“ნახეთ გადაცემა თუ რაიმე იყო იქ კრიტიკული” _ “2030”-ში არჩილ გამზარდიას პასუხობენ

გადაცემა "კვირის 2030"-ის წამყვანის არჩილ გამზარდიას განცხადებას, რომლის თანახმადაც გადაცემა დაიხურა და ის გამოუშვეს, "20 30"-ის პროდიუსერი პასუხობს. ენძელა მაჭავარიანის თქმით, გამზარდიას ხელშეკრულება დაუმთავრდა:

_ დაუმთავრდა კონტრაქტი და ჩვეულებრივად წავიდა. რატომ აკეთებს ასეთ განცხადებებს არ მესმის, ჩემთვის გაუგებარია. 

_ გადაცემა არ დახურულა?

_ ზოგს ხურავენ, ზოგს გადააკეთებენ. ჯერჯერობით ამის შესახებ კომენტარს ვერ გავაკეთებ _ შეიძლება სხვა სახით გავიდეს გადაცემა. მენეჯმენტი ამაზე მუშაობს და თუ ეს აინტერესებს გამზარდიას შუეძლია მენეჯმენტს კითხოს და ასე ხელაღებით იმის თქმა, რომ რაღაცა დაიხურა არასწორია. ერთადერთი რაც დაბეჯითებით შემიძლია გითხრათ ის არის, რომ არც არავის გაუგდია და არც რაიმე ზეწოლას ჰქონია ადგილი.

31 ივლისს დაუმთავრდა ხელშეკრულება და როგორც ვიცი გაგრძელებაზე განცხადება არც კი შემოუტანია. ზუსტად ერთი თვე გავიდა და ამ დრომდე არაფერი უკითხავს. განცხადებაში ბიძინა ივანიშვილს და ვასილ მაღლაფერიძეს მადლობაც კი გადაუხადა, რაც თავისთავად გამორიცხავს ზეწოლას და დანარჩენი რაში დასჭირდა ჩემთვის გაუგებარია. 

_ როგორც გამზარდია წერს, ბოლო 5-6 გადაცემა კრიტიკით გამოირჩეოდა… ამას ხომ არ უკავშირდება ცვლილება?

_ ნახეთ გადაცემა თუ რაიმე იყო იქ კრიტიკული. ის იყო ჩვეულებრივი გადაცემა, რომელსაც რა მიზანიც ჰქონდა იმას ასრულებდა. მე მისი თანაპროდიუსერი ვიყავი და შემიძლია დაზუსტებით გითხრათ, რომ არავითარი შენიშვნა არც მენეჯმენტისგან და არც ჩვენი ზემდგომისგან ამ გადაცემებზე არ ყოფილა. არც ყოფილა ისეთი რამე, რომ რაღაც მიუღებელი, გაუთვლელი და გაუთვალისწინებელი ყოფილიყო. ეს იყო ჩვეულებრივი ანალიტიკური გადაცემა, რომელ კრიტიკაზეა საუბარი.

_ ბიძინა ივანიშვილმა "გურია ნიუსთან" ინტერვიუში დააანონსა, რომ ოქტომბრიდან გააქტიურებას გეგმავს… უფრო მეტიც, აღნიშნა, რომ საზოგადოებას ბევრ საინტერესო დოკუმენტს გააცნობს… ეს გადაცემა ძველი ფორმატით იქნება თუ სიახლეებს უნდა ველოდოთ?

_ თუ ეს ბატონმა ბიძინამ თქვა, ალბათ, ასე იქნება. თუმცა, რის წარმოდგენას აპირებს და რომელ გადაცემაში ჩემთვის ცნობილი არ არის. ბატონ ბიძინას არ ჩვევია რამე თქვას და არ გააკეთოს, სხვას ვერაფერს გეტყვი, _ გვითხრა მაჭავარიანმა.

არჩილ გამზარდიას კომენტარს "გურია ნიუსი" რამდენიმე წუთში შემოგთავაზებთ.