საბერძნეთის ციხიდან გაუჩინარებული როლანდ ჯინჭარაძის მშობლები შვილის ადგილსამყოფელის გარკვევას ცდილობენ.
მათი ინფორმაციით, როლანდ ჯინჭარაძე ციხის საავადმყოფოდან, სადაც ის 7 დღის წინ გადაიყვანეს, გაურკვეველ ვითარებაში გაუჩინადრა.
როგორც "გურია ნიუსს" გაუჩინარებული ბიჭის დედამ, მზეო ჯინჭარაძემ განუცხადა, მის შვილს ციხეში უყურადღებობის გამო ფილტვებში წყალი ჩაუდგა, რის გამოც ათენის ციხის საავადმყოფოში გადაიყვანეს, საიდანაც მისი კვალი გაქრა.
"სამი წელია რაც ჩემი შვილი ათენის ციხეში სასჯელს იხდის. როგორც ახლობლისგან შევიტყვე მან წონაში ძალიან დაიკლო. უყურადღებობის გამო ფილტვში წყალი ჩაუდგა. რამდენიმე დღის წინ კი, საავადმყოფოში გადაიყვანეს,"_აცხადებს მზეო ჯინჭარაძე.
მისივე თქმით, შექმნილი ვითარების გამო საბერძნეთში წასვლის მოთხოვნით მან საგარეო საქმეთა სამინისტროს ერთი კვირის წინ მიმართა, თუმცა პასუხი ჯერ არ მიუღია.
"ჩემი შვილის ავადმყოფობის შესახებ, რომ შევიტყვე, საბერძნეთში წასვლის მოთხოვნით საგარეო საქმეთა სამინისტროს მივმართე ერთი კვირის წინ, ოთხშაბათს, სადაც მითხრეს, რომ 24 საათში პასუხს გამცემდნენ, თუმცა ჯერ არ გამომხმაურებიან,"_აცხადებს დაკარგულის დედა.
მზეო ჯინჭარაძის თქმით, შვილის გაუჩინარების შესახებ საავადმყოფოში მისულმა ნათესავებმა კონსულისგან შეიტყვეს.
"საბერძნეთში ჩენი ნათესავები მივიდნენ კონსულთან, საიდანაც შევიტყვეთ, რომ ჩემი შვილი საავადმყოფოდან გაუჩინარდა, არც ციხეშია და არც საავადმყოფოში, სად გადაიყვანეს არ ვიცით,"_ამბობს მზეო ჯინჭარაძე "გურია ნიუსთან" საუბრისას.
როგორც მან აღნიშნა, ცოტა ხნის წინ კონსული დაუკავშირდა, რომელიც იმ საავადმყოფოში მიდიოდა, სადაც შესაძლოა როლანდ ჯინჭარაძე იმყოფებოდეს.
"კონსულმა დამირეკა ცოტა ხნის წინ და მითხრა, რომ სხვა საავადმყოფოში მიდიოდა ამბის გასარკვევად. მთხოვა ცოტა დრო მომეცი და ყველაფერს გავარკვევო. პასუხს ველოდები", _ ამბობს ჯინჭარაძე.
რაც შეეხება როლანდ ჯინჭარაძეს, დედის ინფორმაციით, ის ციხიდან სექტემბერში უნდა გაეთავისუფლებინათ, თუმცა, შექმნილი ვიტარებიდან გამომდინარე, მშობლები ითხოვენ, მათი შვილის ექსტრადიცია მოხდეს.
"რატომ არ შეიძლება, თუ ის მძიმედ ავადაა, საქართველოში გადმოიყვანონ. საქართველოში მოიხდის დარცენილ სასჯელს.
თუ გადმოიყვანენ, აღარ მომიწევს უცხო ქვეყანაში წასვლა, აქ უფრო უკეთ მივხედავ, ვიდრე იქ", _ ამბობს დაკარგულის დედა.
მისივე იფორმაციით, როლანდ ჯინჭარაძეს საქართველოში მეუღლე და 5 თვის შვილი ჰყავს.
"გურია ნიუსი" საგარეო საქმეთა სამინისტროსაც დაუკავშირდა, თუმცა ჯერჯერობით უწყებაში კომენტარი არ კეთდება. სამინისტროს კომენტარს მოწოდებისთვანავე შემოგთავაზებთ.
