "შუქურამ" ლანჩხუთის "გურიას" უმასპინძლა და 2:1 იმარჯვა. მატჩი სტუმრებმა იღბლიანად დაიწყეს და უკვე მერვე წუთზე ნიკა მაისურაძემ ანგარიში გახსნა.
ამ გოლმა ქობულეთელები ერთი ხანი დააბნია და სტუმრებს მეორე გოლის გატანაც შეეძლოთ, თუმცა, ამაოდ. ამასობაში "შუქურა" ათამაშდა, რასაც გარკვეულწილად ლოგიკური საპასუხო გოლი მოჰყვა, რომელიც 36 – ე წუთზე თენგიზ წიქარიძემ გაიტანა.
შესვენების შემდგომაც დიდი ვერაფერი სანახაობა იყო და მატჩი ფრისკენ მიდიოდა, თუმცა 85 – ე წუთზე სტუმართა საჯარიმოს მისადგომებთან ჯარიმა დაინიშნა. ჩაწოდებულ ბურთზე ისევ წიქარიძემ ივარგა და ზუსტი დარტყმით დუბლიც მიითვალა და საკუთარ გუნდს 3 ქულაც შემატა.
დარჩენილ წუთებში კახა გოგიჩაიშვილის შეგირდებმა თამაშის გადარჩენა სცადეს, მაგრამ აქედან არაფერი გამოვიდა. ერთ ეპიზოდში მსაჯმა მასპინძლები დაინდო და გია ჩადუნელის წაქცევა პენალტად არ მონათლა. არადა, დავით ხარიტონაშვილს შეეძლო ეს გაეკეთებინა.
ამ წაგებით "გურია" ერთი ქულით დარჩა და მე -12 ადგილზე აღმოჩნდა. აჭარულმა კლუბმა კი მოგებით მეათეზე გადაინაცვლა.
ორი ტურის შემდგომ 6 ქულით სამი ლიდერი გამოიკვეთა. "სამტრედია", თბილისის "დინამო" და დებიუტანტი "საბურთალო". ამ ტურში მათ შესაბამისად თერჯოლის "საპოვნელა"(სტუმრად 3:2), "ლოკომოტივი" (სტუმრად 4:1) და საჩხერის "ჩიხურა" ( შინ 1:0) დაამარცხეს.
ჯერ კიდევ უქულოდაა "ლოკომოტივი" და "საპოვნელა", ისევე როგორც ფოთის "კოლხეთი" და მარტვილის "მერანი". ფოთელებმა საშინაო მატჩის სტატუსით ლანჩხუთში 0:1 დათმეს ბოლნისის "სიონთან", ხოლო მარტვილელებმა ასევე შინ "ცხინვალთან" – 2:3.
ტურის კიდევ ორი შეხვედრა (გორის "დილა" – ბათუმის "დინამო" და "ზუგდიდი" – ქუთაისის "ტორპედო" )ერთნაირი შედეგით – 1:1 დასრულდა.
მესამე ტური 29 აგვისტოს დაიწყება, ლანჩხუთის "გურია“"კი 30 – ში დებიუტანტ "საპოვნელას" უმასპინძლებს.
