რომან აბრამოვიჩი – "ჩელსი" ლონდონი (ინგლისი)
2003 წლის ივლისში რომან აბრამოვიჩმა და "ჩელსის" ყოფილმა მფლობელმა კენ ბეითსმა ხელშეკრულება გააფორმეს, რომლის თანახმად, 140 მილიონ ფუნტ სტერლინგად ლონდონური კლუბი ჩუკოტკის ექსგუბერნატორის ხელში გადავიდა. კლუბის შეძენის შემდგომ აბრამოვიჩმა დავალიანებების დაფარვა დაიწყო და პირველ ორ სეზონში ახალი ფეხბურთელების შესაძენად 230 მილიონი ფუნტი დახარჯა. იმ ჯილდოს მოგება, რომლის გამოც იყიდა აბრამოვიჩმა "ჩელსი", შეძენიდან მეცხრე წელს მოხერხდა, როდესაც "არისტოკრატებმა" ("ჩელსის" მეტსახელი) ჩემპიონთა ლიგა მოიგეს.
ალიშერ უსმანოვი – "არსენალი" ლონდონი (ინგლისი)
2007 წლის აგვისტოში კომპანია "რედ ენდ უაით ჰოლდინგსმა" ლონდონური საფეხბურთო კლუბ "არსენალის" აქციათა 14,5 პროცენტი იყიდა. კომპანიის მფლობელი რუსი ოლიგარქი, ალისერ უსმანოვია, რომელმაც პირადად აწარმოა მოლაპარაკებები "არსენალის" ყოფილ ვიცე-პრეზიდენტთან, დევიდ დინთან და გარიგების თანახმად, 75 მილიონი ფუნტი გადაიხადა. ბრიტანული პრესა მაშინ წერდა, რომ უსმანოვი მეორე რუსია ინგლისურ პრემიერლიგაში.
იური კორაბლინი – "ვენეცია" ვენეცია (იტალია)
2011 წლის დასაწყისში ცნობილი გახდა, რომ რუსმა ბიზნესმენმა, მილიარდერმა და პოდმოსკოვიეს ქალაქ ხიმკის ყოფილმა მერმა იური კორაბლინმა იტალიური საფეხბურთო კლუბი "ვენეცია" შეიძინა. იტალიური პრესის ცნობით, გარიგების ინიციატორი ვენეციაში მცხოვრები კორაბლინის ახლო მეგობარი, ბელარუსი ბიზნესმენი, ალექს სამოხინი იყო. გარიგების თანხა არ სახელდებოდა, თუმცა ინგლისურ კლუბებთან შედარებით, "ვენეცია" გაცილებით მოკრძალებული კლუბია და როცა ის კორაბლინმა იყიდა, იტალიის საფეხბურთო ჩემპიონატის მეოთხე დივიზიონში ასპარეზობდა.
დიმიტრი რიბოლოვლევი – "მონაკო" (საფრანგეთი)
2011 წელს ცნობილმა რუსმა მილიარდერმა დიმიტრი რიბოლოვლევმა ფრანგული საფეხბურთო კლუბი, "მონაკო" შეიძინა, რომელიც იმ დროს საფრანგეთის ჩემპიონატის მეორე ლიგაში ასპარეზობდა. კომპანია "მონაკო სპორტ ინვესტი", რომლის მფლობელი რიბოლოვლევია, კლუბის აქციათა საბაზო პაკეტს ფლობს, ხოლო დანარჩენი აქციები, მონაკოს სამეფო ოჯახისაა.
ანტონ ზინგარევიჩი – "რედინგი" (ინგლისი)
რუსი მილიარდერის, ბორის ზინგარევიჩის ვაჟი, ანტონი რამდენიმე წლის წინ ინგლისური საფეხბურთო კლუბის, "რედინგის" მფლობელი გახდა. კლუბის აქციათა საკონტროლო პაკეტის შეძენა ოლიგარქის შვილს 25 მილიონი ფუნტი დაუჯდა. საინტერესოა, რომ თავდაპირველად, ზინგარევიჩს "ევერტონის" ყიდვა უნდოდა, თუმცა გარიგება ვერ შედგა. ანტონის მამა ბორისი კი იმით არის ცნობილი, რომ 2009 წელს, 51 მილიონ რუბლად იყიდა საქველმოქმედო აუქციონზე რუსეთის მაშინდელი პრეზიდენტის დიმიტრი მედვედევის მიერ გადაღებული ფოტოსურათი – ტობოლის მონასტერი.
დავიდ ტრაკტოვენკო – "ფკ სიდნეი" (ავსტრალია)
"პრომსტროიბანკის“ ექსმფლობელი და საფეხბურთო კლუბ "ზენიტის" დირექტორთა საბჭოს ყოფილი წევრი, დავიდ ტრაკტოვენკო ავსტრალიური კლუბის, "სიდნეის" აქციათა 22 პროცენტის მფლობელია. მილიარდერი 2008 წლიდან ფლობს ავსტრალიური საფეხბურთო კლუბის აქციათა საკონტროლო პაკეტს, რომელიც ავსტრალიის ფეხბურთის ფედერაციის პრეზიდენტისგან, ფრენკ ლოუისგან შეიძინა. გარიგების დეტალები დღემდე უცნობია.
