ოზურგეთის მუნიციპალიტეტმა შპს "ხიდმშენს" სასამართლოში ორი საქმე მოუგო.
პირველი მერია-ლაითურის ხიდის მშენებლობას ეხება, რომელზეც ხელშეკრულება 2013 წლის 19 სექტემბერს გაფორმდა.
მერია-ლაითურის შემაერთებელ ადგილობრივი მნიშვნელობის გზაზე, მდინარე ნატანებზე სახიდე გადასვლელის მშენებლობის საერთო ღირებულება 2 356 225, 18 ლარით იყო განსაზღვრული.
2013 წლის 09 დეკემბრის შეთანხმებით (დანართი N1) მხარეთა მიერ N318 ხელშეკრულებაში განხორციელებული იქნა ცვლილება, კერძოდ: ხელშეკრულების საერთო ღირებულება შემცირდა 20 467,18 ლარით და განისაზღვრა 2 335 758 ლარის ოდენობით.
თავდაპირველად, ხელშეკრულების მიხედვით ობიექტის ჩაბარების ვადა იყო ხელშეკრულების გაფორმებიდან 210 კალენდარული დღე _ 2014 წლის 19 აპრილი, ხოლო ხელშეკრულების მოქმედების ვადა 2014 წლის 1 ივნისამდე.
აღნიშნულ ვადებთან დაკავშირებით, 2014 წლის 30 მაისის შეთანხმებით (დანართი N2) მხარეთა მიერ N318 ხელშეკრულებაში განხორციელებული იქნა ცვლილებები, კერძოდ: ობიექტის ჩაბარების ვადა განისაზღვრა 2014 წლის 01 სექტემბრით და ხელშეკრულების მოქმედების ვადა გაგრძელებული იქნა 2014 წლის 01 ნოემბრამდე.
ხელშეკრულებით გათვალისწინებულ ვადაში ს/ს „ხიდმშენის“ მიერ არ იქნა შესრულებული ვალდებულებები, რისთვისაც დარღვეული უფლებების აღსადგენად ოზურგეთის მუნიციპალიტეტმა მიმართა ოზურგეთის რაიონულ სასამართლოს.
სასამართლოს 2015 წლის 24 სექტემბრის გადაწყვეტილებით სრულად იქნა დაკმაყოფილებული ოზურგეთის მუნიციპალიტეტის სარჩელი და ს/ს ხდიმშენს დაეკისრა პირგასამტეხლოს – 233 575,8 ლარის, ავანსის სახით მიღებული თანხის 468 451,40 ლარის და სახელმწიფო ბაჟის _ 5000 ლარის გადახდა. საერთო ჯამში _ 707 027, 2 ლარი.
მეორე საქმე, რომელზეც გადაწყვეტილება სასამართლომ ისევ ოზურგეთის მუნიციპალიტეტის სასარგებლოდ გამოიტანა სოფელ დვაბზუში მდებარე ფეხმავალი (საქვეითო) ხიდის რეაბილიტაციას ეხებოდა.
„სახელმწიფო შესყიდვების შესახებ“ საქართველოს კანონის მე-10 პრიმა მუხლის მე-3 პუნქტის „ბ“ ქვეპუნქტისა და საქართველოს მთავრობის 2013 წლის 30 ოქტომბრის N1499 განკარგულების საფუძველზე, გამარტივებული შესყიდვის საშუალებით ოზურგეთის მუნიციპალიტეტსა და ს/ს „ხიდმშენს“ შორის 2013 წლის 16 დეკემბერს გაფორმდა N538 ხელშეკრულება. აღნიშნული ხელშეკრულებით შესყიდვის ობიექტის, ანუ ოზურგეთის მუნიციპალიტეტის სოფელ დვაბზუში მდებარე ფეხმავალი (საქვეითო) ხიდის რეაბილიტაციის საერთო ღირებულება განისაზღვრა 199981 (ას ოთხმოცდა ცხრამეტი ათას ოთხმოცდა ერთი) ლარით.
ამ შემთხვევაში, თავდაპირველად, ხელშეკრულების მიხედვით ობიექტის ჩაბარების ვადა იყო 2014 წლის 1 აგვისტო, აღნიშნულ ვადებთან დაკავშირებით, 2014 წლის 31 ივლისის შეთანხმებით (დანართი N1) მხარეთა მიერ N538 ხელშეკრულებაში განხორციელებული იქნა ცვლილებები, კერძოდ: ობიექტის ჩაბარების ვადა განისაზღვრა 2014 წლის 1 ოქტომბრით და ხელშეკრულების მოქმედების ვადა გაგრძელებული იქნა 2014 წლის 1 დეკემბრამდე.
ხელშეკრულებით გათვალისწინებულ ვადებში სამუშაო არ შესრულდა და მუნიციპალიტეტმა უფლებების დაცვა სასამართლოთი სცადა.
ოზურგეთის რაიონული სასამართლოს 2015 წლის 24 სექტემბრის გადაწყვეტილებით სრულად იქნა დაკმაყოფილებული ოზურგეთის მუნიციპალიტეტის სარჩელი და ს/ს ხდიმშენს დაეკისრა პირგასამტეხლოს – 11998,86 ლარის, ავანსის სახით მიღებული თანხის – 86579 ლარის, სახელმწიფო ბაჟის – 2957,33 ლარის გადახდა, საერთო ჯამში _ 101 535,19 ლარი.
საერთო ჯამში, ოზურგეთის რაიონული სასამართლოს გადაწყვეტილებებით, ს/ს „ხიდმშენს“ ოზურგეთის მუნიციპალიტეტის სასარგებლოდ N318 და N538 ხელშეკრულებების დარღვევის გამო დაეკისრა 808 562, 39 ლარის გადახდის ვალდებულება.
