24-30 აგვისტოს ყაზახეთის დედაქალაქი ასტანა ძიუდოს მსოფლიოს ჩემპიონატს უმასპინძლებს,
2015 წლის მსოფლიოს ჩემპიონატი უდიდეს ინტერესს იწვევს, რადგან 2016 წლის რიო დე ჟანეიროს ოლიმპიური თამაშების წინ, წლევანდელი მსოფლიოს ჩემპიონატი ყველაზე მაღალი რანგის ტურნირია ძიუდოში, სადაც სპორტსმენებს ტიტულისთვის ბრძოლასთან ერთად, უმაღლესი სალიცეზიო ქულების მოიპოვების შანსი ეძლევათ.
ჩემპიონატში მონაწილოებას 120 ქვეყნის 729 ძიუდოისტი (432 მამაკაცი, 297 ქალი) მიიღებს, წლის უმთავრესი ტურნირის პირდაპირი ტრანსლაცია კი 160 ქვეყანაში გადაიცემა.
აღსანიშნავია, რომ 24 აგვისტოდან მსოფლიო ჩემპიონატს სრულად აჩვენებს საქართველოს საზოგადოებრივი მაუწყებელი. წინასაწარი შეხვედრები თბილისის დროით ყოველდღიურად დილის 09:00 საათიდან დაიწყება, ფინალური ბლოკი კი 15:00 საათიდან.
საქართველოს ნაკრები მსოფლიოს ჩემპიონატზე 11 სპორტსმენით იასპარეზებს. პირად პირველობაში მონაწილე არ გვეყოლება ორ წონაში – 66-სა და 100-ში, დანარჩენ წონებში კი ევროპის ჩემპიონი, მსოფლიოს პრიზიორი ამირან პაპინაშვილი (60), ევროპისა და ოლიმპიური ჩემპიონი ლაშა შავდათუაშვილი, ევროპის ორგზის ფინალისტი და ევროპული თამაშების ვიცე-ჩემპიონი ნუგზარ ტატალაშვილი (ორივე – 73), ევროპის სამგზის, მსოფლიოსა და ევროპული თამაშების ჩემპიონი ავთანდილ ჭრიკიშვილი, უშანგი მარგიანი (81), ევროპის ორგზის გამარჯვებული, მსოფლიოსა და ევროპული თამაშების ფინალისტი ვალერი ლიპარტელიანი, ბექა ღვინიაშვილი (90), ევროპისა და ევროპული თამაშების ჩემპიონი ადამ ოქრუაშვილი და ლევან მატიაშვილი (+100) გამოვლენ.
გუნდურ შეჯიბრში ამ ძიუდოისტებს ვაჟა მარგველაშვილი (66) დაემატებათ. ქალთა ტურნირში ერთი მონაწილე გვეყოლება – ნატურალიზირებული ჰოლანდიელი ესტერ სტამი (70).
მსოფლიოს ჩემპიონატზე ასტანას ყინულის სპორტის სასახლე "ალაუში" 24-29 აგვისტოს მამაკაცთა და ქალთა შორის მედლები 7-7 წონით კატეგორიებში გათამაშდება, ჩემპიონატის დასკვნითი დღე – 30 აგვისტო კი გუნდურ პირველობას დაეთმობა.
ქართველ ძიუდოისტთა გამოსვლის განრიგი:
24 აგვისტო – ამირან პაპინაშვილი (60)
25 აგვისტო – მონაწილე არ გვყავს
26 აგვისტო – ლაშა შავდათუაშვილი, ნუგზარ ტატალაშვილი (ორივე 73)
27 აგვისტო – ავთანდილ ჭრიკიშვილი, უშანგი მარგიანი (ორივე 81)
28 აგვისტო – ვალერი ლიპარტელიანი, ბექა ღვინიაშვილი (ორივე 90) ესტერ სტამი (70)
29 აგვისტო – ადამ ოქრუაშვილი, ლევან მატიაშვილი (ორივე +100)
30 აგვისტო – გუნდური შეჯიბრება
