“მიკრო და მცირე ბიზნესის სტატუსის მქონე პირებისთვის აკრძალული საქმიანობებისა და შემოსავლების სახეების, რომლებიც არ დაიბეგრება, ანდა რომელზეც არ გავრცელდება სპეციალური დაბეგვრის რეჟიმები განსაზღვრის შესახებ” _ მთავრობის დადგენილებაში ცვლილებების პროექტი პარლამენტში უკვე შესულია. პარლამენტის საფინანსო-საბიუჯეტო კომიტეტმა პროექტი განიხილა და მხარი დაუჭირა.
ფიქსირებული გადასახადის გადამხდელს არ შეეძლება მისი საქმიანობიდან მიღებული საქონლის თუ მომსახურების გამოყენება სხვა რეჟიმით დასაბეგრ საქმიანობაში.
“გურია ნიუსი” დაინტერესდა, თუ რას ფიქრობენ ოზურგეთში მდებარე სალონებისა და თონეების მეპატრონეები და დამქირავებლები ფიქსირებულ გადასახადებთან დაკავშირებით. ისინი ფიქსირებული გადასახადის შემოღებას არასამართლიანად მიიჩნევენ.
თონეების მეპატრონეების ნაწილი ფიქსირებული გადასახადის შემოღებას, რომლის ოდენობა თვეში, საშუალოდ, ერთ თონეზე 100 ლარი იქნება, სამართლიანად მიიჩნევს და “გურია ნიუსთან” საუბარში აღნიშნავს, რომ სალარო აპარატს ფიქსირებული გადასახადი ურჩევნიათ. თუმცა, რა რაოდენობის იქნება გადასახადი და თუ შეძლებენ მის გადახდა, ეს მეორე საკითხია.
სხვა მოსაზრება აქვთ სილამაზის სალონების მეპატრონეებს: _ ვერანაირად ვერ შევძლებთ გადახდას, მაქსიმალურად შემცირდება სალონების რაოდენობა. ხელისუფლებას ჰგონია, რომ ბევრ ფულს ვშოულობთ, მაგრამ ძალიან ცდება. ფიქსირებული გადასახადი უნდა იყოს ხელმისაწვდომი, თუმცა, რა თანხასაც ამბობენ, იმას ნამდვილად ვერ გადავიხდით. ასე ცხოვრება მართლაც შეუძლებელია _ ინდმეწარმეების და მიკრომეწარმეების საშინელი დისკრიმინაცია მიმდინარეობს, _ გვითხრეს ერთ-ერთ სალონში.
ს. ო., ერთ-ერთი სალონის მეპატრონე: _ საქმის კურსში ვარ, თუმცა, არ ვიცი, როგორ განისაზღვრება ეს გადასახადები. ძნელია, ოზურგეთის პირობებში მაღალი გადასახადის გადახდა.
ერთ-ერთ თონეში მომუშავე გია დოლიძე ამბობს, რომ სალარო აპარატს ფიქსირებული გადასახადი ურჩევნია; _ ჩემი აზრით, სალარო აპარატებს ფიქსირებული გადასახადი აჯობებს, გადაიხდი და მორჩა, თუმცა, რა თანხა იქნება განსაზღვრული და რამდენად შევძლებთ გადახდას, სხვა საქმეა.
_ ჩვენ ისედაც არ გვაქვს მუშაობა, არ გვყავს კლიენტები და გადასახადის გადახდას ნამდვილად ვერ შევძლებთ, _ გვითხრეს ქალაქ ოზურგეთის ერთ სალონში.
საუბრისას, განსაკუთრებული პროტესტი მამაკაცების სალონში დასაქმებულებმა გამოთქვეს: _ დაიხურება სალონები. ისედაც არ გვაქვს მუშაობა, ჩვენს უფროსს ვერ ვუხდით გადასახადს და მთავრობას კიდევ რაღა უნდა მივცეთ?
აუცილებლად გავაპროტესტებთ _ როგორ გადავიხდით თვეში 50 ლარს?
_ ვერანაირად ვერ შევძლებთ მუშაობას. ესაა მიკრომეწარმეები გათავისუფლდებიან გადასახადებისგანო? უარესს აკეთებენ? დაიხურება სალონი. ისედაც ყოველდღიური ხარჯები და თვეში უამრავი გადასახადები გვაქვს. როცა სახელმწიფოს იყო სალონები, გადასახადები ოფიციალურად შეგვქონდა, მაგრამ ისინი გვამარაგებდნენ და ხელფასებს გვიხდიდნენ. ახლა სალონები კერძო პირის არის და ჩვენ მას ვუხდით გადასახადს. კიდევ მთავრობას უნდა მივცეთ? _ წუხან “გურია ნიუსთან” საუბარში სალონში მომუშავე სპეციალისტები.
