წინასაარჩევნოდ კანონმდებლობაში შესული ცვლილების გამო, სერიოზულ აღშფოთებას გამოთქვამენ ცალკეული პოლიტიკური პარტიების თუ არასამთავრობო ორგანიზაციების წარმომადგენლები _ მათი თქმით, ეს ცვლილებები ხალხის ნების იგნორირება და ტერორის დამკვიდრების დასაწყისია. ამიტომ, ნებისმიერ მოქალაქეს მართებს, კონკრეტულად კარგად გაერკვეს აღნიშნულ კანონში და შემდეგ ხმა აიმაღლოს მის წინააღმდეგ. ასეთ აზრს ავითარებს ოზურგეთის მუნიციპალიტეტის საკრებულოს ოპოზიციონერი დეპუტატი ლელა ნაცვალაძე.
_ ქალბატონო ლელა, როგორია თქვენი აზრი საარჩევნო კანონში შესულ ცვლილებასთან დაკავშირებით? ახლახან გაიმართა აქცია, სახელწოდებით _ “ეს შენ გეხება” . მიგაჩნიათ რომ კიდევ უფრო ხმის ამაღლებაა საჭირო ამ ცვლილების წინააღმდეგ?
_ “ეს შენ გეხება” არის დროული და ძალზე მნიშვნელოვანი აქცია, რომლის მიზანია საქართველოში მცხოვრებმა თითოეულმა ადამიანმა გაიგოს, თუ რა საფრთხის წინაშე დგას. იმ ხელისუფლებამ, რომელსაც ქვეყნის მოსახლეობის უმეტესი ნაწილი სიღარიბის ზღვარს მიღმა ჰყავს და უწამლობითა და უსახსრობით უკვდება, მიიღო კანონი, რომელიც კრძალავს ქველმოქმედებას და დაჭერით ემუქრება იმ ადამიანებს, რომლებსაც ჯერ კიდევ შემორჩათ კეთილი ნება გაჭირვებულთა დასახმარებლად.
ეჭვგარეშეა, რომ “ჭრა-კერვის დიდოსტატებმა” აღნიშნული ცვლილება ბიძინა ივანიშვილის გამოჩენისთანავე მოიფიქრეს, რადგან შიშით გულები უსკდებათ. მისასალმებელია, რომ აქცია _ “ეს შენ გეხება” ჟურნალისტებისა და არასამთავრობო სექტორის ინიციატივით დაიწყო, რადგანაც, გარდა “ნაციონალური მოძრაობის” წარმომადგენლებისა, არავინ არ არის დაზღვეული ამ ცვლილებებით გამოწვეული საშიშროებებისგან. მე ვაპირებ, აქტიური მონაწილეობა მივიღო აღნიშნულ აქციაში. უნდა შეიქმნას მუშა ჯგუფები, რომლებიც თითოეულ მოსახლემდე მიიტანენ აღნიშნულ ინფორმაციას, უნდა შევაგროვოთ და პარლამენტს წარვუდგინოთ ხელმოწერები, რითაც ვაიძულებთ ხელისუფლებას, აღნიშნული კანონი შეცვალოს.
_ რას გვეტყვით საქართველოში დღეს მიმდინარე პოლიტიკურ მოვლენებზე?
_ საქართველოს სისხლიანმა ხელისუფლებამ საკუთარი “მოღვაწეობის” ყოველი დღე, ერთის მხრივ, პირადი ოჯახების კეთილდღეობასა და მეორეს მხრივ, საკუთარი ხალხის დაბეჩავებას, მოშიებას, დაშინებასა და მოკვდინებას მიუძღვნა; საქმიანობა პიარსა და ტყუილებზე დააფუძნა და ასე განიზრახა არსებობის გახანგრძლივება. როცა იფიქრა, რომ საწადელს მიაღწია, სწორედ მაშინ, პოლიტიკურ ორბიტაზე გამოჩნდა ადამიანი, რომელმაც მთელი მისი მოღვაწეობა ქველმოქმედებას, საქართველოს და ქართველი ხალხის კეთილდღეობას მიუძღვნა. ბიძინა ივანიშვილის გამოჩენამ შეშინებულ, დაბეჩავებულ, უკიდურესად გაჭირვებულ და ოპოზიციისგან იმედგაცრუებულ საქართველოს მოსახლეობას იმედის ნაპერწკალი ჩაუსახა, მომავლის რწმენა დაუბრუნა… ხელისუფლება კი, რომელსაც ეგონა, რომ ფონს იყო გასული, აგონიაში ჩავარდა და მოუხშირა არაადეკვატურ ქმედებებს. პირველი არაადეკვატური ნაბიჯი იყო ბიძინა ივანიშვილისთვის მოქალაქეობის ჩამორთმევა, რამაც ქართველი ხალხი ძალიან გააღიზიანა და მხარდამჭერთა რაოდენობა გაუათმაგა. ამის შემდეგ მოხდა ივანიშვილის “ქართუ ბანკზე” თავდასხმა, საბაბით, რომ, თითქოს, საქართველოში, ამ ბანკის საშუალებით, რუსული ფული მოედინებოდა. ხელისუფლება, რომელმაც ქვეყნის სტრატეგიული და სასიცოცხლო ობიექტების დიდი ნაწილი რუს ინვესტორებს ჩაუგდო ხელში, თითს იშვერს ბიძინა ივანიშვილისკენ. სააკაშვილმა ივანიშვილში დაინახა არა “ჯიბეცარიელი” ოპოზიციონერი, არამედ საკმაოდ დიდი კაპიტალის მქონე ქველმოქმედი, რომელმაც საკუთარი ფინანსები მოახმარა საქართველოში მცხოვრებ მეცნიერებს, მსახიობებს, ექიმებს, პედაგოგებს, სპორტსმენებს, ქართულ მართლმადიდებლობას. სწორედ ამიტომ ახალი საარჩევნო კანონების დაწერა დაიწყო, რათა ყველა გზა გადაუკეტოს “მოწინააღმდეგეს”. მაგრამ გარწმუნებთ, რომ ხელისუფლების მიერ გადადგმული ყველა არასწორი ნაბიჯი, მისი არსებობის დასასრულს მოასწავებს!
_ “ქართული ოცნება” იქნება ის ძალა, რომელიც ნამდვილად აუხდენს ქართველ ხალხს ოცნებებს? რას ფიქრობთ იმ პოლიტიკურ ძალებზე, რომლებიც ბიძინა ივანიშვილმა კოალიციაში გააერთიანა?
_ დღეს ყველაზე სწორი პოლიტიკური ფორმულა, სიმართლე რომ გითხრათ, ასეთია _ “ყველა, მინუს სააკაშვილი”. მაგრამ, რადგანაც ბატონმა ბიძინამ თავის პირველივე გამოსვლაში გამიჯნა რიგი პოლიტიკური სუბიექტებისა, მჯერა, რომ ეს არგუმენტებზე და ფაქტებზე დაყრდნობით გააკეთა, რადგან მის ჩამონათვალში არიან პოლიტიკური ძალები, რომლებიც პირადი კეთილდღეობის სანაცვლოდ, თვალის ერთი დახამხამებით გაყიდიან ქვეყანას და ჩემი აზრით, ისინი ამ ხელისუფლებაზე უარესებიც არიან.
ჩემი მრავალწლიანი პოლიტიკური გამოცდილების გამო, გარკვეული შეხედულებაც ჩამომიყალიბდა ოპოზიციურ ძალებზე. ამიტომაც ვთვლი, რომ პოლიტიკური პარტია “დემოკრატიული საქართველო – ქართული ოცნება” უნდა გახდეს ძლიერი პოლიტიკური ძალა და კოალიცია “ქართული ოცნების” ხერხემალი, რადგან დღეს ქართველი ხალხი სწორებას მხოლოდ ბიძინა ივანიშვილსა და მის პოლიტიკურ პარტიაზე აკეთებს. მინდა დანარჩენ პოლიტიკურ ძალებს მოვუწოდო, რომ პირადი პოლიტიკური ამბიციები დაივიწყონ, რადგანაც საქართველოს მოსახლეობას არ დავიწყებია 7 ნოემბერი და თქვენი სამარცხვინო უკანდახევა. თოვლიან და ყინვიან ზამთარში იპოდრომზე შეკრებილ ოთხასიათას ქართველს არ დაავიწყდება, თუ როგორ გაუცრუეთ იმედები, სწორედ თქვენ, ვინც დღეს ბიძინა ივანიშვილის გვერდით დგახართ და თავი მაგრები გგონიათ; არც იმის დავიწყება შეიძლება, წინა საპარლამენტო არჩევნების დროს, როცა ნინო ბურჯანაძემ ერთიანი ნაციონალური მოძრაობის საარჩევნო სია დატოვა, რეგისტრაციამდე კი საათები იყო დარჩენილი, 200 კაცის მობილიზება ვერ შესძელით, რათა ცენტრალური საარჩევნო კომისიის შენობა დაგეცვათ. ეს რომ მომხდარიყო, დღეს პარტიული სიით არც ერთი ნაციონალი დეპუტატი არ გვეყოლებოდა პარლამენტში, მაგრამ სააკაშვილმა ოპოზიციის სისუსტით ისარგებლა და თავისი გაიტანა. საზოგადოებამ კი მხოლოდ პროტესტის ნიშნად თქვენი დახეული მანდატები იხილა და მეტი არაფერი!
ადამიანებს, რომლებსაც მეხსიერება ისე დაეკარგათ, რომ წარსული დაავიწყდათ, მიმაჩნია, რომ უნდა შეახსენო!
_ მომავალ საპარლამენტო არჩევნებში ვის გვერდით დადგება ლელა ნაცვალაძე და მისი გუნდი?
_ ხშირად ვამბობ და ახლაც ვიმეორებ _ საქართველო და ქართველი ხალხი კიდევ ერთ დამარცხებასა და იმედგაცრუებას ვეღარ გადაიტანს. ლელა ნაცვალაძე თავის გუნდთან ერთად იმ ადამიანების გვერდით დადგება, ვისთვისაც სამშობლო უძვირფასესია, ვისთვისაც ქვეყნის სიყვარული პირად ამბიციაზე მაღლა დგას და ვისაც გულწრფელად უნდა, ამ რეჟიმის პოლიტიკურ ი არენიდან გასტუმრება. აქ საკითხი დგას ასე _ სიკეთეს ბოროტებამ ბრძოლა გამოუცხადა და აუცილებლად სიკეთემ უნდა გაიმარჯვოს. მე ამ ბრძოლისათვის, როგორც ყოველთვის, მზად ვარ.
