ოზურგეთის მუნიციპალიტეტის სოფელ ნატანების საბავშვო ბაღის თანამშრომელი დაგვიკავშირდა და ასეთი ინფორმაცია მოგვაწოდა:
"დამირეკა ბაღის მენეჯერმა და მითხრა, რომ ზეგ ოზურგეთში ე. წ. "ფსიქო" უნდა წარმოვადგინო, რაც 30 ლარი ღირს. გვაქვს საყოველთაო დაზღვევა და წესით უნდა დაგვაზღვიოს. საშვებულებო თანხა და აგვისტოს ხელფასი ჯერაც აუღებელი გვაქვს. ძალიან გთხოვთ , იქნებ დაინტერესდეთ ამ თემით"_ გვითხრა ბაღის თანამშრომელმა.
ოზურგეთის მუნიციპალიტეტის ა.(ა).ი.პ. სკოლამდელი სააღმზრდელო ცენტრის დირექტორი ავთანდილ მექვაბიშვილი "გურია ნიუსთან" ამბობს, ბაღებში ვერცერთი თანამშრომელი ვერ დაიწყებს მუშაობას, თუ მას არ ექნება ჯანმრთელობის ცნობა წარმოდგენილი.
"შვებულების თანხა როგორ არ მივეცით, პირიქით, თვე და 10 დღე მოუწიათ საშვებულებო. რაც შეეხება ჯანმრთელობის ცნობას, აუცილებელია. მისი გაკეთება დაახლოებით 30 ლარი ღირს. ასეთი ცნობის ასაღებად ყველა ორგანიზაცია გადაახდევინებს ფულს. მე არ მაქვს პრობლემა: მომიტანოს ნებისმიერი სადაზღვევო ორგანიზაციიდან ცნობა, რომ არის ჯანმრთელი, აქვს ფილტვები სუფთა, არ აქვს კანის დაავადება და არ ატარებს რაიმე ინფექციურ დაავადებას. სხვანაირად როგორ მივიღო ბაღში თანამშრომელი? ბავშვებთან როგორ შევუშვა? მზარეული, ექთანი, მასწავლებელი, როგორ უნდა შევიდეს ბაღში, თუ მათ ეს ცნობა არ ექნებათ? ასობით თანამშრომელმა გაირა ეს პროცედურა და წარმოგვიდგინა ცნობა. რატომ გაუჩნდა ერთ ნატანებელს პროტესტის გრძნობა, არ ვიცი"_ გვითხრა ცენტრის დირექტორმა
