როგორც ცნობილია, 2011 წლის ბოლოს მიღებული აბსურდული საკანონმდებლო ცვლილებებით, პოლიტიკური პარტიების წევრებს, მათთან პირდაპირ ან ირიბ კავშირში მყოფ პირებს, მოქალაქეებისთვის ნებისმიერი სახის დახმარების გაწევა ეზღუდებათ. დახმარების გაწევა ან შეპირებაც კი, საარჩევნო მოსყიდვად ითვლება და დახმარების გამწევსაც და მიმღებსაც, შესაძლოა, სამი წლით თავისუფლება აღეკვეთოს.
“გურია ნიუსი” ოზურგეთელი მხატვრის მარინა უჯმაჯურიძის პრობლემებთან დაკავშირებით არაერთხელ წერდა. მხატვრის მიერ სოციალურ ქსელში გავრცელებულ განცხადებას, ოზურგეთის მუნიციპალიტეტის საკრებულოს ოპოზიციონერი წევრი, “გურიის თავისუფალი დემოკრატების” ლიდერი თემურ სალუქვაძე გამოეხმაურა და აღნიშნულ საკითხთან დაკავშირებით სპეციალური განცხადება გააკეთა: “ჩვენს ქვეყანაში არსებულმა მდგომარეობამ ბევრი ნიჭიერი ადამიანი გაუსაძლის მდგომარეობაში ჩააყენა. ერთი მათგანი არის ოზურგეთელი მხატვარი ქალბატონი მარინე უჯმაჯურიძე, რომლის შემოქმედებასაც ქართული საზოგადოება და მეც პირადად ვიცნობ და მეამაყება, რომ ოზურგეთს ასეთი ნიჭიერი ხელოვანი ჰყავს. ვალდებულად ვთვლი თავს და მოვუწოდებ სხვებსაც, დახმარება გავუწიოთ ამ ნიჭიერ შემოქმედს. მე, ჩემის მხრივ, როგორც საკრებულოს დეპუტატი, უფლებამოსილების გახორციელებისთვის განკუთვნილ ერთი თვის თანხას გადავცემ ქალბატონ მარინე უჯმაჯურიძეს”.
“გურია ნიუსი” ამ ფაქტით დაინტერესდა და ინფორმაცია “თავისუფალი დემოკრატების” ლიდერთან თემურ სალუქვაძესთან გადაამოწმა. სალუქვაძე “გურია ნიუსთან” საუბარში ადასტურებს, რომ ეს განცხადება მან ოფიციალურად გააკეთა და თანხასაც ქალბატონ მარინეს ამ დღეებში გადასცემს, თუმცა მისივე თქმით, იყო თუ არა ეს კანონდარღვევა, ამაზე არ უფიქრია:
_ ბატონო თემურ, სოციალურ ქსელში თქვენს მიერ გაკეთებული განცხადებით დაეხმარეთ მხატვარ მარინა უჯმაჯურიძეს, ეს ასეა?
_ ჯერ-ჯერობით არა, იმიტომ რომ ხელფასს ველოდები. ისე დახმარებით, როგორ არა, მე ეს ოფიციალურად განვაცხადე და გავავრცელე. ოღონდ, თანხა უნდა ჩაირიცხოს ჯერ ჩემს ანგარიშზე, თვის ბოლოს და მაშინვე გადავცემ ქალბატონ მარინეს. მე თბილისში ვარ და ეს ყველაფერი დავალებული აქვს უკვე ქალბატონ ნინოს, აიღებს თანხას და მხატვარს სახლში მიუტანს.
_ ბატონო თემურ, როგორც იურისტები ამბობენ, ახალი კანონის თანახმად, ეს კანონდარღვევაა. თქვენ ფლობთ თუ არა ამასთან დაკავშირებით ინფორმაციას? თქვენი აზრით, თქვენ კანონი არ დაარღვიეთ?
_ რა არის დარღვევა?!
_ თქვენ, როგორც პოლიტიკურ სუბიექტს და პოლიტიკური პარტიის ლიდერს, გაქვთ ამის უფლება, რომ თქვენი ხელფასი გადასცეთ ერთ-ერთ გაჭირვებულ ოჯახს? არის თუ არა ეს ამომრჩევლის მოსყიდვა?
_ რა არის წინასაარჩევნო მოსყიდვა? არ ვიცი, მართალი, რომ გითხრათ, არ მიფიქრია იმაზე, რომ ეს კანონდარღვევაა.
არასამთავრობო ორგანიზაციის “საერთაშორისო გამჭვირვალობა _ საქართველოს” იურისტი ირინა ურუშაძე “გურია ნიუსთან” საუბარში აღნიშნავს, რომ ეს არის პირდაპირი მნიშვნელობით პოლიტიკური სუბიექტის მიერ გაკეთებული განცხადება, ითვლება საარჩევნო დაპირებად და ახალი კანონიც დაირღვა:
_ ეს ადამიანი პოლიტიკური პარტიის მიერ წარდგენილი პირი და პოლიტიკურად აქტიური სუბიექტია. რა თქმა უნდა, მას აქვს პოლიტიკური მიზნები. განცხადება, რომელიც პოლიტიკური პირის მიერ არის მოწოდებული, ცალსახა ნამდვილად არ არის. დახმარების გაწევის დაპირებაა, რომელიც უკვე არის ამომრჩევლის მოსყიდვა. კანონში არ არის გამიჯნული, ეს დახმარება პარტიის ბიუჯეტიდან იქნება თუ პირადი ბიუჯეტიდან. ეს განცხადება პირდაპირ არ შეიცავს საარჩევნო დაპირებას, მაგრამ ახალ კანონმდებლობაში ნახსენები “პოლიტიკური მიზნებისთვის” დაპირებად შეიძლება ჩაითვალოს. რადგანაც სალუქვაძეს აქვს პოლიტიკური მიზანი, ეს რა თქმა უნდა, კანონდარღვევად ჩაითვლება. თუ პროკურატურამ და კონტროლის პალატამ დაიწყო ამაზე მოკვლევა, რა დასკვნამდე მივა, ეს მათი საქმეა.
_ ქალბატონო ირინა, აქვს თუ არა მნიშვნელობა იმას, რომ მას ჯერ არც კი გადაურიცხავს თანხა და ქმედება არც კი ჩაუდენია?
_ არა. ახალი კანონმდებლობით, ამას არავითარი მნიშვნელობა არ აქვს. კანონის დარღვევისთვის დაპირებაც საკმარისია.
