საშემოდგომო სასწავლო-სააღმზრდელო სემესტრი ოზურგეთის მუნიციპალიტეტის 34 საბავშვო ბაღში 2015 წლის 21 სექტემბერს დაიწყება.
ა(ა)იპ სკოლამდელი აღზრდის ცენტრის ხელმძღვანელის ავთანდილ მექვაბიშვილის თქმით, ოზურგეთის მუნიციპალიტეტის საბავშვო ბაღებში 1600-მდე აღსაზრდელს მიიღებენ, ხოლო ნასაკირალსა და ლაითურში დამატებით 70 აღსაზრდელისთვის 2 ახალი ჯგუფი გაიხსნება.
_ სკოლამდელი აღზრდის ცენტრმა უკვე ყველა აუცილებელი ტენდერი გამოაცხადა საბავშვო ბაღების საკვები პროდუქტების, ინვენტარის, სანიტარულ-ჰიგიენური საშუალებების, საკანცელარიო ნივთების და სხვა მატერიალურ-ტექნიკური საშუალებების შესაძენად.
სააღმზრდელო- სასწავლო პროცესის გაუმჯობესებისა და კვალიფიკაციის ამაღლების მიზნით, სპეციალური პროგრამით, ცენტრის 5 და ფილიალების 64 თანამშრომელი გადამზადდა, _ აღნიშნა მექვაბიშვილმა.
ქალაქ ოზურგეთის სკოლამდელი სააღმზრდელო-საგანმანათლებლო ცენტრის 8 ფილიალში სასწავლო პროცესი 2015 წლის 1 ოქტომბერს დაიწყება.
21 სექტემბერს დაიწყება სასწავლო პროცესი ლანჩხუთის მუნიციპალიტეტის საბავშვო ბაღებში. გამონაკლისი მხოლოდ მაჩხვარეთის და აკეთის საბავშვო ბაღები იქნება:
_ მაჩხვარეთში სარემონტო სამუშაოები მიმდინარეობს, აკეთელებს კი ახალ შენობაში მოუწევთ სწავლა. ვფიქრობ, რომ ორივე სოფელში 1 ოქტომბერს დაიწყება სასწავლო-სააღმზრდელო პროცესი. რაც შეეხება დანარჩენ ბაღებს, სწავლის დაწყებისთვის ყველაფერი მზადაა, გათვალისწინებულია სურსათის უვნებლობის სამსახურის მიერ მოწოდებული რეკომენდაციებიც, _ აღნიშნა ჩვენთან საუბრისას ლანჩხუთის მუნიციპალიტეტის გამგებელმა ზაზა ურუშაძემ.
ჩოხატაურის მუნიციპალიტეტის საბავშვო ბაღებში კი სასწავლო პროცესი 14 სექტემბერს დაიწყება. გამონაკლისი მხოლოდ კოხნარის საბავშვო ბაღი იქნება, სადაც, როგორც ჩოხატაურის გამგებელი ირაკლი კუჭავა ამბობს, სარემონტო სამუშაოები მიმდინარეობს.
_ ერკეთის საბავშვო ბაღში სასწავლო პროცესი ძველ შენობაში დაიწყება, რადგან ახალი შენობა, რომლის გახსნასაც 14 სექტემბერს ვგეგმავდით, დამატებით სამუშაოებს საჭიროებს, რაც უახლოეს ხანში დამთავრდება, _ გვითხრა კუჭავამ.
შეგახსენებთ, რომ ერკეთელები ახალ საბავშვო ბაღს, წლების მანძილზე ითხოვდნენ. ამ თხოვნას ავარიულ შენობაზე ათასობით დახარჯული ლარით პასუხობდნენ, რასაც ბაღის აღმზრდელები წყალში გადაყრილ ფულს უწოდებენ.
გასული წლის სექტემბერში, ჩოხატაურის მუნიციპალიტეტის ხელმძღვანელობამ ერკეთელების თხოვნის გათვალისწინება გადაწყვიტა და ახალი საბავშვო ბაღის მშენებლობა დაიწყო.
შპს "ჯორჯიან კომპანის” დირექტორს ვალერიან კაკურიასა და ჩოხატაურის მუნიციპალიტეტის გამგებელს ირაკლი კუჭავას შორის #240 ხელშეკრულება 2014 წლის 11 სექტემბერს გაფორმდა.
"ჯორჯიან კომპანიმ" ჩოხატაურის მუნიციპალიტეტის მიერ გამოცხადებული ტენდერი დაბა ჩოხატაურში სოფელ ერკეთში ახალი საბავშვო ბაღის მშენებლობის სამუშაოების შესყიდვის შესახებ, საკმაოდ დაძაბულ ვითარებაში მოიგო.
ტენდერში, რომელიც 87 899.00 ლარზე იყო გამოცხადებული, 4 კომპანია მონაწილეობდა. "ჯორჯიან კომპანიმ" ფასი დაადგო და აიღო ვალდებულება, რომ 65 555 ლარად ერკეთში ახალ ბაღს ააშენებდა.
ინსპექტირების ჯგუფმა აღნიშნული შენობა გასული წლის დეკემბრის ბოლოს ჩაიბარა.
რამდენიმე თვის აშენებულ საბავშვო ბაღის შენობას ბზარები მალევე გაუჩნდა; ბათქაშიც ბევრ ადგილზე ჩამოვარდა, ახალდაგებული პლინტუსებიც აძვრა.
"გურია ნიუსმა" აღნიშნული პრობლემის შესახებ მკითხველს ჯერ კიდევ აპრილში უამბო. მაშინ, კუჭავა ამბობდა, რომ კომპანიამ ყველა ის ვალდებულება შეასრულა, რაც ხელშეკრულებით და ხარჯთაღრიცხვით იყო გათვალისწინებული. კუჭავა პრობლემას ვერ ხედავდა და ბაღის გახსნას 14 სექტემბერს აანონსებდა: "მალე მიიღებს დასრულებულ სახეს. ამაზე დამატებით დავხარჯავთ თანხებს ისევე, როგორ იანეულში დავხარჯეთ და მომავალი სასწავლო წლისათვის გაიხსნება ეს ბაღი, _ თქვა აპრილში გამგებელმა.
მაშინ, ჩვენ სტატიას გარემოს დაცვის მინისტრი გიგლა აგულაშვილიც გამოეხმაურა და გარემოს დაცვის სამინისტროს გეოლოგიის დეპარტამენტმა საბავშვო ბაღის შენობების (ძველი და ახალაშენებული) განთავსების ადგილების გეოდინამიკური პირობების შესახებ ვიზუალური საინჟინრო-გეოლოგიური დასკვნა დადო.
დოკუმენტში აღნიშნულია, რომ ერკეთში მდებარე საბავშვო ბაღის შენობების განთავსების და მათი მიმდებარე სივრცის გეოდინამიკური მდგომარეობა გეოლოგიის დეპარტამენტის მთავარმა და წამყვანმა სპეციალისტებმა საქართველოს გარემოსა და ბუნებრივი რესურსების დაცვის მინისტრის გიგლა აგულაშვილის დავალების თანახმად ადგილზე გასვლით შეაფასეს:
_ სოფელი ერკეთი, კერძოდ, მისი ცენტრალური უბანი მდებარეობს მდინარე სუფსის ხეობის მარცხენა, ეროზიულ-ძველმეწყრულ ფერდობზე, რომლის დახრილობა 8-25 გრადუსის ფარგლებშია. საბავშვო ბაღის ორივე შენობა განთავსებული ზემოთ აღწერილი ფერდობის ლოკალურ, შედარებით მდგრად ადგილებზე.
ჩვენ მიერ 2013 წლის გაზაფხულზე შედგენილ დასკვნაში აღვნიშნავდით, რომ ბაღის ძველ შენობაზე დაფიქსირებული მცირე ზომის ბზარები ძირითადად გამოწვეული იყო ნაგებობის უხარისხო მშენებლობით და მისი არასწორი ექსპლუატაციით. ამ შენობაში დღესაც მიმდინარეობს აღზრდა-განათლებითი პროცესი და პირველ სექტემბრამდე (ახალი ბაღის შენობის გახსნის თარიღი) მას რაიმე შეფერხება არ ემუქრება.
რაც შეეხება ბაღის ახალ შენობას, ის აგებულია ხელოვნურად მოსწორებულ ზედაპირზე. ნაგებობის კედლებზე იშვიათად ფიქსირდება 1-2 მმ. სიგანის ბზარები, ხოლო საძირკველის მიმდებარედ არსებულ უმნიშვნელო ჩადაბლებებში ზედაპირული წყლის მცირედი გუბურებია”, _ წერია დასკვნაში.
გარემოსა და ბუნებრივი რესურსების გეოლოგიის დეპარტამენტმა ნაგებობის ნორმალური ექსპლუატაციის პირობების უზრუნველსაყოფად, ადგილობრივ მუნიციპალიტეტს რეკომენდაციები მისცა და პრევენციული ღონისძიებების გატარება ურჩია, რომელიც, როგორც გამგეობაში გვითხრეს, გათვალისწინებული იქნება.
