დღეს, ლანჩხუთის საკრებულოს ბიუროს სხდომაზე უმრავლესობის რამდენიმე წევრმა საკრებულოს თავმჯდომარეს საყვედურით მიმართეს.
კერძოდ, ნიგვზიანის თემის მაჟორიტარმა ბესიკ ტაბიძემ პროტესტის ნიშნად დარბაზი დატოვა, მანამდე კი, განაცხადა, რომ ბიუროს სხდომაზე მხოლოდ ლაპარაკისთვის იკრიბებიან.
"მე არ მიყვარს ტყუილად წყლის ნაყვა. უკვე ერთი წელია ვაყენებ საკითხს ეგ. ნინოშვილის სახელობის მემორიალური მუზეუმის ადმინისტრაციული შენობის ავარიულობის შესახებ, თუმცა, აქამდე არანაირი შედეგი არაა სახეზე. წამოდით, საკუთარი თვალით ნახეთ თუა შესაძლებელი ზამთრის გადატანა იმ პირობებში. თუ აქ მხოლოდ ლაპარაკისთვის ვიკრიბებით?! თუ ასეა, რაღა აზრი აქვს ჩემს აქ ყოფნას, თუ ასე გაგრძელდა მალე საკრებულოს სხდომაზე დასწრებაც აღარ მედომება", _ განაცხადა ტაბიძემ.
აღსანიშნავია, რომ ნინოშვილის სახელობის მემორიალურ მუზეუმს წლებია შენობის პრობლემა აწუხებს, გაუსაძლისი პირობების გამო ფონდსაცავი კერძო ოჯახში აქვთ გადატანილი, თუმცა არც იქაა სახარბიელო მდგომარეობა. ჯერ კიდევ გასულ წელს ანონსდებოდა, რომ ფირმა "ატუ" განახორციელებდა მუზეუმში სარესტავრაციო სამუშაოებს, მაგრამ ამ დრომდე კონკრეტული არაფერია გაკეთებული.
ბიუროზე სუფსის მაჟორიტარის ჯუმბერ ბლაგიძის საყვედურის ობიექტი საკრებულოს თავმჯდომარე გოგი ხელაძე გახდა.
"კარგად იცით, რა მდგომარეობაა სუფსაში ავტომაგისტრალის მშენებლობასთან დაკავშირებით. აქციის მონაწილეებთან შესახვედრად არაერთხელ იყო მისული საკრებულოს ფრაქციებისა და კომისიების ხელმძღვანელები, ადგილზე გაეცნენ მდგომარეობას. თქვენ კი ერთხელაც არ მისულხართ, არადა, ისინი სწორედ თქვენთან შეხვედრას ითხოვენ, ნუთუ არ უნდა მიხვიდეთ ადგილზე და გაეცნოთ მათ პრობლემებს, ჰექტრობით საყანე ფართობებია გაფუჭებული. არ უნდა დაგვავიწყდეს, რომ ჩვენ საკრებულოს წევრები ვართ და ხალხი ჩვენგან მეტ თანადგომას ითხოვს", _ განაცხადა ბლაგიძემ.
თუმცა, ბლაგიძის შენიშვნაზე ხელაძემ განაცხადა, რომ საკრებულო სრული შემადგენლობით პრობლების გადასაჭრელად ვერ ივლის. ცალკეული პირები კი ადგილზე სიტუაციის გასაცნობად უკვე იყვნენ.
"მთელი საკრებულო იქ ხომ არ მივალთ, ჩემს გარდა ხომ იყვნენ სხვები და თქვენც ხომ ხშირად იქ ხართ", _ აღნიშნა ხელაძემ.
