საქართველოს ყოფილმა საგარეო საქმეთა მინისტრმა სალომე ზურაბიშვილმა "გურია ნიუსთან" რამოდენიმე, ქვეყნისთვის მნიშვნელოვან საკითხზე ისაუბრა:
მნიშვნელოვნადაა გააქტიურებული საქართველოს მთავრობის მუშაობა ჩინეთის მიმართულებით. სულ ახლახან დამთავრდა პრემიერის ვიზიტი ჩინეთში, რომელსაც, როგორც მთავრობა გვარწმუნებს, ბევრი, ქვეყნისთვის უმნიშვნელოვანესი პროექტის განხორციელება უნდა მოყვეს.
დღეს მთელი ევროპა მიბრუნებულია ჩინეთისკენ, ყველა ქვეყნისთვის ძალიან მნიშვნელოვანია ჩინეთი თავისი უზარმაზარ ბაზრით. ეს ძალიან ნორმალურია. რამდენად წარმატებულია ეს მცდელობები, ჯერ ვერ გეტყვით, კონკრეტული არაფერი ჩანს. დღეს ჩინეთთან დაკავშირებით გააქტიურება ნორმალურად აღიქმება, თუ რა თქმა უნდა, ეს მოიტანს კონკრეტულ შედეგებს.
ქართულ–რუსული ურთიერთობების დღეს არსებულ ფორმატში შესაძლებელია თუ არა რაიმე სახის პოზიტიური ცვლილებები?
სახელმწიფოს აქვს ერთადერთი აბაშიძე– კარასინის ფორმატი, რომელიც უნდა შენარჩუნდეს. თუ საჭირო გახდება რომელიმე კონკრეტული საკითხის მოგვარება, მნიშვნელოვანია, რომ შევძლოთ შვეიცარიის საელჩოს გვერდის ავლით დაველაპარაკოთ რუსეთს. დღე რომ ვიყო საგარეო საქმეთა მინისტრი, ნამდვილად არ მეცოდინებოდა პასუხი კითხვაზე, როგორ უნდა გადაწყდეს რომელიმე საკითხი რუსეთთან მიმართებაში. რუსეთი გახდა სახელმწიფო, რომელთანაც ყველას ურთულდება ურთიერთობა, მის ნაცად პარტნიორებსაც კი.
დღეს ჩვენი ერთადერთი პოლიტიკა შეიძლება იყოს პოლიტიკა კონფრონტაციული განცხადებების გარეშე და არა ისე, როგორც ეს იყო წინა ხელისუფლების და მისი ლიდერის დროს.
პრორუსული ძალების გააქტიურებაზე, მათ მიერ მართულ პროცესებზე რა აზრის ხართ?
მე ვერ ვხედავ დღეს პრორუსული ძალების უფრო მეტად გააქტიურებას, ვიდრე ეს იყო სხვა დროს. არაფერს ნიშნავს გაბრაზებული კახელი მევენახების განცხადებები, რომ მავთულით შემოღობავენ კახეთს და წაიყვანენ რუსეთისკენ. ვფიქრობ რომ ეს ადგილობრივი პოლიტიკური ძალების დადგმულ პროვოკაციას უფრო გავს . მსგავსი ტიპის კარიკატურული ხასიათის განცხადებები არაფერს ცვლის ქვეყანაში.
როგორ შეაფასებთ საგარეო საქმეთა სამინისტროს, უწყების ახალი ხელმძღვანელის გიორგი კვირიკაშვილის და ზოგადად სამთავრობო გუნდის მუშაობას?
მე არ შემიძლია ამ ადამიანის შეფასება, მით უმეტეს ჯერ ერთი თვეც არ არის მისი თანამდებობაზე დანიშვნიდან გასული. ზოგადად არ ვაკეთებ საგარეო საქმეთა მინისტრების შეფასებას, ეს ჩემი მხრიდან არაკორექტული იქნებოდა. რაც შეეხება უწყებას, არ ვარ ჩახედული მისი მუშაობის სტილში, მთავარია რა პრიორიტეტები აქვს სამინისტროს და როგორ მუშაობს მათ შესასრულებლად. მე არ ვიცი, რა არის დღეს მათი პრიორიტეტი, ეს არის ამ ხელიუფლების ერთ– ერთი შეცდომა, ვერ ახერხებს საზოგადოებამდე მიიტანოს ეს მნიშვნელოვანი თემები.
რაც შეეხება მთავრობის მუშაობას, ყველაზე უკან დგას პროკურატურა და საგამოძიებო ორგანოები, ამ სფეროში ხელისუფლებამ ვერ შეძლო რაიმე კონკრეტული შედეგის დადება. ამ უწყებებმა ვერ იმუშავეს როგორც საჭიროა. დღეს ჩვენ უკვე უნდა გვქონოდა სამაგალითოდ გამოძიებული საქმე სამართლიანობის აღდგენის სახელით. უნდა ყოფილიყო ნაჩვენები სამაგალითოდ, თუ რა სქემებით მუშაობდნენ წინა ხელისუფლების დროს და როგორ ხდებოდა ბიზნესების წართმევა. ამ შემთხვევაში, კონკრეტულ დამნაშავის დასჯაზე უფრო მნიშვნელოვანი ეს იყო. საარჩევნო სისტემაში არ მომხდარა მნიშვნელოვანი ცვლილებები, რასაც გვპირდებოდნენ.
რაც შეეხება დადებითს, ერთხმად ვთანხმდებით ჯანდაცვის სამინისტროს წარმატებულ საქმიანობაზე. სერგეენკო აღმოჩნდა კარგი მენეჯერი. მაგრამ უარყოფითად შეიძლება შეფასდეს ისიც, რომ მთავრობა ვერ ახერხებს, ეს ძალიან მნიშვნელოვანი ცვლილებები მიიტანოს თითოეულ მოქალაქემდე და მთლიანად საზოგადოებამდე. აჩვენოს მას ნათლად, როგორი ცვლილებები განხორციელდა.
მთავრობა თითქოს კარგად ჩაჯდა "ნაციონალების" მიერ შერქმეულ ტერმინ " უნიათოს" ჩარჩოში და არც უნდა ამ ჩარჩოდან გამოსვლა. კარგად შეიფერა ეს ეპითეტი.
