გურიის გუბერნატორის მოადგილის სოსო ერქომაიშვილის კაბინეტში დღეს, დილის 10 საათიდან, შეკრებილები იყვნენ გურიის ფეხბურთის ფედერაციის გამგეობის წევრები. შეხვედრაზე რატომღაც სუს-ის უფროსის მოვალეობის შემსრულებელი ირაკლი ანდღულაძეც იმყოფებოდა.
შეხვედრა 4 საათის განმავლობაში დახურულ კარს მიღმა მიმდინარეობდა და გუბერნატორის მოადგილე ჟურნალისტებს ოთახში არ უშვებდა.
ჩვენს კითხვაზე, თუ რატომ ესწრებოდა სუს-ს მაღალჩინოსანი გუბერნიაში დახურულ შეხვედრას, ერქომაიშვილი პასუხს არ გვცემდა, აგრესიულად გვპასუხობდა, ოთახში ჟურნალისტების არშეშვების მიზეზს არ აკონკრეტებდა და მათ ზეწოლაში დებდა ბრალს:
„არ ვიცი, რამდენიმე ხანი უნდა დამელოდოთ, კომენტარს შემდეგ გავაკეთებ, ზეწოლას ნუ გვიკეთებთ, როცა რაიმე სამუშაო პროცესი მიმდინარეობს, მასში ჩაჭრა ეჭვის ფაქტად აღიქმება _ ფსიქოლოგიურად ცუდია, ამ დიალოგში ცდილობთ, რომ ისეთი ნიუანსები დაიჭიროთ. ვერ შეგიშვებთ ოთახში. შევთანხმდეთ, რომ კომენტარს მერე გავაკეთებ. ნუ ცდილობთ ასეთი ფორმით ზეწოლა მოახდინოთ ამ საქმეზე,“ _ ამბობდა ერქომაიშვილი.
დაახლოებით 4 საათის გასვლის შემდეგ, გუბერნატორის მოადგილე სოსო ერქომაიშვილი კაბინეტიდან გამოვიდა და ჟურნალისტებს გაგვიცხადა, რომ გველოდებოდა გუბერნიის შენობის დარბაზში. ჟურნალისტები რამდენიმე წუთით ერქომაიშვილის კაბინეტის კართან დავრჩით _ კაბინეტიდან სუს-ის მაღალჩინოსანი ირაკლი ანდღულაძე გამოვიდა და უსიტყვოდ დატოვა მისაღები.
“მოგეხსენებათ, რომ გურიის ფეხბურთის ფედერაციაში არის დაძაბულობა _ გამგეობის წევრებმა საპროტესტო აქცია გამართეს გურიის ფეხბურთის ფედერაციის შენობის წინ. ფედერაციის ხელმძღვანელი არ გამოეხმაურა ამ აქციას. გამგეობის წევრებმა, მათი მოთხოვნის რეაგირების გარეშე დატოვების შემდეგ მომართეს გუბერნიას. ეს ჩვეულებრივი მუშა პროცესია _ ჩვენ ნებისმიერ ადამიანს ვხვდებით, ვუსმენთ და ვცდილობთ, გადავჭრათ საჭირბოროტო საკითხები.
კიდევე ერთხელ ხაზს ვუსვამ იმას, რომ ეს არის ჩვეულებრივი სამუშაო პროცესი, აქედან გამომდინარე, ფედერაციის გამგეობის წევრები მობრძანდნენ გუბერნატორთან და გუბერნატორმა დამავალა მე ამ ბატონების მიღება, მათთან გასაუბრება და სიტუაციაში გარკვევა. ამის შემდეგ ეს ბატონები მოვიდნენ ჩემთან. შევეცადეთ, დავკავშირებოდით გურიის ფედერაციის ხელმძღვანელს. ამ მცდელობის შემდეგ, შედეგი, სამწუხაროდ, არის არადამაკმაყოფილებელი _ გურიის ფედერაციის ხელმძღვანელი არ გამოეხმაურა ჩვენს გამოძახილს, ჩვენი მცდელობა იყო უშედეგო.
ამასთან დაკავშირებით გურიის ფედერაციის გამგეობის წევრები აპირებენ განცხადების გაკეთებას, რომელსაც თქვენ მალე გაეცნობით,“_ თქვა ერქომაიშვილმა პრესკონფერენციაზე და სუს-ის მაღალჩინოსნის შეხვედრაზე დასწრების მიზეზები განმარტა:
“რაც შეეხება უშიშროების თანამშრომელის დასწრებას შეხვედრაზე, ეს იყო ჩვეულებრივი სამუშაო შეხვედრა, პროცესი, და მეტი არაფერი. ჩვენ ვხედავთ რაღაცა არასწორ ნაბიჯებს ფედერაციის პრეზიდენტის მხრიდან და ჩვენ ამასთან დაკავშირებით ვაპირებთ განცხადების გაკეთება.
მე ამ საქმეში ჩავერიე იმიტომ, გურიის ფეხბურთის ფედერაციის გამგეობის წევრები და პრეზიდენტის დაკავშირებოდნენ ერთმანეთს, რასაც 4 საათის განმავლობაში ამაოდ ველოდით,“_ განაცხადა ერქომაიშვილმა.
ერქომაიშვილის თქმით, „გამგეობის წევრებზე არავითარი ზეწოლა არ გახორციელებულა და ისინი მოქმედებენ დამოუკიდებლად“.
"გურია ნიუსი" შეეცადა გურიის ფეხბურთის ფედერაციის პრეზიდენტს კახა ებრალიძეს დავკავშირებოდით, თუმცა, მან ჩვენს სატელეფონო ზარებს არ უპასუხა.
ამავე თემაზე: ბოდიში ჟორდანიას, სიურპრიზი გამგებელს _ ლანჩხუთი "სირცხვილს ვერ ასცდა"; საფეხბურთო კლუბი "გურია'' სამართლიანობის აღდგენას ითხოვს; ახალი შეტევა გურიის ფეხბურთის ფედერაციის პრეზიდენტზე; დეპუტატი ჩხაიძე: მხარს დავუჭერ მერაბ ჟორდანიას
