დღეს ლანჩხუთის ცენტრალურ სტადიონზე საფეხბურთო კლუბ "გურიას" მესვეურებს, ადგილობრივი ხელისუფლების წარმომადგენლებს, გულშემატკივრებსა და მედიის წარმომადგენლებს ფეხბურთის ფედერაციის პრეზიდენტობის კანდიდატი ლევან კობიაშვილი შეხვდა და მათ საკუთარ სამომავლო გეგმებზე ესაუბრა.
დამსწრე-საზოგადოებას პრეზიდენტობის კანდიდატი მუნიციპალიტეტის გამგებელმა და ამავდროულად "გურიას" პრეზიდენტმა ზაზა ურუშაძემ წარუდგინა და სტუმარს მომავალ არჩევნებში წარმატებაც უსურვა.
ურუშაძის თქმით, ის და "გურიას" მთელი შემადგენლობა კობიაშვილის კანდიდატურას უჭერენ მხარს, რადგან ფეხბურთში არსებული ხარვეზების გამოსასწორებლად ახალი სიცოცხლე და ძალისხმევაა საჭირო.
"ხარვეზები ზემოდან უნდა გამოსწორდეს. უპირველესად ყურადღება ბავშვთა ფეხბურთს უნდა მიექცეს. მე ვიცნობ ბატონი ლევანის საარჩევნო პროგრამას და მასში სწორედ ამაზეა მთავარი აქცენტი გაკეთებული", -განაცხადა ურუშაძემ.
თავის მხრივ კობიაშვილმა შეხვედრაზე მისულებს მადლობა მოახსენა და იმედი გამოთქვა, რომ სამი ოქტომბრის შემდეგ იგი უკვე ფედერაციის პრეზიდენტის სტატუსით ეწვევა ლანჩხუთს.
