27 სექტემბერს, სოხუმის დაცემის დღეს, ადგილობრივი ხელისუფლების და ოპოზიციის წარმომადგენლებმა საქართველოს ტერიტორიული ერთიანობისთვის ბრძოლაში დაღუპული ჯარისკაცების საფლავები გვირგვინებით შეამკეს.
გურიის გუბერნატორმა გია სალუქვაძემ, ოზურგეთის მუნიციპალიტეტის გამგებელმა მერაბ ჭანუყვაძემ, საკრებულოს თავმჯდომარემ დავით დარჩიამ და მუნიციპალიტეტის ხელმძღვანელმა პირებმა დღეს გოჩა შილაკაძის, ტარიელ ოსტროვსკის, ზაზა ჯანხოთელის, აკაკი მიმინოშვილის და გაიოზ სეფერთელაძის საფლავები მოინახულეს, აფხაზეთის ომში დაღუპული გმირები გაიხსენეს და მათ ხსოვნას პატივი მიაგეს.
აფხაზეთის საომარი მოქმედებების დროს 20 ოზურგეთელი მეომარი დაიღუპა. მერაბ ვასაძე, ჯონდო ვასაძე, ბესო ვასაძე (სოფელი მერია); არტურ აივაზიანი, თამაზ რამიშვილი (დაბა ნასაკირალი); ზაზა მუქერია (სოფელი ბოხვაური); ხვიჩა ღლონტი (სოფელი მელექედური); ზაზა ჯანხოთელი, აკაკი მიმინოშვილი, გაიოზ სეფერთელაძე (სოფელი ცხემლისხიდი); მამუკა ცეცხლაძე, გოჩა სალუქვაძე (სოფელი ლიხაური); თამაზ მალაზონია (სოფელი ოზურგეთი); ტარიელ ოსტროვსკი (სოფელი ვაკიჯვარი); ირაკლი ბაქანიძე (სოფელი ნატანები); ზაურ წიქარიძე (სოფელი ნაგომარი); ბორის მარგველიანი (სოფელი-ასკანა); გრიგოლ გოგელაშვილი (დაბა ნარუჯა); გოჩა შილაკაძე (სოფელი შემოქმედი) და ჯემალ დუმბაძე (დაბა ლაითური).
მუნიციპალიტეტმა ტერიტორიული მთლიანობისთვის დაღუპული მეომრების ოჯახებს პირად ანგარიშზე ფულადი თანხა გადაურიცხა.
ქალაქ ოზურგეთის მუნიციპალიტეტის მერის მოადგილემ კობა დუნდუამ საქართველოს ტერიტორიული მთლიანობისთვის დაღუპულ გმირთა მემორიალი და ეროვნული გმირის, ზაზა დამენიას საფლავი გვირგვინით შეამკო.
აღნიშნულ დღესთან დაკავშირებით ოზურგეთის მუნიციპალიტეტის მერიის განათლების, კულტურისა და გენდერული თანასწორობის სამსახურის ორგანიზებით სახელმწიფო დრამატული თეატრის მცირე დარბაზში აფხაზეთის ომის თემატიკაზე შექმნილი ქართული ფილმის ‘’მანდარინების’’ ჩვენება შედგა. ჩვენებას მერის მოადგილე, კობა დუნდუა, განათლების, კულტურისა და გენდერული თანასწორობის სამსახურის უფროსი, მარინა ჯაფარიძე, ქალაქის მერიის თანამშრომლები და ახალგაზრდები ესწრებოდნენ.
"თავისუფალი დემოკრატების" ოზურგეთს რაიონული ორგანიზაციის და ამავე პარტიის ახალგაზრდული ფრთის წარმომადგენლები, ქალაქ ოზურგეთში, სოხუმში დაღუპული ჯარისკაცების ბიუსტი გვირგვინით შეამკეს.
