ჩოხატაურის მუნიციპალიტეტის სოფელ ზოტის მოსახლეობა მხარისა და ადგილობრივ ხელისუფლებას უყურადღებობაში ადანაშაულებს:
_ 24 სექტემბერს, მუსულმანური სამყარო ყურბან ბაირამის დღესასწაულს აღნიშნავს. მოგეხსენებათ, ჩვენი სოფლის მოსახლეობა მუსულმანია და ეს დღესასწაული ჩვენთვის ყველაზე დიდია, შესაბამისად განსაკუთრებულად აღვნიშნავთ. სამწუხაროდ, ხელისუფლების არცე რთი წარმომადგენელი არ მოსულა და არ მოულოცავს. ცოტა ხნის წინ ზოტში იყვნენ ამოსულები და ისე თბილად ესაუბრებოდნენ მოსახლეობას, ომარ ხაიამსაც კი შეშურდებოდა, მაგრამ მალევე დავავიწყდით. გაზეთით მაინც მოელოცათ?! ქრისტიანული დღესასწაულები თუ არ ავიწყდებათ, ჩვენ რატომ დავავიწყდით? თუ მხოლოდ არჩევნებზე ვართ მათთვის მნიშვნელოვანი, ოფლგადამსკდარები რომ მოაწყდებიან ჩვენს სოფელს, ხმა მოგვეცით და აგაშენებთო?! _ ამბობენ განაწყენებული ზოტელები.
ჩოხატაურის მუნიციპალიტეტის გამგებლის, ირაკლი კუჭავას თქმით, დღესასწაული სოფლის გამგებელს მოულოცა:
_ ტყუილია ეს. პირადად ვესაუბრე სოფლის გამგებელს და მივულოცე. ასევე, ჩემი ფეისბუქის გვერდიდანაც მოვულოცე და ახლაც შეგიძლიათ ნახოთ პოსტი (ფეისბუქის პოსტს ზოტელები იმ მარტივი მიზეზით ვერ ნახავენ, რომ სოფელში ინტერნეტი არ არის. ნ. გ.) გარდა ამისა, 24 სექტემბერს, გამგეობის კომისია იყო ასული ზოტში, რომლებმაც მიმდინარე ინფრასტრუქტურული პროექტები შეამოწმეს და დღესასწაულიც მიულოცეს იქაურებს, _ გვითხრა კუჭავამ.
გამგებელთან საუბრიდან რამდენიმე წუთში ზოტის გამგებელმა რაულ კონცელიძემ თავად დაგვირეკა და გამგებლის სიტყვები დაადასტურა:
_ ახლა მომივიდა ინფორმაცია, რომ ზოტიდან დაგიკავშირდნენ, ხელისუფლებას მხოლოდ არჩევნებზე ვახსენდებითო…
_ ამბავი მოგივიდათ თუ გამგებელმა დაგირეკათ, ბატონო რაულ?!
_ ჰო და ის მინდა გითხრათ, რომ მე პირადად დამირეკა გამგებელმა, მომილოცა და თითეულ ზოტელს ვერ დაურეკავდა. ასევე, გამგებლის ფეისბუქის გვერდზეც დევს მილოცვა, _ კუჭავას კომენტარი გაამყარა კონცელიძემ.
რაც შეეხება გურიის გუბერნატორს, გია სალუქვაძე ამბობს, რომ იმას მოულოცა, ვისთანაც კავშირი ჰქონდა:
_ ბატონო გია, ზოტის მოსახლეობა გაგინაწყენდათ _ გუშინ უდიდესი დღესასწაული გქვონდა, ხელისუფლებად არ გავხსენერბივართ. გაზეთით მაინც მოელოცათ, ამოსვლას თუ არ კადრულობენო, გვითხრეს. რატომ არ მოულოცეთ ყურბან-ბაირამი?
_ როგორ მომეხერხებინა? _ვისთანაც მიმიწვდება კავშირი, პირადად მიულოცე, _ გვითხრა სალუქვაძემ, რომლის სამუშაო კაბინეტი, სოფელ ზოტიდან არც ისე შორს, დაახლოებით 60 კილომეტრშია.
